2 Madzi. 6 - Bhaibheri Rakachena muChindau

Kunyurwa kweSanho

¹ Zvino vakororo vevaprofeti vakati kunaErisha, “Ringira zvino, ndau yetinogara pashi pesimba renyu idoko kwetiri.

² Titendere tiende Jorodhani, titore kubveyo munhu weshe sika, tidziakirepo ndau yokugara.” Wakapingura echiti, “Endai.”

³ Zvino umwe wavo wakati, “Tenda, ndinokupota, kuti uende nevaranda vako.” Naye wakapingura echiti, “Ndinozoenda.”

⁴ Ndizvo wakaenda navo. Naapo vakaguma Jorodhani, vakatema miti.

⁵ Asi apo umwe achatema muti, simbi yesanho yakawira mumvura; wakadaidzira echiti, “Yoowe, makosi wangu! Raiya rakachenekwa.”

⁶ Zvino munhu waMwari wakati, “Rawira ngepari?” Naapo wakamupangidza ndau yacho. Erisha wakatema muti, akaukandiramwo ukaita kuti simbi yesanho iangararike.

⁷ Wakati, “Itore.” Ndizvo wakatambanudza nyara yake, akaritora.

Hondo yevaAramu Inonyiswa

⁸ Kamwe apo mambo weAramu wakaambana naIsuraeri, wakapangana nevaranda vake. Wakati, “Kundau iyo neiyo kunozoiswa matende angu.”

⁹ Asi munhu waMwari wakatumira izwi kunamambo waIsuraeri echiti, “Ngwarai kuti musazopinda ngepandau iyo neiyo, ngokuti vaAramu vanodzaka ndipo.”

¹⁰ Mambo waIsuraeri wakatumira izwi kundau yaakaronzerwa ngomunhu waMwari. Wakavangwadza kanopinda kamwe nokuti kairi ngendaa yakadaro, kuti vagare vakangwara.

¹¹ Mwoyo wamambo weAramu wakatambudzika ngeiyo ndaa; wakadaidza varanda vake, akati kwevari, “Zvino ndironzerei kuti ndiani pakati pedu unoiyana namambo waIsuraeri?”

¹² Zvino umwe wevaranda vake wakati, “Apana naumwe, makosi wangu mambo. NdiErisha muprofeti uri muIsuraeri, ndiye unoronzera mambo waIsuraeri mazwi ounoereketa uri mukamera rako rokuata.”

¹³ Wakati, “Endai mwootsvakisisa mumuone paari; ndinozotuma vanhu, vamubate.” Wakaronzerwa kwechizwi, “Ringira, uri muDhothani.”

¹⁴ Ndizvo wakatumirayo mahachi, nengoro, nehondo huru; vakaguma usiku, vakatendenedza dhorobha reshe.

¹⁵ Naapo muranda womunhu waMwari paakamuka mangwanani maishi nokubuda kubanze, ringira, hondo yaiya yatendenedza dhorobha inemahachi nengoro. Muranda wake wakati kwaari, “Yoowe, mambo wangu! Tinozoitenyi?”

¹⁶ Wakapingura, akati, “Usatya, ngokuti avo vari kwetiri vakapinda kuwanda kuneavo vari kwevari.”

¹⁷ Zvino Erisha wakakumbira echiti, “Ndinokupota, Mambo Mwari, pembenudza madziso ake kuti aone.” Ndizvo Mambo Mwari wakapembenudza madziso ejaha iro, naro rakaona; ringira, mutunhu waiya wakazara ngemahachi nengoro dzomuriro, zvaiya zvakatendenedza Erisha.

¹⁸ Naapo vaAramu vakadzaka koorwa naye, Erisha wakakumbira kunaMambo Mwari echiti, “Itai kuti ava vanhu vawirwe ngoupofu, ndinokupota.” Naye wakavachaya ngoupofu kudai ngokukumbira kwaErisha.

¹⁹ Erisha wakati kwevari, “Iyi andiyopi njira, neiri andiropi dhorobha; asi nditeerenyi neni ndinozopangidzira munhu womunotsvaka.” Naye wakavatungamirira kuenda Samaria.

²⁰ Naapo vachandopotera muSamaria, Erisha wakati, “Mambo Mwari, pembenudza madziso eava vanhu, kuti vechiona.” Mambo Mwari wakapembenudza madziso avo, navo vakaona kuti vaiya vaapakati peSamaria.

²¹ Naapo mambo waIsuraeri avaona, wakati kunaErisha, “Baba angu, ndivauraye here? Ndivauraye here?”

²² Wakapingura akati, “Haiwa, usavauraya. Ungauraya avo here vewakatora kuita hloko vewanyisa ngeshoti yako nouta hwako? Vape kudya nemvura kuti vadye nokumwa, vahwirinze kunamambo wavo.”

²³ Ndizvo wakavanasirira dhiri gurutu; naapo vapedza kudya nokumwa, wakavaendesa, navo vakaenda kunamambo wavo. Ndizvo zvikwata zvavaAramu azvizi kuchazouyazve koochakata munyika yaIsuraeri.

Kutendenedzwa kweSamaria

²⁴ Ngesure kwenguva Bhenihadhadhi mambo weAramu wakaunganidza hondo yake yeshe, akakwira koorwa neSamaria akaritendenedza.

²⁵ Kwakaitika nzara huru muSamaria, apo vakaangira kuritendenedza, metsa nesoro rembongoro rakatengwa ngezvigurwa makumi masere zvesirivha, nemagramu mazana mairi edoto renjia aitengwa ngezvigurwa zvishanu zvesirivha.

²⁶ Zvino mambo waIsuraeri apo echihamba ngepadera porukumbati rwedhorobha, mudzimai wakadaidzira kwaari, echiti, “Detsera, makosi wangu mambo!”

²⁷ Wakati, “Haiwa! Mambo Mwari ngaakudetsere. Kudai Mambo Mwari asikakudetseri, inini ndingakudetsera ngenjiranyi? Kubva kumbuwa yokupurira here, nokuti pandau yokukamurira vhini?”

²⁸ Asi zvino mambo wakamubvunza echiti, “Chiinyi chinokutambudza?” Wakapingura echiti, “Uyu mukadzi wakati kwendiri, ‘Ipa mukororo wako kuti timudye nyamashi, mangwani tinozodyawo wangu.’

²⁹ Ndizvo takabika mukororo wangu, tikamudya. Neni ndakati kwaari nechimangwani, ‘Chipa mukororo wako kuti timudye.’ Asi waiya afisha mukororo wake.”

³⁰ Naapo mambo azwa mazwi omudzimai, wakabaura zvokufuka zvake; zvino ngokuti waihamba ngepadera porukumbati rwedhorobha, vanhu vakamuringira, vakaona mambo akasimira masaka ngepashi pamuiri wake.

³¹ Naye wakati, “Mwari ngaaite kudaro kwendiri nokupinda, kudai soro raErisha mukororo waShafati rechizogara pamakhadza ake nyamashi.”

³² Ndizvo wakaendisa munhu kubva pamberi pake. Zvino Erisha akagara mumhatso yake, nevakuru vakagara naye. Nhumwa isati yaguma, Erisha wakati kuvakuru, “Munozia here kuti muurayi uyu wakatuma munhu kuti agure soro rangu? Naapo nhumwa yechiguma, wonai kuti mwakonya musiwo, muibate kuti isapinda. Muzwe kuti mwangira wetsoka dzamambo wake adzizwike here ngesure kwake?”

³³ Naapo aiya achaereketa navo, ringira, mambo wakadzaka kwaari, wakati, “Ringira, uku kushata kunobva kunaMambo Mwari; ndingachagonderenyi munaMambo Mwari?”