2 Madzi. 5 - Bhaibheri Rakachena muChindau

Naamani Unoponeswa

¹ Zvino Naamani nduna yehondo yamambo weAramu, waiya munhu mukuru kunamambo wake, wairemeredzeka kunamambo wake, ngokuti kubudikidza ndiye Mambo Mwari waiya akapa kunyisa kwevaAramu. Kunyazwi waiya munhu waiya ngwazi yakashinga, asi waiya nemapere.

² Zvino vaAramu mukuchakata kwavo kumwe, vakabuda ngezvikwata, vakauya kubva kunyika yaIsuraeri nekamusikana kadoko, nako kakashandira mukadzi waNaamani.

³ Kakati kunavahosi vake, “Kudai kwega mambo wangu aiona muprofeti uri munyika yeSamaria! Waizomuporesa mapere ake.”

⁴ Ndizvo Naamani wakapotera kunamambo wake, akamuronzera echiti, “Musikana wakabva kunyika yaIsuraeri unoronza izvi.”

⁵ Namambo weAramu wakati, “Endayo, ndinozotumira tsamba kunamambo waIsuraeri.” Wakaenda, wakatora naye matarenta gumi esirivha, nemakumi emazana matanhatu (6,000) ezvigurwa zvomukore, nezvokupfeka zvipani gumi.

⁶ Wakaunza tsamba kunamambo waIsuraeri yechiti, “Naapo tsamba iyi yaguma kwouri, ringira ndinotuma nayo Naamani muranda wangu, kuti uporese mapere ake.”

⁷ Naapo mambo waIsuraeri adzidza tsamba, wakamwesa zvokufuka zvake echiti, “Ndiri Mwari here inini, unopa rufu noruponeso, kuti munhu uyu atume izwi kwendiri kuti ndiporese munhu mapere ake? Ndizvo wonai kutsvaka kwaanoita ndaa kwendiri.”

⁸ Asi apo Erisha munhu waMwari azwa kuti mambo waIsuraeri wamwesa zvokufuka zvake, wakatuma kunamambo echiti, “Wabaurirenyi zvokufuka zvako? Murekere auye kwendiri, naye unozozia kuti uripo muprofeti muIsuraeri.”

⁹ Ndizvo Naamani wakauya nemahachi ake nengoro dzake, wakaema ngepamusiwo wemhatso yaErisha.

¹⁰ NaErisha wakatuma nhumwa kwaari echiti, “Enda, ushambe muJorodhani mikuwo minomwe, nenyama yako inozotambiswa, newe unozosukika.”

¹¹ Asi Naamani wakatseneka, akaenda echiti, “Ringira, ndaipinimidza kuti ngegwinyiso unozobuda kuuya kwendiri, echiema, echikumbira ngezina raMambo Mwari, Mwari wake, echiisa nyara yake pandaupo, aporese mapere.

¹² Abhana naFapha ndwizi yeDhamasekusi airi ndwizi yakapinda kunaka here kunemvura yeshe yomuIsuraeri? Andisaizoshamba kweiri here ndisukike?” Ndizvo wakakunukuka, akaenda ngokutseneka.

¹³ Asi varanda vake vakakwedzera pasinde, vakaereketa naye vechiti, “Baba angu, kudai muprofeti amuronzera kuita chiro chikuru musaizochiita here? Kunopinda kwakaitawani kuneicho chaaronza kwouri, apo ati, ‘Shamba usukike?’ ”

¹⁴ Ndizvo wakadzaka, akatupira mikuwo minomwe muJorodhani, kudai ngokuronza kwomunhu waMwari; nenyama yake yakatambiswa ikadai ngeyomwana mudoko, naye wakasukika.

¹⁵ Wakahwirira kunomunhu waMwari, iye nevanhu vake; wakaguma, akaema pamberi pake echiti, “Ringira, zvino ndinozia kuti akuna Mwari umweni munyika dzeshe, asi muIsuraeri mwega; ndizvo zvino ndinokupota kuti uashire chipo chomuranda wako.”

¹⁶ Asi Erisha wakati, “Kudai ngezvaanopona Mambo Mwari, uwo wendinoema pamberi pake, andizoashiri chiro!” Asi wakamupota kuti achiashire, asi iye wakaramba.

¹⁷ Zvino Naamani wakati, “Kuti musikatori, ndinokupota, tendera kuti mitwaro yemavhu ingatwarwa ngemaasera mairi ipuwe kunomuranda wako; ngokuti muranda wako aachazopirizve midiro yokupisha nokuti minikero imweni kunezvimwari, asi kwega kunaMambo Mwari.

¹⁸ Asi ngeiyi ndaa Mambo Mwari kungurirai muranda wenyu pandaa imwe; naapo mambo wangu echipinda mumhatso yaRimoni koomudiramwo, akatseama paruoko rwangu, neni ndakakotama mumhatso yaRimoni, naapo pendinokotama pashi mumhatso yaRimoni, Mambo Mwari kungurirai muranda wenyu pandaa imwe iyi.”

¹⁹ Erisha wakati kwaari, “Enda ngokunyarara.” Asi Naamani apo abuda kubva kwaari kamuhambo kadoko,

²⁰ Gehazi, muranda waErisha munhu waMwari, wakati, “Ringirai, mambo wangu warekera yaamho Naamani muAramu uyu, ngokusikaashira kubva kunyara dzake izvo zvaakaunza. Asi kudai ngezvaanopona Mambo Mwari, inini ndinozorumba kumuteera, nditore chiro kubva kwaari.”

²¹ Ndizvo Gehazi wakateera Naamani. Naapo Naamani aona munhu echirumba sure kwake, wakatomuka kubva mungoro yake kuti ashongane naye echiti, “Kwakanaka here?”

²² Naye wakati, “Eya kwakanaka hakwo, asi mambo wangu wandituma echiti, ‘Ringira, zvinopano uno kwaguma kwendiri majaha mairi evakororo vevaprofeti vabva kunyika yemitunhu yeEfuremu; ndapota, vape tarenta rimwe resirivha, nezvipani zviiri zvokupfeka.’ ”

²³ Naamani wakati, “Ndapota, ashira matarenta mairi.” Wakamupota, akasunga matarenta mairi esirivha mukati mwemikwama miiri, nezvipani zviiri zvokupfeka, akazvipa kuvaranda vake vairi, avo vakazvitwara pamberi pake.

²⁴ Naapo aguma kumutunhu, wakazvitora kubva kunyara dzavo, akazvifisha mumhatso; wakaendesa vanhu, navo vakaenda.

²⁵ Wakapotera, akaema pamberi pamambo wake; naErisha wakati kwaari, “Wabva kuri, Gehazi?” Naye wakati, “Muranda wako akuna kwaakamboenda.”

²⁶ Asi wakati kwaari, “Mwoyo wangu auzi kuenda newe here, apo munhu wakatomuka kubva mungoro yake kooshongana newe? Iyi ndiyo nguva here yokuashira mare, nokuashira zvokupfeka, nokuashira minda yemiorivhi, neminda yemivhini, makwai nekabi, nehloko dzevamuna nevakadzi?

²⁷ Ndizvo mapere aNaamani anozoambukira kwouri, nokumibarirwana yako mhera nariini.” Wakabuda kubva pamberi pake aane mapere achena kuti mbembee kudai ngechando.