2 Madzi. 4 - Bhaibheri Rakachena muChindau

Erisha Unodetsera Shirikadzi iri Murombo

¹ Zvino mukadzi woumwe wevakororo vevaprofeti wakadaidzira kunaErisha echiti, “Muranda wako, mwamuna wangu wakafa; newe unozia kuti muranda wako waimutya Mambo Mwari, asi uwo waaiya nechikwerete naye wauya kootora vakororo vangu vairi kuti vaite hloko.”

² Erisha wakati kwaari, “Ndinozoitenyi kwouri? Ndironzere kuti chiinyi chounacho mumhatso mwako?” Wakati, “Murandakadzi wako aana chiro mumhatso yake, ngokubanze kwejomeya remafuta.”

³ Erisha wakati, “Enda kubanze, ucheneke zvidziyo kuvaakirwana vako veshe, zvidziyo zvisina chiro; usacheneke zvishomani.

⁴ Zvino pinda mumhatso, udzikonyere mukati iwewe nevakororo vako, wechidurura mafuta muzvidziyo zveshe; naapo chimwe ngachimwe chazara, unozochiemesa parutii.”

⁵ Ndizvo ngokudaro wakaenda kubva kwaari, akadzikonyera mumhatso nevakororo vake; vakaangira kuunza zvidziyo kwaari, naye wakaangira kudurura.

⁶ Naapo zvidziyo zvazara, wakati kunomukororo wake, “Ndiunzirezve chidziyo chimweni.” Asi wakati kwaari, “Zvidziyo zvapera.” Naapo mafuta akakhauka.

⁷ Wakauya, akaronzera munhu waMwari, naye wakati, “Enda, wootengesa mafuta, uripe chikwereti chako, wechidzirera iwewe nevana vako ngaawo asara.”

Erisha noMukadzi Mupfumi Waibva Shunemu

⁸ Zuva rimweni Erisha wakaenda Shunemu, mwaigara mukadzi gurudza; naye wakamunyengerera kuti adye kudya. Ndizvo mukuwo weshe waaipinda ngeiyo njira, waipaukapo kuti adye kudya.

⁹ Wakati kunomwamuna wake, “Ringira, ngegwinyiso ndinoona kuti munhu wakachena waMwari, uwo unopinda ngepano mukuwo weshe.

¹⁰ Ngatimunasirire, ndinokupota, kamera doko rinemarukumbati; techiisamwo mubhedhi, tafura, chigaro nechibani, kuti azogaramwo apo aguma kwetiri.”

¹¹ Zuva rimweni apo agumapo, wakakwira mukamera iro, akaatamwo.

¹² Wakati kunaGehazi muranda wake, “Daidza mukadzi uwo muShunami.” Naapo amudaidza, wakauya akaema pamberi pake.

¹³ Wakati kwaari, “Ereketa kwaari zvino wechiti, ‘Ringira, iwewe wakatidetsera ngourwu rudetso rukurutu; chiinyi chingaitwa kwouri? Unoda here kuereketerwa izwi kunamambo, nokuti kunenduna yehondo?’ ” Wakapingura, akati, “Ndinogara pakati pevanhu vangu.”

¹⁴ Erisha wakati, “Chiinyi zvino chingaitwa kwaari?” Gehazi wakapingura akati, “Ngegwinyiso aana mukororo, nomwamuna wake waa musharuka.”

¹⁵ Erisha wakati, “Mudaidze.” Naapo amudaidza, wakaema ngepamusiwo.

¹⁶ Wakati, “Panguva iyi gore rouya, mukuwo wakwana wakaemeswa iwewe unozotengura mukororo.” Wakati, “Haiwa, mambo wangu, iwewe munhu waMwari, usanyepera murandakadzi wako.”

¹⁷ Mudzimai wakaita mimba, akabereka mukororo panguvayo, kudai ngenguva yakaemeswa, kudai ngezveakaereketa Erisha kwaari.

¹⁸ Naapo mwana akura, zuva rimweni wakaenda kunababa ake pakati pevaikukura.

¹⁹ Naye wakati kunababa ake, “Soro rangu, soro rangu!” Baba vakati kunomuranda wavo, “Mutore, uende naye kunamai ake.”

²⁰ Wakamutora, akamuisa kunamai ake, vakamutengura metsa masikati makuru, naye wakafa.

²¹ Wakakwira, akamuradzika pamubhedhi womunhu waMwari, akamukonyera mukati, akabuda kubanze.

²² Zvino wakadaidzira kumwamuna wake echiti, “Nditumire, ndinokupota, umwe wevaranda, neimwe yembongoro, kuti ndirumbe kuenda kunomunhu waMwari nokupetukazve.”

²³ Wakati, “Unoenda kwaari nyamashi ngenyi? Ngokuti akusiri kutawa kwomwedzi nokuti Sabatha.” Wakati, “Zvinozonaka.”

²⁴ Zvino wakasungira mbongoro, akati kunomuranda wake, “Tinha mbongoro, uende mberi; usaema kuhamba asi kuti ndakuronzera.”

²⁵ Ndizvo wakaenda, akaguma kunomunhu waMwari kuMutunhu Kharmeri. Naapo munhu waMwari amuona achikuretu, wakati kunaGehazi muranda wake, “Ringira, uwo mukadzi muShunami.

²⁶ Rumba kasira, ndapota, ushongane naye, uti kwaari, ‘Zvakanaka here kwouri? Zvakanaka here kunemwamuna wako? Zvakanaka here kunemwana wako?’ ” Wakapingura echiti, “Zvakanaka hazvo.”

²⁷ Naapo aguma kunomunhu waMwari pamutunhu, wakamubata tsoka dzake. Asi Gehazi wakakwedzera pasinde kuti amusukumidze. Asi munhu waMwari wakati, “Murekere, ngokuti mweya wake unotambudzika; Mambo Mwari wazvifisha kubva kwendiri, aazi kundironzera.”

²⁸ Naapo wakati, “Ndakakumbira mukororo here kubva kunamambo wangu? Andizi kukuronzera here kuti, ‘Usandichengedzera?’ ”

²⁹ Wakati kunaGehazi, “Sungisa chiunu chako, utore mudondoro wangu munyara mwako, uende. Kuti ukashongana nomunhu usamuchingamidza, kuti munhu akakuchingamidza, usadaira; wooisa mudondoro wangu pahope yemwana.”

³⁰ Zvino mai vomwana vakati, “Kudai ngezvaanopona Mambo Mwari, nokudai ngezvounopona iwewe, andizokusii.” Ndizvo wakamiruka, akamuteera.

³¹ Gehazi wakapinda mberi kwavo, akaradzika mudondoro pahope yemwana, asi paiya pasina kufema nokuti chaionisa kupona. Wakapetuka, akashongana naErisha, akamuronzera echiti, “Mwana aazi kumuka.”

³² Naapo Erisha apotera mumhatso, wakaona mwana akaata afa, akaradzikwa pamubhedhi wake.

³³ Ndizvo wakapotera mukati, akadzikonyera nomwana, akakumbira kunaMambo Mwari.

³⁴ Zvino wakakwira pamubhedhi, akaata padera pemwana, akaisa muromo wake paiya nowake, namadziso ake paiya neake, nenyara dzake paiya nedzake; nomuiri womwana wakadziirwa.

³⁵ Wakadzaka pashi, akahamba kamwe mberi nesure mukamera, zvino wakakwirazve akakotama padera pake; mwana wakaotsira kanomwe, akabeura madziso ake.

³⁶ Erisha wakadaidza Gehazi, akati, “Daidza mukadzi muShunami.” Ndizvo wakamudaidza. Naapo auya kwaari, wakati, “Tora mukororo wako.”

³⁷ Wakauya, akawa patsoka dzake, akakotamira pashi; zvino wakatora mukororo wake, akabuda kubanze.

Mishamiso Imweni Miiri

³⁸ Naapo Erisha paakapetuka Girigari, kwaiya nenzara munyika. Vakororo vevaprofeti vaiya vakagara pamberi pake, wakati kunomuranda wake, “Tereka hari huru, ubikire vakororo vevaprofeti kudya.”

³⁹ Umwe wavo wakabuda kuenda mushango kookaya muriwo; wakaona muvhini womushango, wakakayapo matanga omushango akaita butwa, akauya akaachekera muhari yezvokudya, asikazii kuti chiinyi.

⁴⁰ Ndizvo vakaburira vanhu kuti vadye. Asi apo vachadya zvokudya vakaboorera vechiti, “A munhu waMwari, munorufu muhari!” Avazi kuchakona kuadya.

⁴¹ Wakati, “Zvino unzai ufu.” Naye wakakandira muhari iyo; akati, “Burira vanhu vadye.” Mwaiya musichina chiro chaiuraya muhari.

⁴² Kwakauya munhu wakabva Bhaarisharisha, wakaunzira munhu waMwari michero yomutanguro, zvingwa zvebhari makumi mairi, nemitsonzoti yomushosho wekoroni musaka rake. Erisha. wakati, “Ipai vanhu kuti vadye.”

⁴³ Asi muranda wake wakati, “Ndingaisa ngenjiranyi izvi pamberi pevanhu zana?” Ndizvo wakatizve, “Ipai vanhu kuti vadye, ngokuti izvi ndizvo zvinoronza Mambo Mwari, ‘Vanozodya nokuzvisiya.’ ”

⁴⁴ Ndizvo wakazviisa pamberi pavo, vakadya, vakasiya zvimweni, kudai ngezverakaronza izwi raMambo Mwari.