2 Madzi. 3 - Bhaibheri Rakachena muChindau

Hondo pakati paIsuraeri naMoabhi

¹ Mugore regumi namasere rokutonga kwaJehoshafati mambo waJudha, Jehoramu mukororo waAhabhi wakaamba kutonga padera paIsuraeri muSamaria, naye wakatonga makore gumi namairi.

² Wakaita zvakashata mukuona kwaMambo Mwari, asi haiwa kudai ndibaba ake nokuti mai ake, ngokuti wakadusa muedzaniso waBhaari uwo wakaitwa ndibaba ake.

³ Kunyazwi zvakanyadaro wakabatirira kuzvishaishi zvaJerobhoamu mukororo waNebhati, uwo wakaita kuti vaIsuraeri vashaishe; aazi kutenderuka kubva kwezviri.

⁴ Zvino Mesha mambo waMoabhi waiya nepfuma yemakwai mazhinji, waiunza kunamambo waIsuraeri makwai zana rimwe remakumi emazana, (100,000), nemamviri emagondohwe zana rimwe remakumi emazana (100,000).

⁵ Asi apo Ahabhi afa, mambo weMoabhi wakamukira mambo weIsuraeri.

⁶ Ndizvo mambo Jehoramu wakabuda kubva Samaria ngouwo mukuwo, akaerenga veshe vaIsuraeri.

⁷ Naapo echienda wakatumira izwi kunaJehoshafati mambo waJudha echiti, “Mambo waMoabhi wakandimukira; aungaendi neni here kuti tirwe nevaMoabhi?” Iye wakati, “Ndinozoenda; inini ndinewe, vanhu vangu ngevako, mahachi angu ngeako.”

⁸ Zvino wakati, “Tinozohamba ngenjira iri?” Jehoramu wakapingura, “Ngenjira inohamba ngomushango reEdhomu.”

⁹ Ndizvo mambo waIsuraeri, mambo waJudha namambo weEdhomu vakaenda; naapo vatenderera muhambo wemazuva manomwe, kwaiya kusina mvura yokuti vanhu vokurwa vamwe nokuti mhuka dzevaihamba nadzo.

¹⁰ Zvino mambo waIsuraeri wakati, “Ihehe! Mambo Mwari watidaidza isusu madzimambo matatu pamwepo, kwega kutipira munyara dzevaMoabhi!”

¹¹ Asi Jehoshafati wakati, “Akuna here muprofeti waMambo Mwari uno, kuti tibvunze kunaMambo Mwari kubudikidza ndiye?” Zvino umwe wevaranda vamambo waIsuraeri wakapingura echiti, “Uriyo Erisha mukororo waShafati, uwo waisidurura mvura panyara dzaErija.”

¹² Jehoshafati wakati, “Izwi raMambo Mwari riri kwaari.” Ndizvo mambo waIsuraeri, Jehoshafati namambo weEdhomu vakadzaka vechienda kwaari.

¹³ Erisha wakati kunamambo waIsuraeri, “Ndinenyi newe? Enda kunevaprofeti vababa ako, nokuvaprofeti vamai ako.” Asi mambo waIsuraeri wakati kwaari, “Haiwa; ndiMambo Mwari wakatidaidza madzimambo matatu, kwega kutipira munyara dzevaMoabhi.”

¹⁴ Erisha wakati, “Kudai ngezvaanopona Mambo Mwari wehondo, uwo wendinoema pamberi pake, ngegwinyiso, kudai ndisaiya kuti ndinoremeredza Jehoshafati mambo waJudha, ndisaizokuringira, nokuti kupinimidza ndimwi.

¹⁵ Asi ndiunzirenyi muridzi weminanzi.” Zvino apo muridzi acharidza, kwakauya nyara yaMambo Mwari padera pake.

¹⁶ Naye wakati, “Mambo Mwari unoronza izvi, ‘Ndinozoita kuti bani iri rizare ngemakandwa.’

¹⁷ Ngokuti unoronza izvi Mambo Mwari, ‘Amuzooni dutu, nokuti mvura yechinaya; asi bani rinozodzadzwa ngemvura, yokuti mumwe, imwimwi n'ombe, dzenyu nezvifuyo zvenyu zveshe.’

¹⁸ Ichi chiro chidoko mukuona kwaMambo Mwari; unozopira vaMoabhi munyara dzenyu.

¹⁹ Munozoparadza madhorobha eshe akashosherwa, nemadhorobha eshe akanaka; munozotemera pashi miti yeshe yakanaka, nokutsiira zvinyuka zveshe zvemvura, mushaishire minda yeshe yakanaka ngemapuwe.”

²⁰ Pazuva raiteera, mangwanani kuchapirwa mudiro, ringira, mvura yakatanga kuerera yechibva ngorutii rweEdhomu, metsa nyika yakadzadzwa ngemvura.

²¹ Naapo vaMoabhi veshe pevakazwa kuti madzimambo aiya auya koorwa navo, vakaunganidza veshe vaikona kurwa ngezvokurwa ndizvo, vakuru nevadoko, vakaema mumigano.

²² Naapo vakamuka mangwanani maishi, nezuva rakajeka padera pemvura, vaMoabhi vakaona mvura yokurutii urwo rwakaringirana navo yakatsvuka kudai ngengazi.

²³ Vakati, “Iyi ingazi; ngegwinyiso madzimambo akaurayana, vakabayana umwe noumweni. Ndizvo zvino, vaMoabhi, endai kunezvakachakatwa.”

²⁴ Asi apo vaiya vaguma kukamba yaIsuraeri, vaIsuraeri vakamiruka, vakabaya vaMoabhi, avo vakatiza pamberi pavo; naapo vakarumbirira vaMoabhi vechivabaya metsa kuguma kunyika yavo.

²⁵ Vakaparadza madhorobha avo, nendau dzeshe dzaiya dzakanaka, munhu weshe wakakandira buwe rake, metsa vakadzadza idzo ndau, vakatsiira zvinyuka zveshe zvemvura, vakatemera pashi miti yeshe yakanaka. Kwega muKirharesethi vakasia marukumbati aro, asi vanokandira ngechimvii vakaritendenedza, vakarifura.

²⁶ Naapo mambo weMoabhi aona kuti kurwa kwamukurira, wakatora vanhu mazana manomwe vakapakatira shoti, akaenda navo kuedza kupwanya pakaringisana namambo weEdhomu; asi wakakorera.

²⁷ Zvino wakatora mukororo wake wedangwe uwo waizogara nhaka yake, akamupira kuita mudiro wokupisha padera porukumbati. Ushungu hukuru hwakauya padera pevaIsuraeri; ndizvo vakabva kwaari, vakahwirira kunyika yavo.