2 Madzi. 23 - Bhaibheri Rakachena muChindau

Josia Unosiyana noKudirwa kweZvimwari

¹ Zvino mambo wakatuma vanhu, vakaunganidza kwaari vakuru veshe vaJudha neveJerusarema.

² Mambo wakakwira kumhatso yaMambo Mwari, pamwepo nevanhu veshe vaJudha neveJerusarema, vapristi, vaprofeti, nevanhu veshe vadoko nevakuru. Naye wakavadziidzira munzee dzavo eshe mazwi ebhuku rechitenderano iro rakaoneka mumhatso yaMambo Mwari.

³ Mambo wakaema pasinde pesika, akaita chitenderano pamberi paMambo Mwari, kuteera Mambo Mwari, nokungwarira mipango yake, zviemeso zvake, zvitongero zvake, ngomwoyo wake weshe, nomweya wake weshe, kuti aite mazwi echitenderano awo akanyorwa mubhuku iri. Vanhu veshe vakaema kugwinyisa chitenderano.

⁴ Mambo wakapanga Hirikia mupristi mukuru, nevapristi vechikwata chechipiri, nevanorinda misiwo, kuti vabudise kubva mutemperi raMambo Mwari zveshe zvidziyo zvakaitirwa Bhaari, zveAshera, nezvehondo yeshe yomudenga; wakazvipisha pabanze peJerusarema murubaya rweKedhironi, wakatora marota azvo kuenda Bhetheri.

⁵ Wakadusa vapristi vemiedzaniso, avo vakaemeswa ngemadzimambo aJudha kuti vapishe mitombo inegwema rakanaka mundau dzakakwirira dzemadhorobha aJudha, nendau dzaitendenedza Jerusarema; avozve vaipisha mitombo inegwema rakanaka kunaBhaari, kunezuva, kunomwedzi, kunyeredzi, nokuhondo yeshe yomudenga.

⁶ Vakadusa muedzaniso wokudira Ashera kubva mumhatso yaMambo Mwari, kuenda kubanze kweJerusarema kurwizi runozwi Kedhironi, akaupishapo parwizi Kedhironi, akaupwanya metsa waita bukuta, akakandira bukuta iri padera pemaiba evanhutu.

⁷ Wakapwanyira pashi mhatso dzevamuna mahure emutemperi, dzaiya mumhatso yaMambo Mwari, apo vakadzi pevairukira Ashera.

⁸ Wakabudisa vapristi veshe kubva kumadhorobha aJudha, akasvipisa ndau dzakakwirira, apo vapristi pavaiya vechipishira mitombo inegwema rakanaka, kubva Gebha metsa Bheerishebha; wakaputsira pashi ndau dzeshe dzakakwirira dzaiya pamisiwo yaiya pevaipotera ndipo pamusiwo waJoshua mutongi wedhorobha, iyo yaiya ngokumuoshwe mwechipotera pamusiwo wedhorobha.

⁹ Vapristi vendau dzakakwirira kunyazwi vaiya vasikakwiri kuarita raMambo Mwari muJerusarema, asi vaidya chingwa chisina mumera pakati pehama dzavo.

¹⁰ Wakasvipisa Thofethi riri mubani reBhenihinomu, kuti kusazoapo naumwe ungazoita kuti mukororo wake nokuti mwanasikana wake apinde kupotya muriro kuita mudiro kunaMorekhi.

¹¹ Wakadusa mahachi akapirwa ngemadzimambo aJudha kunezuva, pamusiwo wokupinda mumhatso yaMambo Mwari, pasinde pekamera raNathanimerekhi muranda, raiya ngokubanze kwedhorobha. Wakapisha ngoro dzaiya dzezuva ngomuriro.

¹² Maarita awo aiya padera pedenga rekamera repadera raAhazi, awo akaitwa ngemadzimambo aJudha, nemaarita mairi akaitwa ndiManase mumaruwanze mairi emhatso yaMambo Mwari, wakaapwanyira pashi kubvapo, akagura kuita zvigurwa, bukuta racho akarikandira murwizi Kedhironi.

¹³ Zvino mambo wakasvipisa ndau dzakakwirira dzaiya kumabvazuva kweJerusarema, idzo dzaiya ngokubani kwoMutunhu woKuparadzwa, idzo mambo Soromoni weIsuraeri dzaakaakira Ashithorethi chinyangadzo chevana vaSidhoni, Khemoshi chinyangadzo chevaMoabhi, naMirikhomu chinyangadzo chevana vaAmoni.

¹⁴ Wakaputsa sika dzemapuwe kuita zvigurwa, akatemera pashi miedzaniso yokudira Ashera, akadzadza ndau idzo ngemagodo evanhu.

¹⁵ Zve, arita raiya muBhetheri, nendau yakakwirira, zvaakaita Jerobhoamu mukororo waNebhati, uwo wakaita kuti vaIsuraeri vashaishe, wakapwanyira pashi iro arita nendau yakakwirira. Wakapisha ndau dzakakwirira, akaikuya ikaita bukuta, akapishawo Ashera.

¹⁶ Naapo Josia wakakunukuka kuringira, akaonapo maiba pamutunhu; wakatuma vanhu kootora magodo kubva mumaiba, akaapisha paarita, akarisvipisa, kudai ngeizwi raMambo Mwari raakaereketa kubudikidza ngomunhu waMwari, uwo wakadaidzira mazwi aya.

¹⁷ Zvino wakati, “Sika iyi ngeyenyi yendinoona?” Vanhu vedhorobha vakamuronzera, vechiti, “Ndiro iba romunhu waMwari, uwo wakabva kwaJudha, wakadaidzira izvi zviro zvewaita iwewe kunearita reBhetheri.”

¹⁸ Wakati, “Ngaarekerwe azorore; pasina naumwe unodusa magodo ake.” Ndizvo vakarekera magodo ake, pamwepo nemagodo omuprofeti wakabva Samaria.

¹⁹ Zve Josia wakadusa mhatso dzeshe dzendau dzakakwirira dzaiya mumadhorobha eSamaria, dzakaitwa ngemadzimambo aIsuraeri kumusira ushungu hwaMambo Mwari; wakaita kwedziri kudai ngezvaakaita muBhetheri.

²⁰ Wakauraya vapristi veshe padera pemaarita endau dzakakwirira avo vaiyapo, wakapishira magodo evanhu padera pavo, wakahwirira Jerusarema.

Josia Unoita Dhiri rePhasika

²¹ Mambo wakapanga vanhu veshe echiti, “Itirai Mambo Mwari, Mwari wenyu, Phasika, kudai ngezvakanyorwa mubhuku rechitenderano ichi.”

²² Ngegwinyiso akuna kumboitwa Phasika rakadaro kubvira kumazuva evatongi avo vakatonga Isuraeri, nokuti kumazuva eshe emadzimambo aIsuraeri naaJudha.

²³ Asi mugore regumi nemasere rokutonga kwamambo Josia, Phasika iri rakaitirwa kunaMambo Mwari muJerusarema.

²⁴ Zve Josia wakabvisa zveshe mweya yokubudirwa, n'anga, miedzaniso, zvithombe, nokushata kweshe ukwo kwakaoneka munyika yaJudha nomuJerusarema, kuti agwinyise mazwi omupango wakanyorwa mubhuku raakaona Hirikia mumhatso yaMambo Mwari.

²⁵ Paiya pasina mambo wakadai ndiye kunevakatanga pamberi pake, uwo wakatenderukira kunaMambo Mwari ngomwoyo wake weshe, nomweya wake weshe, nesimba rake reshe, echingwarira mupango weshe waMosi; zve, ngesure kwake akuzi kubuda naumwe wakadai ndiye.

²⁶ Zvakanyadaro Mambo Mwari aazi kutongokunukudza kutsamwa kwake kwaibaka kukurutu, kwakabaka kurwisana naJudha, ngendaa yokutsamwiswa kwaakatsamwiswa ndikwo ndiManase.

²⁷ Mambo Mwari wakati, “Ndinozobvisawo Judha kubva pamberi pangu, kudai ngezvendakabvisa Isuraeri; ndinozorasha dhorobha iri rendakatsanangura Jerusarema, nemhatso yendakati ndiyo, ‘Zina rangu rinozogaramwo.’ ”

Magumo oKutonga kwaJosia

²⁸ Zvino mishando imweni yaJosia, nazvo zveshe zvaakaita, azvizi kunyorwa here muBhuku reMishando yeZuva ngeZuva yeMadzimambo aJudha?

²⁹ Mumazuva ake Faro Nekho mambo weEgipite wakaenda koorwa namambo weAsiria parwizi Yufratesi. Mambo Josia wakaenda kooshongana naye; asi apo Faro Nekho paakashongana naye paMegidho, wakamuuraya.

³⁰ Varanda vake vakamutwara mungoro afa kubva Megidho, vakamuunza Jerusarema, vakamuika muiba rake. Vanhu venyika vakatora Jehoahazi mukororo waJosia, vakamudzodza, vakamuita mambo pandau yababa ake.

Jehoahazi Mambo waJudha

³¹ Jehoahazi waiya nemakore makumi mairi nematatu apo paakatanga kutonga; wakatonga mwedzi mitatu muJerusarema. Zina ramai ake raizwi Hamutari mwanasikana waJeremia weRibhina.

³² Wakaita zvakashata mukuona kwaMambo Mwari, kudai ngezvakaita madzibaba ake.

³³ Faro Nekho wakamusunga ngemanguri muRibra munyika yaHamathi, kuti asazotonga muJerusarema; naye wakavabharisa chibharo, akaita kuti Judha abhadhare makhirogramu makumi emazana matatu nemazana marongomuna (3,400) esirivha nemakhirogramu makumi matatu nemarongomuna omukore.

³⁴ Faro Nekho wakaemesa Eriakimu mukororo waJosia, kuita mambo pandau yababa ake Josia naye wakatsandura zina rake kuita Jehoiakimu. Asi wakatora Jehoahazi; wakauya Egipite, wakafirayo.

³⁵ Jehoiakimu wakapa sirivha nomukore kunaFaro; asi wakabharisa chibharo munyika kuti aone mare yokupa kudai ngechironzo chaFaro. Wakatherisa chibharo chesirivha nomukore kuvanhu venyika, umwe ngaumwe kudai ngechibharo chake chaakaemeserwa, kuti achibhadhare kunaFaro Nekho.

Mambo Jehoiakimu weJudha

³⁶ Jehoiakimu waiya nemakore makumi mairi nemashanu apo paakatanga kutonga; naye wakatonga makore gumi narimwe muJerusarema. Zina ramai ake raizwi Zebhidha, mwanasikana waPhedhaia weRuma.

³⁷ Wakaita zvakashata mukuona kwaMambo Mwari, kudai ngezveshe zvakaita madzibaba ake.