2 Madzi. 2 - Bhaibheri Rakachena muChindau

Erija Unotorwa Kuenda kuDenga

¹ Zvino apo Mambo Mwari ooda kutora Erija kuenda mudenga ngechipupuri, Erija naErisha vaiya munjira kubva Girigari.

² Erija wakati kunaErisha, “Gara pano, ndinokupota; ngokuti Mambo Mwari wakandituma kuenda Bhetheri.” Asi Erisha wakati kwaari, “Kudai ngezvaanopona Mambo Mwari, newe wechipona pachako, andizokusii.” Ndizvo vakadzaka kuenda Bhetheri.

³ Vakororo vevaprofeti vaiya muBhetheri vakabuda kooshongana naErisha, vakati kwaari, “Unozia here kuti Mambo Mwari unozotora mambo wako kubva kwouri nyamashi?” Naye wakati, “Eya, ndinozia; nyararai.”

⁴ Erija wakati kwaari, “Erisha, gara pano, ndinokupota; ngokuti Mambo Mwari wakandituma Jerikho.” Asi wakati, “Kudai ngezvaanopona Mambo Mwari, newe wechipona pachako, andizokusii.” Ndizvo vakauya Jerikho.

⁵ Vakororo vevaprofeti vaiya muJerikho vakauya kooshongana naErisha, vakati kwaari, “Unozia here kuti Mambo Mwari unozotora mambo wako kubva kwouri nyamashi?” Naye wakati, “Eya, ndinozia; nyararai.”

⁶ Zvino Erija wakati kwaari, “Gara pano, ndinokupota; ngokuti Mambo Mwari wandituma Jorodhani.” Asi wakati, “Kudai ngezvaanopona Mambo Mwari, newe wechipona pachako, andizokusii.” Ndizvo vairi ava vakaenda mberi.

⁷ Vanhu makumi mashanu vevakororo vevaprofeti vakaendawo, vakaema kuretu kubva kwevari; veshe vaiya vakaema pasinde peJorodhani.

⁸ Zvino Erija wakatora bhachi rake, akaripeta, wakachaya mvura, nayo yakaparadzana ngepakati; ndizvo avo vairi vakaambuka pamavhu akaoma.

⁹ Naapo vaambuka, Erija wakati kunaErisha, “Kumbira icho chendingakuitira ndisati ndatorwa kubva kwouri.” Erisha wakati, “Ndinokupota, nditendere ndigare nhaka yechikoaniswa chomweya wako chiitwe kairi kwendiri.”

¹⁰ Wakapingura akati, “Wakumbira chiro chakakonza; asi kuti ukandiona apo ndootorwa kubva kwouri, kunozoitika kuda ngezvewakumbira; asi kuti ukasaandioni, azvizoitiki.”

¹¹ Zvino vachaangira kuhamba vechiereketa, ringira ngoro yomuriro nemahachi omuriro zvakavapaura ava vairi, zvikavaparadzanisa; Erija wakatorwa ngechipupuri kuenda mudenga.

¹² Erisha wakazviona, akaboorera echiti, “Baba angu, baba angu! Ngoro dzaIsuraeri nemahachi ayo.” Asi apo asikachamuoni, wakabata zvokufuka zvake, akazvibaura kuita zvigurwa zviiri.

¹³ Wakatora bhachi raErija rakawa kubva kwaari, wakapetuka, akaema pahumbikumbi yeJorodhani.

¹⁴ Wakatora bhachi raErija rakawa kubva kwaari, akachaya ndiro mvura echiti, “Uri pari Mambo Mwari, Mwari waErija?” Naapo achaya mvura, yakapaurana ngepakati kumarutii mairi, naErisha wakaambuka.

¹⁵ Naapo vakororo vevaprofeti avo vaiya Jerikho vakamuona ari kuretu, vakati, “Mweya waErija unogara padera paErisha.” Vakauya kooshongana naye, vakakotamira pashi pamberi pake.

¹⁶ Vakati kwaari, “Wona zvino, varipo varanda vako makumi mashanu vamuna vakagwinya; ngavaende, tinokupota, kuti vatsvake mambo wako; pamweni mweya waMambo Mwari wamutora, ukamurashira padera pomutunhu umweni, nokuti mubani rimweni.” Wakati, “Haiwa, musavatuma.”

¹⁷ Asi apo vakamupota metsa akaita zvidzu, wakati, “Vatumei.” Ndizvo vakatuma vamuna makumi mashanu; avo vakamutsvaka mazuva matatu, asi avazi kumuona.

¹⁸ Naapo vakapetuka kwaari (ngokuti waiya achagara muJerikho), wakati kwevari, “Andizi kumuronzera here kuti, ‘Musaenda?’ ”

Mishamiso yaErisha

¹⁹ Zvino vamuna vedhorobha vakati kunaErisha, “Ringira ndau yedhorobha yakanaka, kudai ngezvaanoona mambo wangu; asi mvura yakashata, nenyika aibereki zvakanaka.”

²⁰ Wakati, “Ndiunzirenyi chidziyo chitsva, muise munyu mukati mwacho.” Ndizvo vakachiunza kwaari.

²¹ Zvino wakabuda, akaenda kuchinyuka chemvura, akadururamwo munyu uwo, akati, “Unoronza izvi Mambo Mwari, ‘Ndanakisa iyi mvura; kubvira zvinopano akuchazobudimwozve kufa nokuti kusikabereka.’ ”

²² Ndizvo mvura yakanakiswa metsa nanyamashi, kudai ngeizwi raakaereketa Erisha.

²³ Wakakwira kubvapo kuenda Bhetheri; naapo achakwira ngenjira iyo, kwakabuda mudhorobha zvirumbwana zvimweni zvidoko, zvakamusheka zvechiti, “Hamba, nyamhanza! Hamba, nyamhanza!”

²⁴ Naapo wakakunukuka, akaringira kwevari, wakavatuka ngezina raMambo Mwari. Kwakabuda kubva mugwasha mabheya mairi echikadzi, akauraya zvirumbwana zvimweni makumi marongomuna nezviiri zvavo.

²⁵ Wakabva apo, akaenda kuMutunhu weKharmeri, zvino wakabvapo, akahwirira Samaria.