2 Madzi. 18 - Bhaibheri Rakachena muChindau

Hezekia Mambo waJudha

¹ Mugore rechitatu raHoshea mukororo waEra mambo waIsuraeri, Hezekia mukororo waAhazi mambo waJudha wakatanga kutonga.

² Wakatanga kutonga anemakore makumi mairi namashanu; wakatonga makore makumi mairi nemapfumbamwe muJerusarema. Zina ramai ake raizwi Abhi, mwanasikana waZekharia.

³ Wakaita izvo zvakanaka mukuona kwaMambo Mwari, kudai ngezvakaitwa ndibaba ake Dhavhidha.

⁴ Wakadusa ndau dzakakwirira, akaputsira pashi miedzaniso yokudira, nokutemera pashi gwasha. Wakaputsa kuita zvigurwa nyoka yethusi, yakanasirwa ndiMosi, ngokuti metsa pamazuva awo vana vaIsuraeri vaiya vechipishira mutombo unegwema rakanaka kweiri; wakaidudza kuti Nehushitani.

⁵ Hezekia wakagonda munaMambo Mwari, Mwari waIsuraeri; ndizvo kwaiya kusina naumwe ngesure wakadai ndiye pakati pemadzimambo eshe aJudha akateera sure kwake, nokuti pakati paavo veshe vakatanga pamberi pake.

⁶ Ngokuti wakabatirira kakurutu panaMambo Mwari; aazi kupauka kubva mukumuteera, asi wakangwarira mipango iyo yaakapanga Mambo Mwari kunaMosi.

⁷ Mambo Mwari waiya naye; wakabudirira kundau dzeshe dzaakaenda. Wakamukira mambo weAsiria, aazi kuchazomushandira.

⁸ Wakarwisa vaFiristia, metsa kuguma Gaza nenharaunda yaro, kubvira kurusvingo rwevarindi metsa kuguma kudhorobha rakashosherwa ngorukumbati.

⁹ Mugore rechirongomuna ramambo Hezekia, iro raiya gore rechinomwe raHoshea mukororo waEra mambo waIsuraeri, Sharimanesa mambo weAsiria wakauya koorwa neSamaria, akarikomba.

¹⁰ Pakupera kwemakore matatu vakarinyisa. Mugore rechitanhatu raHezekia, iro raiya raagore rechipfumbamwe raHoshea mambo waIsuraeri, Samaria rakatorwa.

¹¹ Mambo waAsiria wakatora vaIsuraeri kuenda navo Asiria, akavagarisa muHara, muHabhori pasinde perwizi runozwi Gozani, nomumadhorobha evaMedhia,

¹² ngokuti avazi kupurutana izwi raMambo Mwari, Mwari wavo, asi vakagura chitenderano chake, nazvo zveshe izvo zvaakapanga Mosi muranda waMambo Mwari; avazi kuzvipurutana nokuti kuzviita.

VaAsiria Vanotyisidzira Jerusarema

¹³ Mugore regumi nemarongomuna okutonga kwamambo Hezekia, Senakheribhi mambo weAsiria wakauya koorwa nemadhorobha eshe akashosherwa ngemarukumbati aJudha, naye akaanyisa.

¹⁴ Hezekia mambo waJudha wakatumira izwi kunamambo weAsiria muRakhishi echiti, “Ndakashaisha; ibva kwendiri; kunyazwi chiinyi chounozoronza kwendiri, ndinozochibhadhara.” Mambo weAsiria wakabhadharisa Hezekia mambo waJudha makhirogramu gumi rimwe emakumi emana (10,000) ezvigurwa zvesirivha negumi rimwe remazana (1,000) ezvigurwa zvomukore.

¹⁵ Hezekia wakamupa sirivha yeshe yakaoneka mumhatso yaMambo Mwari nomuupfumi hwemhatso yamambo.

¹⁶ Ngouwo mukuwo Hezekia wakadusa mukore weshe kubva kumisiwo yemhatso yaMambo Mwari, nokubva musika dzemisiwo dzaakaseta Hezekia mambo waJudha, akaupa kunamambo weAsiria.

¹⁷ Mambo weAsiria wakatuma Thartani, Rabhisarisi naRabhishake nehondo huru kubva Rakhishi kuenda kunamambo Hezekia koorwa muJerusarema. Naapo vaguma vakakwira, vakaema pasinde pemugero wedziya redera, mupato guru, rinoenda kumunda womusuki wezvokusimira.

¹⁸ Naapo vadaidza mambo, kwakabuda kwavari Eriakimu mukororo waHirikia, uwo waiya nduna yengome naShebhina munyori, naJoa mukororo waAsafi mungwariri wezvakanyorwa.

¹⁹ Rabhishake wakati kwevari, “Ronzai zvino kunaHezekia, kuti mambo mukuru, mambo weAsiria unoronza kudai, ‘Magondero ako ari pari ounogonda ndiwo?

²⁰ Iwewe unopinimidza kuti mazwi ega ndiwo mazano nesimba rokurwa hondo here? Zvino iwewe unogonda anani, zvewandimukira?’ ”

²¹ Ringira, unogonda Egipite mudondoro worutsanga rwakaguka, urwo runozobaya nyara yomunhu weshe unotseama kweruri. Ndizvo wakadaro Faro mambo weEgipite kwevari veshe vanomugonda.

²² Asi kuti mwechiti kwendiri, “Tinogonda kunaMambo Mwari, Mwari wedu, andiyepi here uwo waiya nendau dzakakwirira dzokudira nemaarita akaparadzwa ndiHezekia, echiti kunaJudha neJerusarema, ‘Munozodira pamberi pearita iri muJerusarema?’

²³ Uyai zvino, pikai mhiko kunamambo wangu weAsiria: Ndinozomupa makumi emazana mairi (2,000) emahachi kudai iwewe wechikona kupa vagadhi kwaari.

²⁴ Ungaita maitirenyi kuti unyise mukuru umwe wenduna pakati pevaranda vamambo wangu, wechigonda vaEgipite kukupa ngoro nevagadhi vemahachi?

²⁵ Inini ndauya here ndisina Mambo Mwari kooparadza iyi nyika? Mambo Mwari wakati kwendiri, ‘Kwira koorwa neiyi nyika, uiparadze.’ ”

²⁶ Zvino Eriakimu mukororo waHirikia, Shebhina naJoa vakati kunaRabhishake, “Ereketa kunevaranda vako ngorurumi rwechiAsiria, tinomupota, ngokuti tinoruzwa; musaereketa kwetiri ngorurumi rwevaJudha kuti vasazwa avo vanoema parukumbati.”

²⁷ Asi Rabhishake wakati kwevari, “Mambo wangu wakandituma here kuti ndierekete mazwi aya kunamambo wako nokwomuri? Aazi kundituma here kuneavo vanhu vanogara parukumbati, avo vakaemeserwa kuparadzwa pamwepo nemwi kuti vadye madisa avo nokumwa matundo avo?”

²⁸ Zvino Rabhishake wakaema, akadaidzira ngeizwi guru, ngorurumi rwevaJudha, akati, “Izwanyi imwimwi mazwi amambo mukuru, mambo weAsiria!

²⁹ Mambo unoronza izvi, musatendera Hezekia kuti amuchengedzere, ngokuti aana simba rokumununura kubva kunyara yangu.

³⁰ Musatendera Hezekia kuti amuite kuti mugonde Mambo Mwari, echiti, ‘Mambo Mwari ngegwinyiso unozotinunura nedhorobha iri arizowi munyara dzamambo waAsiria.

³¹ Musazopurutana kunaHezekia; ngokuti mambo weAsiria unoronza izvi, itai chitenderano neni, mubude kuuya kwendiri zvino umwe ngaumwe wenyu unozodya kubva kumuvhini wake, nomunhu weshe adye kumuonde wake, munhu weshe amwe mvura yechinyuka chake,

³² metsa ndiuye ndimutore kuenda kunyika imweni yakadai ngeyenyu, nyika inezviyo nevhini, nyika inechingwa neminda yemivhini, nyika yemafuta omuorivhi, neyeuchi, kuti mupone musafa.’ Musapurutana Hezekia apo echimupausa echiti, ‘Mambo Mwari unozotinunura.

³³ Chiripo here chimwe chezvimwari pakati pamadzinza chakanunura nyika yacho kubva kunamambo weAsiria?

³⁴ Zviri pari zvimwari zveHamathi nezveAriphadhi? Zviripari zvimwari zveSefarvhaimu, zveHena nezveIvha? Zvakanunura Samaria kubva kunyara yangu here?

³⁵ Ndiani pakati pezvimwari zveidzi nyika zvakanunura nyika dzazvo kubva kunyara yangu, zvomunopinimidza kuti Mambo Mwari unganunura Jerusarema kubva munyara yangu?’ ”

³⁶ Asi vanhu vakanyarara, avazi kupingura neizwi, ngokuti mupango wamambo wakati, “Musamupingura.”

³⁷ Zvino Eriakimu mukororo waHirikia, waiya mukuru wengome, naShebhina munyori, naJoa mukororo waAsafi mungwariri wezvakanyorwa, vakauya kunaHezekia vane machira avo akabaurwa, navo vakamuronzera mazwi aRabhishake.