2 Madzi. 16 - Bhaibheri Rakachena muChindau

Ahazi Mambo waJudha

¹ Mugore regumi nemanomwe raPheka mukororo waRemaria, Ahazi mukororo waJothamu mambo waJudha wakatanga kutonga.

² Ahazi waiya anemakore makumi mairi apo paakatanga kutonga; wakatonga makore gumi nematanhatu muJerusarema. Aazi kuita zvakanaka mukuona kwaMambo Mwari, Mwari wake, kudai ngezvakaitwa ndiDhavhidha baba ake,

³ asi wakahamba ngenjira yemadzimambo aIsuraeri. Wakatoitawo kuti mukororo wake apinde ngepakati pomuriro, kudai ngechinyangadzo chevasikatendi Mwari, avo vaakadzinga Mambo Mwari kubva pamberi pevana vaIsuraeri.

⁴ Wakapira minikero nokupisha mitombo inegwema rakanaka pandau dzakakwirira, nepadera pezvimitunhu, nepashi pemiti yeshe yakasvipira.

⁵ Zvino Rezini mambo weAramu, naPheka mukororo waRemaria mambo waIsuraeri vakakwira koorwa hondo neJerusarema; vakakomba Ahazi asi vakakorera kumunyisa.

⁶ Ngouwo mukuwo Rezini mambo weAramu wakatorazve Erathi ngokurwa nokuripetudza kuvaAramu, nokudzinga vaJudha kubva Erathi; nevaEdhomu vakauya koogara Erathi metsa nanyamashi.

⁷ Ahazi wakatuma nhumwa kunaThigirathiphiresa mambo weAsiria echiti, “Inini ndiri muranda wako nomukororo wako. Kwira undiponese kubva kunyara yamambo weAramu, nokunyara yamambo waIsuraeri, avo vanondirwisa.”

⁸ Ahazi wakatorawo sirivha nomukore zvakaoneka mumhatso yaMambo Mwari, noupfumi hwemhatso yamambo, wakazvitumira kuita chipo chamambo weAsiria.

⁹ Mambo weAsiria wakapurutana kwaari; mambo weAsiria wakaenda koorwisa Dhamasekusi, akarinyisa, akatora vanhu varo kooita hloko kudhorobha reKiri, akauraya Rezini.

¹⁰ Naapo mambo Ahazi paakaenda Dhamasekusi kooshongana naThigirathiphiresa mambo waAsiria, wakaona arita raiya muDhamasekusi. Mambo Ahazi wakatumira kunaUria mupristi chiemo chearita iro nechionero charo kudai ngomuakirwe waro.

¹¹ Uria mupristi wakaaka arita, echiteera zveshe zvakatumirwa ndimambo Ahazi kubva Dhamasekusi; ndizvo Uria mupristi wakapedza kuriaka kudaro, asati auya mambo Ahazi kubva Dhamasekusi.

¹² Naapo mambo auya kubva Dhamasekusi, wakaona arita. Zvino mambo wakakwedzera paarita, akakwira koopira midiro padera paro.

¹³ Naye wakapira mudiro wake wokupisha, nomudiro wezviyo, akadurura mudiro wokumwa, nokufafaza mudiro wengazi yokuiyanisa padera pearita.

¹⁴ Wakadusa arita rethusi, raiya pamberi paMambo Mwari, kubva pamberi pemhatso, kubva pandau iri pakati pearita rake nemhatso yaMambo Mwari, akariisa ngorutii rwedera rwearita rake.

¹⁵ Mambo Ahazi wakapanga Uria mupristi echiti, “Paarita guru unozopira mudiro wokupisha wemangwanani, nomudiro wokupisha wezviyo wemadeekoni, nomudiro wokupisha wamambo, nomudiro wake wezviyo, mudiro wokupisha wevanhu veshe vomunyika, nomudiro wavo wezviyo, nemidiro yavo yokumwa; nokufafaza padera paro yeshe ngazi yemidiro yokupisha, nengazi yeshe yemidiro inopirwa; asi arita rethusi rinozoita rangu rokubvunza ndiro.”

¹⁶ Uria mupristi wakaita zveshe zvaakapangwa ndimambo Ahazi.

¹⁷ Zvino mambo Ahazi wakagura sika kubva patsikiro, akadusa chidziyo chokushambiromwo; akadusa bhavhu kubva padera pekabi dzethusi, dzaiya pashi paro, akariisa padera petsikiro remapuwe.

¹⁸ Musiwo unedenga rakafukidzwa weSabatha, wevaiya vakaaka mungome, nomusiwo wokubanze wokupinda kwamambo, wakazvidusa kubva mumhatso yaMambo Mwari. Wakaita izvi ngendaa yamambo weAsiria.

¹⁹ Zvino mishando imweni yaAhazi yaakaita, aizi kunyorwa here muBhuku reMishando yeZuva ngeZuva yeMadzimambo aJudha?

²⁰ Ahazi wakaata nemadzibaba ake, naye wakaikwa nemadzibaba ake mudhorobha raDhavhidha. Hezekia mukororo wake wakatonga pandau yake.