2 Madzi. 13 - Bhaibheri Rakachena muChindau

Jehoahazi Mambo waIsuraeri

¹ Mugore remakumi mairi namatatu okutonga kwaJoashi mukororo waAhazia mambo waJudha, Jehoahazi mukororo waJehu wakatanga kutonga padera paIsuraeri muSamaria, naye wakatonga makore gumi nemanomwe.

² Wakaita zvakashata mukuona kwaMambo Mwari, akateera zvishaishi zvaJerobhoamu mukororo waNebhati, izvo zvaakaita ndizvo kuti vaIsuraeri vashaishe; aazi kupauka kubva kwezviri.

³ Noushungu hwaMambo Mwari hwakabaka kunevaIsuraeri, ndizvo wakavapira kakawanda munyara dzaHazaeri mambo weAramu, nomunyara dzaBhenihadhadhi mukororo waHazaeri.

⁴ Asi Jehoahazi wakapota Mambo Mwari, naMambo Mwari wakamuzwa; ngokuti wakaona kutambudzwa kwaIsuraeri, ngenjira iyo mambo weAramu yaakavatambudza ndiyo.

⁵ Ndizvo Mambo Mwari wakapa vaIsuraeri muponesi, ndizvo vakapokonyoka kubva munyara dzevaAramu; nevana vaIsuraeri vakagara mumatende avo kudai ngekaretu.

⁶ Zvakanyadaro avazi kusiya zvishaishi zvemhatso yaJerobhoamu, uwo wakaita kuti vaIsuraeri vashaishe, asi vakahamba mukati mwazvo; asi sika yokudira miedzaniso yakaramba irimwo muSamaria.

⁷ Ndizvo Jehoahazi wakasiiwa nehondo yevanhu vasikapindi makumi mashanu vagadhi vemahachi, nengoro gumi nevanohamba ngetsoka gumi remakumi emazana (10,000); ngokuti mambo weAramu waiya avaparadza, nokuvaita kudai ngemazungu epambuwa.

⁸ Zvino mishando imweni yaJehoahazi, nazvo zveshe zvaakaita, nesimba rake, azvizi kunyorwa here muBhuku reMishando yeZuva ngeZuva yeMadzimambo aIsuraeri?

⁹ Ndizvo Jehoahazi wakaata nemadzibaba ake, navo vakamuika muSamaria; zvino Joashi mukororo wake wakatonga pandau yake.

Jehoashi Mambo waIsuraeri

¹⁰ Mugore remakumi matatu nemanomwe rokutonga kwaJoashi mambo waJudha, Jehoashi mukororo waJehoahazi wakatanga kutonga padera paIsuraeri muSamaria; wakatonga makore gumi nematanhatu.

¹¹ Naye wakaita zvakashata mukuona kwaMambo Mwari; aazi kupauka kubva muzvishaishi zvaJerobhoamu mukororo waNebhati, izvo zvaakaita ndizvo kuti vaIsuraeri vashaishe, asi wakahamba mukati mwazvo.

¹² Zvino mishando imweni yaJoashi, nazvo zveshe zvaakaita, nesimba rake, raakarwa ndiro naAmazia mambo waJudha, azvizi kunyorwa here muBhuku reMishando yeZuva ngeZuva yeMadzimambo aIsuraeri?

¹³ Ndizvo Joashi wakaata nemadzibaba ake, naJerobhoamu wakagara padendemaro rake; Joashi wakaikwa muSamaria pamwepo nemadzimambo aIsuraeri.

Kufa kwaErisha

¹⁴ Zvino apo Erisha arwara ngenhenda iyo yaakafa ndiyo, Joashi mambo waIsuraeri wakadzaka kuuya kwaari, akachemera muhope mwake echiti, “A baba angu, baba angu! Ngoro dzeIsuraeri, nevagadhi vemahachi adzo.”

¹⁵ Erisha wakati kwaari, “Tora uta nemisee;” ndizvo wakatora uta nemisee.

¹⁶ Zvino wakati kunamambo waIsuraeri, “Kwanya uta;” naye wakahukwanya. Erisha wakaisa nyara dzake padera penyara dzamambo.

¹⁷ Zvino wakati, “Beura fasitera rokumabvazuva;” naye wakaribeura. Erisha wakati, “Fura.” Naye wakafura. Zvino wakati, “Musee waMambo Mwari wokunyisa, musee wokunyisa vaAramu! Ngokuti iwewe unozorwa nevaAramu muAfeki metsa uvapedze.”

¹⁸ Wakaangira echiti, “Tonhera misee iyo.” Naye wakaitonhera. Wakati kunamambo waIsuraeri, “Fura pamavhu ndiyo.” Wakafura katatu, akarekera.

¹⁹ Zvino munhu waMwari wakamutsenekera, akati, “Waisisira kudai wafura kashanu nokuti katanhatu; zvino waizodai wafura vaAramu metsa uvapedze; asi zvino unozofura vaAramu katatu kega.”

²⁰ Ndizvo Erisha wakafa, navo vakamuika. Zvino zvikwata zvevaMoabhi zvaiuya koochakata nyika gore ngegore pachirimo.

²¹ Naapo munhu echiikwa, vakaona chikwata chevanhu; navo vakakandira muiri womunhu uwo muiba raErisha. Naapo uwo munhu akandirwa paakagwama magodo aErisha, wakamukazve akaema ngetsoka dzake.

Hondo pakati peVaIsuraeri naVaAramu

²² Zvino Hazaeri mambo weAramu wakatambudza Isuraeri mazuva eshe okupona kwaJehoahazi.

²³ Asi Mambo Mwari wakavaitira nyasha, wakavazwira urombo; akakunukukira kwevari, ngendaa yechitenderano chake naAbrahama, Isaka naJakobe, naye aazi kuvaparadza, nokuti kuvarasha ngouwo mukuwo kubva kuhope yake metsa nyamashi.

²⁴ Naapo Hazaeri mambo weAramu afa, Bhenihadhadhi mukororo wake wakatonga pandau yake.

²⁵ Zvino Jehoashi mukororo waJehoahazi wakatorazve madhorobha kubva kunaBhenihadhadhi mukororo waHazaeri, awo aakatora kubva kunaJehoahazi baba ake muhondo. Katatu Joashi wakamunyisa, akatorazve madhorobha aIsuraeri.