2 Madzi. 11 - Bhaibheri Rakachena muChindau

Mambokadzi Atharia waJudha

¹ Zvino Atharia mai aAhazia aona kuti mukororo wake wafa, wakamiruka akaparadza veshe vemhuri youmambo.

² Asi Jehoshebha, mwanasikana wamambo Joramu nehanzvadzi yaAhazia, akamutora Joashi mukororo waAhazia, wakamutora kubva pakati pevakororo vamambo avo vaiya vechida kuurawa; wakamufisha iye nomungwariri wake mukamera rokuata. Ndizvo wakamufisha kubva kunaAtharia, ndizvo aazi kuurawa.

³ Wakagara naye akafishwa mumhatso yaMambo Mwari makore matanhatu, naapo Atharia echitonga padera penyika.

⁴ Asi mugore rechinomwe, Jehoiadha wakatuma akadaidza nduna dzemazana, pamwepo nenduna dzevarindi, wakavaunza kwaari mumhatso yaMambo Mwari. Akaita chitenderano navo, akavapikisa mhiko mumhatso yaMambo Mwari; zvino akavapangidzira mukororo wamambo.

⁵ Wakavapanga echiti, “Izvi ndizvo zvomunozoita: Rupande rwenyu rumwe rwechitatu, avo vanopinda mushando ngezuva reSabatha, vanozoita vangwariri vemhatso yamambo;

⁶ rupande rwenyu rumweni rwechitatu runozongwarira pamusiwo unozwi Suri; norupande rwenyu rumweni rwechitatu runozongwarira pamusiwo uri ngesure kwevangwariri, munozongwarira ngome;

⁷ nemarupande mairi enyu eavo vanopinda pamushando ngezuva reSabatha, avo navo vanozongwarira mhatso yaMambo Mwari apo panamambo.

⁸ Munozotendenedza mambo, munhu weshe anechokurwa ndicho chake munyara yake; kunyazwi ndiani unozokwedzera pasinde ngaaurawe. Munozoapo panamambo mukubuda kwake nokuti kupotera kwake.”

⁹ Nduna dzemazana dzakaita zveshe zvevakapangwa ndiJehoiadha mupristi; umwe ngaumwe wakaunza vanhu vake vamuna avo vakaemeserwa kubuda ngeSabatha, neavo vakaemeserwa kupotera pamushando ngezuva reSabatha, vakauya kunaJehoiadha mupristi.

¹⁰ Mupristi wakapa kunenduna dzemazana mikhondo nezvihlangu zvaDhavhidha mambo zvaiya mutemperi raMambo Mwari.

¹¹ Vangwariri vakaema munhu weshe anezvokurwa ndizvo munyara yake, vakatendenedza mambo, kubvira ngokubani kwemhatso metsa ngedera kwemhatso, kutendenedza arita nemhatso, kungwarira mambo kumarupande eshe.

¹² Zvino wakabudisa mukororo wamambo, akaisa dzungudza pasoro rake, akamupa chitenderano; vakadaidzira vechiti ndiye mambo, vakamudzodza; vakaembera nyara dzavo, vakadaidzira vechiti, “Mambo ngaapone mhera nariini!”

¹³ Naapo Atharia azwa bope revangwariri nerevanhu, wakauya kunevanhu mumhatso yaMambo Mwari;

¹⁴ naapo paakaringira, wakaona mambo akaema pasinde pesika, kudai ngomuitiro wavo, nenduna nevaridzi vemagwama vaiya pasinde pamambo, nevanhu veshe venyika vechidakara, vechiridza hwama. Atharia wakabaura zvokufuka zvake, akadaidzira echiti, “Ndamukirwa! Ndamukirwa!”

¹⁵ Zvino Jehoiadha mupristi wakapanga vatongi vezana nenduna dzehondo, echiti kwevari, “Mubudisenyi kubanze kubva pakati pemisara yevarindi, muuraye ngeshoti weshe uwo unomuteera.” Ngokuti mupristi wakaronza kuti, “Musatendera kuti aurairwe mumhatso yaMambo Mwari.”

¹⁶ Navo vakamubata ngenyara dzavo; wakaenda ngenjira yaanopinda ndiyo mahachi echiuya kumhatso yamambo, naapo wakaurawapo.

Jehoiadha Unomusirira

¹⁷ Jehoiadha wakaita chitenderano pakati paMambo Mwari namambo nevanhu, kuti vanosisira kuita vanhu vaMambo Mwari; nepakatizve pamambo nevanhu.

¹⁸ Zvino veshe vanhu venyika vakaenda mumhatso yaBhaari, vakaipwanyira pashi; maarita ake nemiedzaniso yake vakazviputsa kuita zvigurwa, vakauraya Mathani mupristi waBhaari pamberi pamaarita. Mupristi wakaemesa vangwariri padera pemhatso yaMambo Mwari.

¹⁹ Wakatora nduna huru dzemazana, nenduna dzeshe, vangwariri, nevanhu veshe venyika; zvino vakadzasa mambo kubva kumhatso yaMambo Mwari, vechihamba ngenjira yepamusiwo wevangwariri kuguma kumhatso yamambo. Mambo wakagara padendemaro remadzimambo.

²⁰ Ndizvo vanhu veshe venyika vakadakara, nedhorobha raiya nokunyarara, ngesure kwokuurayiwa kwaAtharia ngeshoti pasinde pemhatso yamambo.

²¹ Jehoashi waiya nemakore manomwe apo akaamba kutonga.