2 Madzi. 10 - Bhaibheri Rakachena muChindau

Mibarirwana yaAhabhi Inourawa

¹ Zvino Ahabhi waiya nevakororo makumi manomwe muSamaria. Ndizvo Jehu wakanyora tsamba, akadzitumira Samaria, kuvatongi veJezireeri, kuvakuru, nokuneavo vakarera vana vaAhabhi echiti,

² “Zvino ngokukasira apo tsamba iyi yaguma kwomuri, kudai ngezvomunoona kuti vakororo vamambo vanemwi, nemwi munengoro nemahachi, nedhorobha rakashosherwa, nezvokurwa ndizvo,

³ tsanangurai pakati pevakororo vamambo wako uwo wakapinda kunaka, mumuemese padendemaro rababa ake, murwire mhatso yamambo wenyu.”

⁴ Asi vakatya kakurutu, vakati, “Ringira, madzimambo mairi vasaikona kuemesedzana naye; zvino isusu tingazoemesedzana ngenjiranyi naye?”

⁵ Ndizvo mungwariri wengome, nouwo waitonga dhorobha, vakuru, nevareri vevana, vakatumira izwi kunaJehu vechiti, “Isusu tiri varanda vako; zveshe zvounozoronza tinozozviita. Atizoemesi munhu naumwe kuita mambo; ita icho chounoona chakanaka mukuona kwako.”

⁶ Zvino wakavanyorera tsamba ngokwechipiri echiti, “Kudai muri vangu, nokudai mwechizopurutana izwi rangu, torai masoro evakororo vamambo wenyu, muuye kwendiri uno Jezireeri ngenguva iyi mangwani.” Zvino vakororo vamambo, vanhu makumi manomwe, vaigara nevakuru vedhorobha, avo vakavarera.

⁷ Naapo tsamba yaguma kwevari, vakatora vakororo vamambo, vakavauraya vanhu makumi manomwe; vakaisa masoro avo muzvitundu, vakaatumira kwaari muJezireeri.

⁸ Naapo nhumwa yakauya kwaari yechiti, “Vaunza masoro evakororo vamambo,” wakati kwevari, “Aunganidzenyi kuti aite mirwi miiri apo pokupinda pamusiwo wedhorobha metsa mangwani mangwanani.”

⁹ Zvino mangwani mangwanani apo paakabuda, wakaema, akati kuvanhu veshe, “Imwimwi amuna ndaa. Ringirai, ndini inini ndakamukira mambo wangu, ndikamuuraya; asi ndiani wakauraya ava veshe?

¹⁰ Zvino ziai kuti arizowi pashi narimwe reizwi raMambo Mwari raakaereketa ngendaa yemhatso yaAhabhi; ngokuti Mambo Mwari waita icho chaakaereketa kubudikidza ngomuranda wake Erija.”

¹¹ Ndizvo Jehu wakauraya veshe vakasara vemhatso yaAhabhi muJezireeri, vakuru vake veshe, vangani vake, nevapristi vake, metsa pasisina naumwe unopona.

Hama dzaMambo Ahazia Dzinourawa

¹² Zvino wakamiruka akaenda, akaguma Samaria. Munjira, apo aguma paBhethiekedhi reVaushi,

¹³ Jehu wakashongana nehama dzaAhazia mambo waJudha, akati, “Ndimwi vanaani imwimwi?” Vakapingura, vakati, “Tiri hama dzaAhazia; nesu tinodzaka koochingamidza vakororo vamambo nevakororo vamai amambokadzi.”

¹⁴ Wakati, “Vatorenyi vechipona.” Vakavatora vechipona, vakavauraira parindi reBhethiekedhi, vamuna makumi marongomuna nevairi veshe pamwepo; apana naumwe wavo waakasiya echipona.

Hama dzaAhabhi Dzakasara Dzinourawa Dzeshe

¹⁵ Naapo abva apo, wakashongana naJehonadhabhi mukororo waRekhabhi, echiuya kooshongana naye; wakamuchingamidza, echiti kwaari, “Mwoyo wako wakanaka here kunewangu kudai ngomwoyo wangu wakanaka kunomwoyo wako?” Jehonadhabhi wakapingura echiti, “Eya, wakanaka.” Jehu wakati, “Kuti zvakadaro, ngatibatane nyara.” Ndizvo wakatambanudza nyara yake, vakabatana; Jehu wakamukwidza mungoro.

¹⁶ Wakati, “Uya kwendiri, uone kutsamwirira kwangu ngendaa yaMambo Mwari.” Ndizvo wakamuita kuti ahambe naye mungoro yake.

¹⁷ Naapo aguma Samaria, wakauraya veshe vakasara vaAhabhi vaiya muSamaria, metsa apedza veshe, kudai ngokuronza kweizwi raMambo Mwari raakaereketa kubudikidza ndiErija.

Vadiri vaBhaari Vanourawa

¹⁸ Zvino Jehu wakaunganidza vanhu veshe pamwepo, akati kwevari, “Ahabhi wakashandira Bhaari padoko; asi Jehu unozomushandira kakurutu kumupinda.

¹⁹ Ndizvo zvino, ndidaidzirenyi vaprofeti veshe vaBhaari, vadiri vake veshe, nevapristi vake veshe; kusasara naumwe, ngokuti ndinomudiro mukuru wokupira kunaBhaari; kunyazwi ndiani unotamikapo aazoponi.” Asi Jehu wakazviita ngourimbwi, kuti auraye vaidira Bhaari.

²⁰ Jehu wakati, “Emesai mushongano mukuru waBhaari.” Ndizvo vakaudaidzira.

²¹ Jehu wakatumira izwi kunyika dzeshe dzaIsuraeri; vadiri veshe vaBhaari vakauya, akuna naumwe wakasara usikazi kuuya. Navo vakapotera mumhatso yaBhaari; nemhatso yakazara kubva kurutii kuguma kurutii ikati penu.

²² Wakati kunowaingwarira kamera remachira okusimira, “Unza machira okusimira kuvadiri veshe vaBhaari.” Ndizvo wakavaunzira zvokusimira.

²³ Zvino Jehu wakapotera mumhatso yokudira Bhaari naJehonadhabhi mukororo waRekhabhi; wakati kuvadiri vaBhaari, “Tsvakisisai muone kuti akuna here vadiri vaMambo Mwari muno pakati penyu, asi vadiri vaBhaari vega.”

²⁴ Zvino vakapotera mukati kuti vapire minikero nemidiro yokupisha. Zvino Jehu wakaemesa ngokubanze vamuna makumi masere, akati, “Kunyazwi ndiani unozorekera umwe weava vanhu vendakaisa munyara dzenyu echipokonyoka, uwo unomupokonyosa, kupona kwake kunozoparadzwa pandau youwo wakapokonyoka.”

²⁵ Paakandopedzapo kupira mudiro wokupisha, Jehu wakati kuvarindi nokunduna, “Pindaimwo muvauraye; musarekera naumwe echipokonyoka.” Navo vakavauraya ngokupinza kweshoti; nevarindi nenduna dzakavakandira kubanze, navo vakaenda mudhorobha remhatso yaBhaari.

²⁶ Vakabudisa sika kubva kumhatso yaBhaari, vakaipisha.

²⁷ Navo vakaputsaputsa sika yaBhaari, vakapwanyira pashi mhatso yaBhaari, vakaiita chimbuzi metsa nanyamashi.

²⁸ Ndiyo njira iyi Jehu yaakaparadza ndiyo Bhaari kubva munyika yeshe yaIsuraeri.

²⁹ Asi Jehu aazi kupauka kubva kuzvishaishi zvaJerobhoamu mukororo waNebhati, uwo wakaita kuti vaIsuraeri vashaishe, ngokudira miedzaniso yemakonyana omukore yaiya muBhetheri nomuDhani.

³⁰ Mambo Mwari wakati kunaJehu, “Ngokuti wakaita izvi zvakanaka mukuona kwangu, izvo zveshe zvaiya mumwoyo mwangu, zvewakaitira mhatso yaAhabhi, vakororo vako metsa kumubarirwana wechirongomuna vanozogara padendemaro raIsuraeri.”

³¹ Asi Jehu aazi kuita wakangwara mukuteera muzvironzo zvaMambo Mwari, Mwari waIsuraeri, ngomwoyo wake weshe. Aazi kusiya zvishaishi zvaJerobhoamu, uwo wakaita kuti vaIsuraeri vashaishe.

Kufa kwaJehu

³² Ngaawo mazuva Mambo Mwari wakaamba kugura kutsonza nyika yaIsuraeri. Hazaeri wakavanyisa munyika yeshe yaIsuraeri,

³³ kubvira Jorodhani ngokumabvazuva nenyika yeshe yeGireadhi, vaGadhi, vaRubheni, vaManase, kubvira Aroeri, riri pasinde perwizi unozwi Arinoni, ndiro Gireadhi naBhashani.

³⁴ Zvino mishando imweni yaJehu, nazvo zveshe zvaakaita, nesimba rake reshe, azvizi kunyorwa here muBhuku reMishando yeZuva ngeZuva yeMadzimambo aIsuraeri?

³⁵ Ndizvo Jehu wakaata nemadzibaba ake, navo vakamuika muSamaria. Jehoahazi mukororo wake wakatonga pandau yake.

³⁶ Nguva yaakatonga Jehu padera peIsuraeri muSamaria yakaita makore makumi mairi namasere.