2 Madzi. 1 - Bhaibheri Rakachena muChindau

Erija naMambo Ahazia

¹ Ngesure kwokufa kwaAhabhi, Moabhi wakamukira Isuraeri.

² Ahazia wakawa pashi ngepafasitera kubva mukamera rake repadera muSamaria, akaata pashi ngokukuwara; wakatuma nhumwa akati kwedziri, “Endai, mubvunze kunaBhaarizebhubhi chimwari cheEkironi kuti, ‘Ndinozopona here kukuwara uku?’ ”

³ Asi ngirosi yaMambo Mwari yakati kunaErija muThishibhe, “Miruka ukwire, ushongane nenhumwa dzamambo weSamaria, uti kwedziri, ‘Ngokuti akuna Mwari muIsuraeri here, hemwoenda koobvunza kunaBhaarizebhubhi chimwari chevaEkironi?’

⁴ Ndizvo zvino zvaanoronza Mambo Mwari, ‘Iwewe auzobvi pamubhedhi wako wewakakwira kwouri, asi ngegwinyiso unozofa.’ ” Ndizvo Erija wakaenda.

⁵ Nhumwa dzakapetuka kunamambo, uwo wakati kwedziri, “Mwapetuka ngenyi?”

⁶ Dzakati kwaari, “Kwakauya munhu kushongana nesu, akati kwetiri, ‘Endai muhwirire kunamambo uwo wakamutuma, muti kwaari, unoronza izvi Mambo Mwari: Ngokuti akuna Mwari muIsuraeri here, hemunotuma koobvunza kunaBhaarizebhubhi chimwari cheEkironi? Ndizvo auzodzaki kubva pamubhedhi wewakakwira kwouri, asi ngegwinyiso unozofa.’ ”

⁷ Wakati kwedziri, “Waiya munhu wakaitawani wakauya kooshongana nemwi nokumuronzera zviro izvi?”

⁸ Navo vakamupingura vechiti, “Waiya munhu unechokufuka chinemviri, akasunga bhande reganda muchiunu chake.” Naye wakati, “NdiErija muThishibhe.”

⁹ Zvino mambo wakatuma nduna yemakumi mashanu, nevanhu vake makumi mashanu. Yakakwira kuenda kunaErija, uwo waiya akagara padera pomutunhu. Yakaereketa kwaari, “Iwewe munhu waMwari, mambo unoti, ‘Dzaka.’ ”

¹⁰ Asi Erija wakapingura, echiti kunenduna yemakumi mashanu, “Kudai ndiri munhu waMwari, ngaudzake muriro kubva mudenga ukuuraye iwewe nevanhu vako makumi mashanu.” Zvino muriro wakadzaka wechibva mudenga, ukauraya nduna nevanhu vayo makumi mashanu.

¹¹ Zve, mambo wakatuma kwaari nduna imweni nevanhu vayo makumi mashanu. Yakakwira nayo ikati kwaari, “A, munhu waMwari, unopanga izvi mambo, ‘Kasira udzake.’ ”

¹² Asi Erija wakavapingura, akati kwevari, “Kudai ndiri munhu waMwari, muriro ngaudzake kubva mudenga ukuuraye iwewe nevanhu vako makumi mashanu.” Zvino muriro waMwari wakadzaka wechibva mudenga, ukauraya nduna nevanhu vayo makumi mashanu.

¹³ Mambo wakatumazve ngokwechitatu nduna nevanhu vayo makumi mashanu. Ndizvo nduna yechitatu yemakumi mashanu yakakwira, yakawa ngemabvi ayo pamberi paErija, yakakumbira kwaari yechiti, “A, munhu waMwari, ndinokupota kuti kupona kwangu, nokweava makumi mashanu kuoneke kunemutengo mukuru mukuona kwako.

¹⁴ Ringira, muriro wakadzaka wechibva mudenga, ukauraya nduna mbiri nevanhu vadzo nemakumi mashanu avo vokutanga; asi zvino kupona kwangu ngakuoneke kwouri kunomutengo mukuru mukuona kwako.”

¹⁵ Ngirosi yaMambo Mwari yakati kunaErija, “Dzaka naye; usamutya.” Ndizvo wakamiruka, wakadzaka naye kunamambo,

¹⁶ naye wakati kwaari, “Unoronza izvi Mambo Mwari: Ngokuti wakatuma nhumwa koobvunza kunaBhaarizebhubhi chimwari chaEkironi, ngokuti akuna Mwari muIsuraeri here wokuti ubvunze izwi rake? Ndizvo auzodzaki kubva pamubhedhi wewakakwira kwouri, asi ngegwinyiso unozofa.”

¹⁷ Ndizvo wakafa kudai ngezvarakaronza izwi raMambo Mwari raakaereketa Erija. Jehoramu wakatonga pandau yake ngegore rechipiri raJehoramu mukororo waJehoshafati mambo waJudha, ngokuti Ahazia waiya asina mukororo.

¹⁸ Zvino mishando imweni yaAhazia yaakaita, aizi kunyorwa here muBhuku reMishando yeZuva ngeZuva yeMadzimambo aIsuraeri?