1 VaTes. 5 - Bhaibheri Rakachena muChindau

Garai Mwakanasirira Kuuya kwaMambo

¹ Asi ngendaa yenguva nemikuwo, hama, amutami kunyorerwa ndizvo,

² ngokuti imwimwi mwemene munonasa kuzia kuti zuva raMambo rinoguma kudai ngembavha inoguma usiku.

³ Naapo vanozoti, “Kuripo kunyarara nokungwaririka,” zvino ngokukasira kuparadzwa kuchauya padera pavo, kudai ngokurwadziwa kunouya padera pomudzimai wosununguka, apana unozopokonyoka!

⁴ Asi imwimwi, hama, amuri muchidimapi, kuti iro zuva rimugumire kudai ngembavha;

⁵ ngokuti imwimwi mweshe muri vana vokujeka nevemasikati; atisiri vousiku akadi nokuti vechidima.

⁶ Ndizvo zvino tisaata, kudai ngezvevanoita vamweni, asi ngatirambe techirinda, tingware;

⁷ ngokuti avo vanoata, vanoata usiku, naavo vanoradza, vanoradza usiku.

⁸ Asi isusu tiri vemasikati ngatingware, takapfeka chihlangu chepaditi chokugonda norudo, nechiqoko kuita gonda roruponeso.

⁹ Ngokuti Mwari aazi kutiemesera ushungu, asi kuti tione kuponeswa kubudikidza ndiye Mambo wedu Jesu Kristu,

¹⁰ uwo wakatifira kuti kunyazwi tichazwa nokuti taata, tipone pamwepo naye.

¹¹ Ndizvo embedzeranai umwe kunoumweni, muakane umwe kunoumweni, kudai ngezvomunoita.

Kupanga kwoKugumisira noKuvhaisa

¹² Asi tinomupota, hama, kuti muremeredze avo vanoshanda pakati penyu, vanomutungamirira munaMambo, vanomupanga;

¹³ muvaremeredze kakurutu murudo ngendaa yomushando wavo. Itai vanokunyarara pakati penyu.

¹⁴ Tinomupota, hama, pangai avo vane nungo, gwinyisai avo vane mwoyo inodemera, detserai avo vakarembedzeka, sengererai kwavari veshe.

¹⁵ Ngwarai kuti pasazoapo naumwe unounzidzira zvakashata kumunhu ngendaa yezvakashata, asi ngenguva dzeshe tsvakai kuita zvakanaka, umwe kwoumweni nokwavari veshe.

¹⁶ Dakarai nguva dzeshe,

¹⁷ kumbirai ngokusikareki,

¹⁸ bongai pazviro zveshe; ngokuti ichi chiri kuda kwaMwari muna Kristu Jesu ndimwi.

¹⁹ Musadzima Mweya.

²⁰ Musashoora mazwi akaprofetwa,

²¹ asi edzai zviro zveshe; batisisai izvo zvakanaka;

²² taraukirai miemo yezveshe zvakashata.

²³ Mwari wokunyarara emene ngaamuchenese kakurutu; mweya wenyu nomwoyo nomuiri ngazvingwarirwe kakurutu, zvisina ndaa pakuuya kwaMambo wedu Jesu Kristu.

²⁴ Uwo unomudaidza unogondeka, naye unozozviita.

²⁵ Hama, tikumbirirei.

²⁶ Chingamidzai veshe vatendi ngomuromo ngokucheneswa.

²⁷ Ndinomupanga kakurutu ndiMambo kuti iyi tsamba idzidzwe kuhama dzeshe.

²⁸ Nyasha dzaMambo wedu Jesu Kristu ngadzigare nemwi.