1 VaTes. 4 - Bhaibheri Rakachena muChindau

Ndaramo Inodakadza Mwari

¹ Ndizvo pakugumisira, hama, tinomukumbira nokumupota munaMambo Jesu kuti, kudai ngezvemwakaashira kwetiri njira inosisira yokuhamba ndiyo nokumudakadza Mwari, kudai ngezvomunohamba, kuti muwanze kudaro.

² Ngokuti munozia kupanga kwetakamupanga kubudikidza ndiMambo Jesu.

³ Ngokuti uku ndikwo kuda kwaMwari, kucheneswa kwenyu; kuti murekere kuomba;

⁴ kuti umwe ngaumwe wenyu azie njira yokudzitorera mukadzi pachake mukucheneswa nomukuremeredza,

⁵ haiwa ngokuemura kwakashata, kudai ngevemadzinza vasikamuzii Mwari;

⁶ kuti kusaapo naumwe unopauka nokushaishira hama yake ngeiyi ndaa, ngokuti Mambo ndiye muunzidziri weizvi zveshe, kudai ngezvetakambomuronzera nokupupura kudaro.

⁷ Ngokuti Mwari aazi kutidaidzira kunezvisikazi kusukika, asi mune zvakacheneswa.

⁸ Ndizvo kunyazwi ndiani unoramba izvi, aarambi munhu akadi, asi unoramba Mwari, uwo unopa kwomuri Mweya wake Wakachena.

⁹ Asi ngendaa yorudo pakati pehama amutami kuti munhu amunyorere, ngokuti imwimwi mwemene mwakadzidziswa ndiMwari kuti mudane umwe kunoumweni;

¹⁰ ngegwinyiso munodzida hama dzeshe dziri muMasedonia mweshe. Asi tinomupanga, hama, kuti muwanze nokuwanzisisa,

¹¹ kuti muedze kugara ngokunyarara nokubatika ngemishando yenyu yega nokushanda ngenyara dzenyu, kudai ngezvetakamupanga,

¹² kuti muhambe ngenjira inosisira pamberi pevari kubanze, musina chomunotama.

Kuuya kwaMambo

¹³ Asi atidi kuti muite vasikazii, hama, ngendaa yaavo vakaata, kuti musazotambudzika kudai ngavamweni vasina gonda.

¹⁴ Ngokuti kudai techitenda kuti Jesu wakafa nokumukazve, zvakanyadaro kubudikidza ndiJesu, Mwari unozovaunza pamwepo naye avo vakaata.

¹⁵ Ngokuti tinoronza izvi kwomuri ngeizwi raMambo, kuti isusu tichapona, tasara metsa kuuya kwaMambo, atitongozotangiri avo vakaata.

¹⁶ Ngokuti Mambo pachake unozodzaka kubva mudenga ngokudaidzira ngeizwi rengirosi huru nokuridzwa kwegwama raMwari, nevakafa vari munaKristu vanozotanga kumuka.

¹⁷ Zvino isusu tichapona tasara, tinozotorwa pamwepo navo mumakore kooshongana naMambo mudenga. Ngokudaro tinozogara naMambo mhera nariini.

¹⁸ Ndizvo embedzeranai ngamazwi aya.