1 VaTes. 3 - Bhaibheri Rakachena muChindau

¹ Ndizvo apo takakorera kushingirira, takapinimidza kuti kwakanaka kuti tisiiwe sure tega muAtenesi;

² nesu takatuma Thimothi, hama yedu nomushandi waMwari muvhangeri raKristu, kuti amugwinyise nokumuembedzera mukutenda kwenyu,

³ kuti asazoapo munhu unokutukuswa ngemadambudziko aya. Ngegwinyiso imwimwi mwemene munozia kuti izvi ndizvo zvetakaemeserwa.

⁴ Ngokuti ngegwinyiso, apo petaiya nemwi, takambomuronzera kuti tinozorwadziwa ngokutambudzwa; kudai ngezvakaitika, kudai ngezvomunozia.

⁵ Ngeiyi ndaa ininiwo apo ndakakorera kushingirira, ndakatumira kuti ndizie ngendaa yokutenda kwenyu, ndechitya kuti pamweni muedzi waiya amuedza nomushando wedu waizoita usina shwiro.

Mushumo waThimothi Unogwinyisa

⁶ Asi zvino Thimothi apetuka kwetiri kubva kwomuri, wakatiunzira mashoko anodakadza okutenda kwenyu norudo rwenyu. Wakatironzerawo kuti munonasa kupinimidza tisu ngenguva dzeshe, mwechishuwira kutiona, kudai tisuwo tinoshuwira kumuona.

⁷ Ngeiyi ndaa, hama, takagwinyiswa ndimwi mukutama kwedu kweshe nokutambudzika kubudikidza ngokugonda kwenyu.

⁸ Ngokuti zvino tinopona, kudai imwimwi mwechiangira kuema mwakagwinya munaMambo.

⁹ Ngokuti tingaita mabongerenyi kuna Mwari ndimwi, ngendaa yokudakara kweshe kwetinodakara ndikwo ngendaa yenyu pamberi paMwari wedu?

¹⁰ Tinokumbira kakurutu usiku nemasikati kuti tione hope dzenyu nokuzadzisa kunyazwi ngechiri chinotamika mukugonda kwenyu.

¹¹ Zvino Mwari wedu naBaba emene naMambo wedu Jesu ngaatungamirire njira yedu kwomuri.

¹² NaMambo ngaaite kuti muwande nokuwanza rudo pakati penyu umwe kunoumweni nokunevanhu veshe, kudai ngezvetinoitawo isusu kwomuri,

¹³ kuti iye agwinyise mwoyo yenyu mukucheneswa kuti muite vasina ndaa pamberi paMwari wedu naBaba, pakuuya kwaMambo wedu Jesu pamwepo nevakacheneswa vake veshe.