1 VaTes. 2 - Bhaibheri Rakachena muChindau

Mushando waPhauri muThesaronika

¹ Ngokuti imwimwi mwemene munozia, hama, kuti kuuya kwedu kwomuri akuzi kuita kusina shwiro,

² asi kunyazwi takatambudzika pakutanga nokuitirwa zvinotsverudza muFiripi, kudai ngezvomunozia, takatsunga munaMwari wedu kuereketa kwomuri vhangeri raMwari ngokutambudzika kukurutu.

³ Ngokuti kupota kwedu akuzi kubva mukupauka akadi nokuti mukusikasukika nokuti mukuchengedzera,

⁴ asi kudai ngezvetakatendwa ndiMwari kuti tigondwe ngevhangeri, ndizvo tinoereketa, haiwa kudakadza vanhu, asi Mwari uwo unoedza mwoyo yedu.

⁵ Ngokuti munonasa kuzia, naMwari ndiye chapupu chedu, atizi kuoneka kunyazwi ngouri mukuwo techironza mazwi ourimbwi, kudai ngezvomunozia, nokuti zano rokuemura pfuma;

⁶ tisikatsvaki kuirikidzwa ngevanhu, nokuti kunobva kwomuri nokuti kunobva kunevamweni,

⁷ kunyazwi taikona kuita mutwaro kwomuri, kudai ngevapostori vaKristu. Asi taiya takapfaa pakati penyu, kudai ngezvaanoita mureri apo echirera vana vake.

⁸ Ndizvo techimudisisa taida kukoverana nemwi haiwa vhangeri raMwari rega, asi nokupona kwedu kwemene, ngokuti imwimwi mwakaita vanopinda kudikanwa kakurutu kwetiri.

⁹ Ngokuti munokarakadza kushanda kwedu nokurwadziwa hama; takashanda usiku nemasikati, kuti tisazoita mutwaro kunoumwe wenyu, apo petakachumaira kwomuri vhangeri raMwari.

¹⁰ Imwimwi muri zvapupu, naMwariwo, ngokucheneswa nokurungama nokusikaitirwa ndaa kwakaitawani kwetakaita kwomuri imwimwi vatendi;

¹¹ kudai ngezvomunozia njira yetakaita kunoumwe ngaumwe wenyu, kudai ndibaba vanoitira kunevana vavo,

¹² techimupanga nokumugwinyisa nokupupura, kuti muhambe kudai ngezvinosisira kuna Mwari, uwo unomudaidza kuumambo hwake hwemene nouthende.

¹³ Isusuwo tinoangira kubonga Mwari ngeizvi, kuti apo pemwakaashira izwi raMwari iro remwakazwa kubva kwetiri, mwakariashira haiwa kudai ngeizwi revanhu, asi kudai ngezveriri gwinyiso, izwi raMwari, iro rinoshandawo mukati mwenyu imwimwi vatendi.

¹⁴ Ngokuti imwimwi, hama, mwakaita vaedzereri vezviara zvaMwari munaKristu Jesu izvo zviri muJudhiya, ngokuti mwakatambudzwawo ngezviro zvakatodzana ngevanhu venyika yenyu kudai ngezvevakatambudzwa avo ngevaJudha,

¹⁵ avo vakauraya veshe Mambo Jesu nevaprofeti, vakatidzinga, vasikadakadzi Mwari, vari vanorwisana nevanhu veshe,

¹⁶ vechitirambidza kuereketa kunevemadzinza kuti vaponeswe. Ndizvo vakaangira vechizadzisa chipimo chokushaisha kwavo ngenguva dzeshe. Asi ushungu hwaMwari hwakauya padera pavo pakugumisira.

Chidisiso chaPhauri choKuvavhakachirazve

¹⁷ Asi kudai tisu, hama, petakaparadzaniswa nemwi kwenguva doko, mukuonana kwomuiri, haiwa kwomwoyo, takatsamwirira kuona hope yenyu ngokumushuwira kakurutu.

¹⁸ Ngokuti taida kuuya kwomuri, inini, Phauri, kamwe nokwechipiri, naSathani wakatipinga.

¹⁹ Ngokuti chiinyi gonda redu nokuti kudakara kwedu nokuti dzungudza retinoganza ndiro pamberi paMambo wedu Jesu pakuuya kwake? Andimwipi here?

²⁰ Ngokuti imwimwi muri uthende hwedu nokudakara kwedu!