1 VaK. 9 - Bhaibheri Rakachena muChindau

Simba roMupostori

¹ Andizi kusunhurika here? Andisiri mupostori here? Andizi kuona Jesu Mambo wedu here? Imwimwi amusiri mushando wangu munaMambo here?

² Kudai ndisiri mupostori kunevamweni, zvakanyadaro kwomuri ndiri mupostori; ngokuti imwimwi muri chioniso choupostori hwangu munaMambo.

³ Uku ndikwo kudzirwira kwangu kwavari vanonditonga.

⁴ Atitenderwi here kuti tidye nokumwa?

⁵ Atitenderwi here kuhamba murwendo rwedu tine mukadzi mutendi, kudaiwo ngevamweni vevapostori nehama dzaMambo naKhefasi?

⁶ Nokuti inini ndega naBhanabhasi, atitenderwi here kurekera kudzishandira?

⁷ Ndiani mujoni unoshanda mushando woujoni ngemare yake? Ndiani unosima munda wemivhini, asikadyi michero yawo? Ndiani unousha zvifuyo, asikadyi mukaka wazvo?

⁸ Ndinoereketa izvi here ngomushuma wevanhu, nokuti Mipango aironziwo kudaro here?

⁹ Ngokuti kwakanyorwa muMipango yaMosi kuti, “Usazosungira pamuromo wen'ombe apo inopura zviyo.” In'ombe here yaanopinimidza ndiyo Mwari?

¹⁰ Nokuti aaereketi ngendaa yedu tega here? Eya, zvakanyorwa ngendaa yedu, ngokuti uwo unorima unosisira kuti arime echigonda, nouwo unopura, unosisira kuti apure echigonda kuashira.

¹¹ Kudai isusu takakusha kwomuri zviro zvoMweya zvakanaka, indaa huru here kudai techizokukura zviro zvenyu zvenyika?

¹² Kudai vamweni vanouku kutenderwa padera penyu, kunozopinda kwakaitawani kwetiri isusu? Kunyazwi atizi kushandisa uku kutenderwa, asi tinosengerera zviro zveshe kuti tisazopinga vhangeri raKristu.

¹³ Amuzii here kuti avo vanoshanda pane zvakacheneswa, vanodya kwezviro zvomutemperi? Naavo vanoshandira pamaarita, vane zvikoaniswa zvavo zvepaarita?

¹⁴ Ngokudaro Mambo wakapanga kuti avo vanochumaira vhangeri, vapone ngezvevhangeri.

¹⁵ Asi inini andizi kushandisa chimwe cheizvi zviro; nokuti andizi kunyora izvi kuti zviitirwe kwendiri, ngokuti zvirinane kuti ndife, pane kuti munhu aite kuti kuganza kwangu kuitwe kusina shwiro!

¹⁶ Ngokuti kudai ndechichumaira vhangeri, andina chiro chokuganza ndicho, ngokuti ndamanikidzwa. Ngokuti indaa kwendiri kudai ndisikachumairi vhangeri!

¹⁷ Ngokuti kudai ndechiita izvi ngokuda kwangu, ndinoona musharo; asi kudai ndechizviita ngokusikada kwangu, ndino ungwariri hunogondwa kwendiri.

¹⁸ Ndizvo musharo wangu ngowenyi? Izvi zvega, apo ndechichumaira vhangeri, ndichumaire vhangeri ngenyasha, kuti ndisashandisa kweshe kutenderwa kwangu muvhangeri.

¹⁹ Ngokuti kunyazwi ndaiya ndiri wakasunhurika kunevanhu veshe, ndakadziisa pashi muusungwa kwavari veshe, kuti ndiuyirwe ngevakapinda kuwanda.

²⁰ KuvaJudha, ndakaita kudai ngomuJudha, kuti ndiuyirwe ngavaJudha. Kwavari vari pashi peMipango, ndakaita kudai ngouri pashi peMipango, kunyazwi ndisiri pashi peMipango ndemene, kuti ndiuyirwe ngaavo vari pashi peMipango.

²¹ Kwavari vasina Mipango ndakaita kudai ndivo vasina Mipango, (kunyazwi andizi kusunhurika kubva kuMipango yaMwari, asi ndiri pashi peMipango yaKristu,) kuti ndiuyirwe ngaavo vasina Mipango.

²² Kwavari vakarembedzeka, ndakaita wakarembedzeka, kuti ndiuyirwe ngevakarembedzeka. Ndakaita zviro zveshe kuvanhu veshe, kuti ngenjira dzeshe ndiponese vamweni.

²³ Neni ndinoita izvo zveshe ngendaa yevhangeri, kuti ndionewo chikoaniswa muzvifumiso zvaro.

²⁴ Amuzii here kuti avo vanorumba mujaho, vanorumba veshe, asi ndiumwe unoashira muthuso? Ngokudaro rumbai imwimwi kuti muuashire.

²⁵ Mutambi weshe wemitambo unodzibata muzviro zveshe. Unoita kudaro kuti aashire dzungudza rinoora. Asi isusu tinoashira risikaori.

²⁶ Ndizvo inini andirumbi kudai ngomunhu usikazii nokuti kuambana kudai ngounoambana nedutu;

²⁷ asi ndinoponda muiri wangu, ndechiuisa muuranda, kuti ngesure ndapedza kuchumaira kunevamweni, inini pachangu ndiite unorashwa.