1 VaK. 7 - Bhaibheri Rakachena muChindau

Mibvunzo ngendaa yoKuroora

¹ Zvino ngendaa yeizvo zvemwakanyora ndizvo kwendiri, ndinoti, “Zvakanaka kuti munhu asagwama mukadzi.”

² Asi, ngendaa dzokuomba, munhu weshe ngaano mukadzi wake, nomukadzi weshe ngaano mwamuna wake.

³ Mwamuna ngaape kumukadzi wake izvo zvinomusisira, ngokudaro mukadzi ngaape kumwamuna wake.

⁴ Mukadzi aana simba rokutonga padera pomuiri wake, asi mwamuna. Ngokudarozve mwamuna aana simba rokutonga padera pomuiri wake, asi mukadzi.

⁵ Musanyimana, asi mwechiita ngokutenderana kwenguva, kuti mudzipire mukukumbira, mworomwozo kwambatirana, kuti Sathani asamuedza ngendaa yokutama simba kwenyu rokudzibata.

⁶ Asi ndinoronza izvi kumutendera, haiwa kumupanga.

⁷ Asi ndinoda kuti vamuna veshe vadai ndini. Asi munhu weshe unechipo chake chakaparadzana chinobva kunaMwari, umwe chembeu iyi noumweni chembeu iyo.

⁸ Asi ndinoti kwavari vasikazi kuroora, nokunevari shirikadzi, zvakanaka kwavari kudai vechigara kudai ndini.

⁹ Asi kuti vasina simba rokudzibata, ngavaroore, ngokuti kwakapinda kunaka kuroora kuno kutsva ngokuemura.

¹⁰ Kwavari vakaroora, ndinovapanga, asi andinipi, asi ndiMambo, kuti, “Mukadzi asaparadzana nomwamuna wake.”

¹¹ (Asi kudai iye echiparadzana naye, ngaagare asikazi kuroorwa, nokuti ngaaiyaniswe nomwamuna wake;) zve, kuti mwamuna asazoramba mukadzi wake.

¹² Asi kunevamweni ndinoronza inini, haiwa Mambo. Kudai aripo mutendi, uno mukadzi usikatendi, nomukadzi uwo echitenda kugara naye, asamuramba.

¹³ Nomukadzi uno mwamuna usikatendi nomwamuna echitenda kugara naye, asamuramba.

¹⁴ Ngokuti mwamuna usikatendi unocheneswa kubudikidza ngomukadzi, nomukadzi usikatendi unocheneswa kubudikidza ngomwamuna. Dai zvisikazi kudaro, vana venyu vaizodai vasikazi kucheneswa, asi zvino vakacheneswa.

¹⁵ Asi kudai usikatendi echida kuenda, ngaaende; mutendi mwamuna nokuti mukadzi aazi kusungwa mundaa dzakadaro. Ngokuti Mwari wakatidaidzira kunyarara.

¹⁶ Iwewe mukadzi, unozia ngenyi kuti unozoponesa mwamuna wako? Iwewe mwamuna, unozia ngenyi kuti unozoponesa mukadzi wako?

Ponai kudai ngezvaAkamudaidza Mwari

¹⁷ Munhu weshe ngaapone kudai ngezvaakamukoanisira Mambo, nokuneizvo zvaakamudaidzira Mwari. Ndizvo zvendinopanga kuzviara zveshe.

¹⁸ Uripo here panguvayo munhu wakadaidzwa akachekwa? Asazoita kuti chioniso chokuchekwa chiduswe. Uripo here panguvayo wakadaidzwa asikazi kuchekwa? Asachatsvaka kuchekwa.

¹⁹ Kuchekwa chiro chisina shwiro, nokusikachekwa chiro chisina shwiro, kwega kungwarira Mipango yaMwari.

²⁰ Munhu weshe ngaagare mukudaidzwa kwaakadaidzwa kwokuri.

²¹ Wakadaidzwa here uri hloko? Usakanuka ndizvo. Asi kudai ungasunhurika, tsanangura icho.

²² Ngokuti uwo wakadaidzwa kunaMambo ari hloko, uri wakasunhurwa waMambo. Ngokudaro uwo wakadaidzwa ari wakasunhurika, uri hloko yaKristu.

²³ Imwimwi mwakatengwa ngomutengo; musaita hloko dzevanhu.

²⁴ Hama, munhu weshe mukudaidzwa kwaakadaidzwa ndikwo, ngaagarepo pamberi paMwari.

Mibvunzo ngendaa yeVasikazi Kuroorwa neShirikadzi

²⁵ Zvino ngendaa yemhandwe, andina chironzo chaMambo. Asi ndinoronza kupinimidza kwangu, kudai ngouwo wakaitirwa nyasha ndiMambo kuita unogondeka.

²⁶ Ndizvo ndinopinimidza kuti zvakanaka, ngendaa yokutambudzika kuripo, kuti munhu agare kudai ngezvaari azvo.

²⁷ Wakasungirwa pamukadzi here? Usatsvaka kusunhurika. Wakasunhurwa here kubva pamukadzi? Usatsvaka kuroora.

²⁸ Asi kudai waroora, auzi kushaisha; nokudai mhandwe yaroorwa, aizi kushaisha. Asi vakadaro vanozoa nokutambudzika munyika, asi inini ndinoda kumungwadza.

²⁹ Asi ndinoronza izvi, hama, nguva idoko, kuti kubvira zvino, veshe avo vane vakadzi vaite kudai ngevasina;

³⁰ naavo vanochema, kuti vaite kudai ngevasikachemi; naavo vanodakara, vaite kudai ngevasikadakari; naavo vanotenga, vaite kudai ngevasikazi kuganya;

³¹ naavo vanoshandisa zvomunyika, vaite kudai ngevasikanyanyi kuzvishandisa, ngokuti muemo wenyika ino unopinda.

³² Asi ndinoda kuti imwimwi muite vasina zvokudembatemba. Iye usikazi kuroora unobatika ngezviro zvaMambo, ngenjira yaangamudakadza ndiyo Mambo;

³³ asi uwo wakaroora, unobatika ngezviro zvomunyika, ngenjira yaangamudakadza ndiyo mukadzi wake,

³⁴ nokudisisa kwake kwakapaurwa. Uwo usikazi kuroorwa nemhandwe unobatika ngezviro zvaMambo, kuti aite wakacheneswa zveshe muiri nomweya. Asi uwo wakaroorwa unobatika ngezviro zvenyika, ngenjira yaangadakadza ndiyo mwamuna wake.

³⁵ Ndinoronza izvi kwomuri kuti mudetserwe, haiwa kuteya murau padera penyu, asi kuti zviitwe ngenjira inosisira, kuti mubatirire kunaMambo musikakangaidzwi.

³⁶ Asi kudai ngevakagondisana kuti aripo munhu unopinimidza kuti unoita zvisikasisiri kunemhandwe yake, yabva muzero, nokudai kwechisisira kudaro, echida kuroora, aashaishi; ngavaroore.

³⁷ Asi iye unoema akagwinya mumwoyo mwake, asina chinomuangiridza, asi unesimba padera pokuda kwake, naye wakadziemesera mumwoyo mwake kuti unozongwarira mhandwe yake, unoita zvakanaka.

³⁸ Ndizvo uwo unoroodza mhandwe yake kuti iroorwe unoita zvakanaka; nouwo usikairoodzi, unoita zvakapinda kunaka.

³⁹ Mukadzi unosungirwa kumwamuna wake nguva yeshe yaanopona mwamuna wake. Asi kuti mwamuna afa, wasunhurika kuti aroorwe ngowaanoda, kwega ngenjira yaMambo.

⁴⁰ Asi unopinda kudakara kudai echindogara akadaro. Uku ndikwo kupinimidza kwangu; ndinopinimidza kuti ndino Mweya waMwari.