1 VaK. 6 - Bhaibheri Rakachena muChindau

Vatendi Vanomangarirana Dzimbahwe

¹ Uripo here unendaa kuno umweni, unoshinga kuenda koomangara pamberi pevasikazi kururama, asikaendi pamberi pevakacheneswa?

² Amuzii here kuti vakacheneswa vanozotonga nyika? Nokudai nyika inozotongwa ndimwi, amusisiri here kutonga ndaa dzakatsonga?

³ Amuzii here kuti tinozotonga ngirosi? Kunozopinda kwakaitawani muzviro zvokupona uku?

⁴ Ndizvo kudai munendaa dzokugura dzokupona uku, munovaemesa kuita vatongi here avo vasina chimiro kwacho muchiara?

⁵ Ndinoereketa izvi kuti ndimutsverudze. Chiri gwinyiso here kuti apana naumwe munhu wakangwara pakati penyu, ungakona kugura ndaa pakati pehama dzake.

⁶ Asi mutendi unomangarira mutendi umweni wake here, kuti atongwe ngevasikatendi?

⁷ Ndizvo ngegwinyiso dziripo ndaa pakati penyu, kuti munomangarirana umwe noumweni kuronza kukorera kwenyu. Amutendi ngenyi kushaishirwa? Amutendi ngenyi kubirwa?

⁸ Asi imwimwi munoshaisha mwemene nokubirana, nokuna vatendi ngokudaro.

⁹ Amuzii here kuti vasikazi kururama avazogari nhaka youmambo hwaMwari? Musachengedzerwa! Akuna vasvinuki, vadiri vemiedzaniso, vaombi, vashaishi, vanoshanja nevamuna,

¹⁰ mbavha, vaemuri, varadzi, vatuki, vanoba, avatongozogari nhaka youmambo hwaMwari.

¹¹ Nevamweni venyu vaiya vakadaro. Asi mwakashambwa nokucheneswa nokupembedzwa, muzina raMambo Jesu Kristu, muMweya waMwari wedu.

Shandisai Miiri yenyu Kuita Kukudzwa kwaMwari

¹² “Zviro zveshe zvinotenderwa kwendiri,” asi andizvopi zviro zveshe zvinondinakira. “Zviro zveshe zvinotenderwa kwendiri,” asi andizonyiswi ngechiro nachimwe.

¹³ “Kudya ngekwendani, nendani ngeyokudya.” Asi Mwari unozoparadza zveshe chimwe ngachimwe. Muiri ausiri wokuomba akadi, asi ngowaMambo naMambo ngowomuiri.

¹⁴ Mwari wakamusa Mambo naye unozotimusawo ngesimba rake.

¹⁵ Amuzii here kuti miiri yenyu inhengo dzaKristu? Ndizvo ndinozotora here nhengo dzaKristu ndidziite nhengo dzemhombwe? Haiwa!

¹⁶ Amuzii here kuti uwo unokwambatirana nemhombwe, unoita muiri umwe nayo? Ngokuti wakati, “Vairi vanozoita nyama imwe.”

¹⁷ Asi iye wasunganidzwa naMambo unoita mweya umwewo naye.

¹⁸ Tizai kuomba! Chishaishi cheshe chaanoita munhu chiri ngokubanze kwomuiri; asi iye unoomba unoshaishira muiri wake.

¹⁹ Amuzii here kuti muiri wenyu itemperi roMweya Wakachena uri mukati mwenyu, womwakaashira kubva kunaMwari, nemwi amuchiri venyu akadi?

²⁰ Ngokuti imwimwi mwakatengwa ngomutengo. Ndizvo kudzai Mwari mumiiri yenyu.