1 VaK. 5 - Bhaibheri Rakachena muChindau

Phauri Unoreketa ngendaa yoKuomba muChiara

¹ Kunozwika kuti kuripo kuomba pakati penyu, nokuomba kwakadaro apana pakati pevemadzinza; kwokuti munhu unotora mukadzi wababa ake.

² Nemwi munodzikudza! Amusisiri kubonda here, kuti uwo wakaita uku kushata aduswe pakati penyu?

³ Ngokuti inini ngegwinyiso ndisinyaripo ngomuiri, asi ndiripo ngomweya; nazvino kudai ngouripo ndatomutonga munhu uwo wakaita icho chiro.

⁴ Naapo imwimwi mwaungana pamwepo muzina raMambo wedu Jesu, nomweya wangu uripo nesimba raMambo wedu Jesu,

⁵ munozopira munhu uyu kunaSathani kuti aparadzwe nyama, kuti mweya wake uponeswe ngezuva raMambo Jesu.

⁶ Kudziganzisa kwenyu akuzi kunaka. Amuzii here kuti zvimumera zvishomanani zvinofemisa hlama yeshe?

⁷ Dusai mumera wekare, kuti muite hlama itsva, kudai ngezvomuri vasina mumera. Ngokuti Kristu gwai rePhasika redu wakabairwa kuita mudiro.

⁸ Ndizvo ngatingwarire mushongano wedhiri, haiwa ngomumera wekare, nokuti ngomumera wekururu nowokushata, asi ngechingwa chisina mumera, chokugondeka nechegwinyiso.

Kuomba Kunosisira Kutongwa

⁹ Ndakanyora kwomuri mutsamba yangu kuti musazwanana nevanoomba,

¹⁰ izvi azvironzi vanoomba venyika iyi, nokuti vanoemura, nokuti mbavha, nokuti vanodira miedzaniso; ngokuti mukadaro, kunosisira kuti mubve munyika.

¹¹ Asi zvino ndinonyora kwomuri kuti musazwanana nomunhu unozwi mutendi, kudai ari muombi, nokuti muemuri, nokuti mudiri wemiedzaniso, nokuti mutuki, nokuti chiradza, nokuti mupambi; nomunhu wakadaro, haiwa, musadya naye.

¹² Ngokuti ndinenyi kuti nditonge avo vari vokubanze? Amutongi here avo vomukati?

¹³ Asi avo vokubanze Mwari unozovatonga. “Budisai munhu uwo wakashata kuti abve pakati penyu.”