1 VaK. 4 - Bhaibheri Rakachena muChindau

Vapostori vaKristu

¹ Munhu ngaapinimidze tisu kuti tiri vashandi vaKristu nevangwariri vezvakafishika zvaMwari.

² Kuneizvi kunotsvakisiswa kunemungwariri kuti aite unogondeka.

³ Asi kwendiri chiri chiro chidoko kuti nditongwe ndimwi nokuti ngokutonga kwomunhu. Asi inini andidzitongi pachangu.

⁴ Ngokuti andizii chiro chinondiitira ndaa pachangu, asi andipembedzwi ngeichi. Asi uwo unonditonga ndiMambo.

⁵ Ndizvo musatonga chiro nguva isati yaguma, Mambo asati auya, uwo unozounza mukujeka zviro zvakafishika zvechidima, naye uchabudisa pamhene mipinimidzo yomwoyo. Naapo munhu weshe unozoashira kukudzwa kwake kunobva kunaMwari.

⁶ Inini ndakaedzanisa muedzaniso uyu kwendiri nokuna Aporosi ngendaa yenyu, hama, kuti mudzidze kubudikidza tisu biningidzo reizvo zvakanyorwa zvinoti, “Musapinda zvakanyorwa,” kuti kusazoapo naumwe wenyu unodzitunhumadza kurwisana umwe kunoumweni.

⁷ Ngokuti ndiani unokuita wakapinda vamweni? Unenyi chousikazi kuashira? Asi kuti wakachiashira, unoganza ngenyi, kudai ngousikazi kuchiashira kudai ngechipo?

⁸ Zvino mwagutiswa! Zvino mwaganya! Mwakaita madzimambo tisiripo! Ngegwinyiso ndingada kuti muite madzimambo kuti isusuwo tiite madzimambo nemwi.

⁹ Ngokuti ndinopinimidza kuti Mwari wakatiemesa isusu vapostori tiri vokugumisira kwavari veshe, kudai ngevanhu vakatongerwa rufu. Ngokuti takaitwa vokuringirwa kunyika, kungirosi nokunevanhu.

¹⁰ Tiri mapenzi ngendaa yaKristu, asi imwimwi muri vakangwara munaKristu. Isusu takarembedzeka, asi imwimwi mwakagwinya. Imwimwi munakwo kuremeredzwa, asi isusu atiremeredzwi.

¹¹ Metsa kuguma awa iri tine nzara nenyota, tiri mititinini, tinopamhadzwa, tiri vapepesheki.

¹² Tinotambudzika, techishanda ngenyara dzedu. Naapo techitukwa, tinofumisa; apo techitambudzwa, tinoshingirira;

¹³ naapo techireiwa, tinoiyanisa. Takaitwa vakadai ngemarara enyika, tiri makoko ezviro zveshe metsa nazvino.

Kupanga kwaBaba

¹⁴ Andinyori izvi zviro kumutsverudza, asi kuti ndimupange kudai ngezvomuri vana vanodikanwa.

¹⁵ Ngokuti kunyazwi mungaane vadzidzisi vari makumi emazana gumi munaKristu, amuna madzibaba akawanda. Ngokuti munaKristu Jesu inini ndakamubara kubudikidza ngevhangeri.

¹⁶ Ndizvo ndinomupota, itai vanondiedzerera.

¹⁷ Ngendaa iyi ndakatumira kwomuri Thimothi, mwana wangu unodikanwa nounogondeka munaMambo, iye unozomuedzurira njira dzangu munaKristu, kudai ngezvendinodzidzisa kundau dzeshe muzviara zveshe.

¹⁸ Asi vamweni venyu vanodzikudza vechipinimidza kuti andiuyiyo kwomuri.

¹⁹ Asi ndinozouya kwomuri ngokukasira, kudai Mambo echitenda, neni ndinozozia, haiwa ngeizwi raavo vanodzikudza, asi ngesimba ravo.

²⁰ Ngokuti umambo hwaMwari andihwopi hweizwi, asi hwesimba.

²¹ Munodenyi? Ndinozouya kwomuri nendonga here nokuti norudo nomweya wakapfaa?