1 VaK. 3 - Bhaibheri Rakachena muChindau

Varanda vaMwari

¹ Asi inini, hama, ndaiya ndisikakoni kuereketa kwomuri kudai ndivo voMweya, asi kudai ndivo venyama, kudai ngevana vadoko munaKristu.

² Ndakamupa mukaka, haiwa kudya kwakagwinya, ngokuti mwaiya musati mwakona. Haiwa, kunyazwi nazvino, amusati mwakona,

³ ngokuti muchiri venyama. Ngokuti kwechioneka kuti kuripo pakati penyu ndurumwa nehasha, amurivopi here venyama, mwechihamba ngomuitiro wevanhu?

⁴ Ngokuti apo umwe unoti, “Inini ndiri waPhauri,” noumweni unoti, “Inini ndiri waAporosi,” amuri vanhupi here?

⁵ Ndizvo Aporosi uri anani? NaPhauri uri anani? Varanda vemwakatenda kubudikidza ndivo, umwe ngaumwe kudai ngezvaakapuwa ndiMambo.

⁶ Inini ndakasima, Aporosi wakadiridzira, asi Mwari wakameresa.

⁷ Ndizvo andiyepi unosima uri chiro, nokuti unodiridzira, asi ndiMwari ega unomeresa.

⁸ Uwo unosima nouwo unodiridzira chiro chimwe; asi umwe ngaumwe unozoashira musharo wake, kudai ngomushando wake.

⁹ Ngokuti tiri vashandi pamwepo naMwari; imwimwi muri munda waMwari. Imwimwi muri mhatso yaMwari.

¹⁰ Kudai ngenyasha dzaMwari dzakapuwa kwendiri, kudai ngomuaki uri ngwazi nowakangwara ndakaisa tsikiro, asi umweni unoaka padera paro. Muaki umwe ngaumwe ngaangware ngenjira yaanoaka ndiyo padera paro.

¹¹ Ngokuti akuna naumwe ungaaka tsikiro rimweni, kwega iro rakaakwa, tsikiro iro ndiJesu Kristu.

¹² Asi kudai munhu echiaka padera peiro tsikiro, ngomukore, sirivha, mapuwe anomutengo mukuru, mimbiti, mwenje, mahlanga,

¹³ mushando womunhu weshe unozooniswa, ngokuti zuva iro rinozouonisa, ngokuti unozooniswa ngomuriro, nomuriro wemene unozoedza mushando womunhu weshe kuti wakadini.

¹⁴ Asi kudai mushando womunhu nokuti ngouri wechizotsima waakaaka padera paro, iye unozoashira musharo.

¹⁵ Kudai mushando womunhu nokuti ngouri wechizopishwa, iye unozorashikirwa ndiwo, asi muaki emene unozoponeswa, asi kudai ngokupotya muriro.

¹⁶ Amuzii here kuti imwimwi muri temperi raMwari nokuti Mweya waMwari unogara mukati mwenyu?

¹⁷ Kudai munhu kunyazwi ndiani echishaishira temperi raMwari, Mwari unozomushaishirawo. Ngokuti temperi raMwari rakachena, ndimwi temperi iro.

¹⁸ Munhu asadzichengedzera pachake. Kudai munhu echipinimidza kuti wakangwara pakati penyu paneiyi nguva, ngaaite benzi, kuti aite wakangwara.

¹⁹ Ngokuti ungwaru hweiyi nyika upenzi kunaMwari. Ngokuti kwakanyorwa kuti, “Unobata vakangwara muurimbwi hwavo.”

²⁰ Zve unoti, “Mambo Mwari unozia mikarakadzo yevakangwara kuti iri isina shwiro.”

²¹ Ndizvo munhu asaganza ngevanhu. Ngokuti zviro zveshe ngezvenyu,

²² kunyazwi Phauri nokuti Aporosi nokuti Khefasi nokuti nyika nokuti kupona nokuti rufu nokuti zviro zviripo nokuti zviro zvichazouya, zveshe ngezvenyu.

²³ Nemwi muri vaKristu, naKristu ngewaMwari.