1 VaK. 16 - Bhaibheri Rakachena muChindau

Munikero kuneVakacheneswa

¹ Zvino ngendaa yokuunganidzira munikero wokupa vakacheneswa: kudai ngezvendakapanga vezviara zveGaratia, itaiwo kudaro nemwi.

² Ngezuva rokutanga reshe revhiki, uwo nouwo wenyu ngaadziisire ngokwake mumangwaririro, kudai ngezvaakamufumisa Mwari, kuti kusazoapo kuunganidzwa ndagumeyo.

³ Naapo ndaguma, ndinozotuma avo vomunozotsanangura netsamba kuti vatware zvipo zvenyu kuenda Jerusarema.

⁴ Kudai zvechioneka zvakasisira kuti ndiendewo, vanozohamba neni.

Urongwa hwepaRwendo

⁵ Ndinozouya kwomuri ngesure ndahamba ngemuMasedhonia; ngokuti ndinosisira kuhamba ngemuMasedhonia.

⁶ Pamweni ndinozogara nemwi nokuti kupedza nguva yechando ndiripo, kuti imwimwi mundiperekedze parwendo rwangu kunyazwi ngepari pendinozoenda.

⁷ Ngokuti andidi kumuona zvino, ndechipinda; ngokuti ndinogonda kuzogara mukuwo nemwi, kudai Mambo echitenda.

⁸ Asi ndinozogara muEfesu metsa raguma zuva rePentekosti,

⁹ ngokuti musiwo wakapamhama wakabeurirwa inini, kuti ndiite mushando mukuru, nawo aripo magaa mazhinji.

¹⁰ Kudai Thimothi echiuya kwomuri, wonai kuti agare pakati penyu pasina chaanotya, ngokuti iye unoshanda mushando waMambo, kudai ngezvendinoita inini;

¹¹ ndizvo musazotendera naumwe kuti amushoore. Muendesei mberi murwendo rwake mukunyarara, kuti auye kwendiri; ngokuti ndinomuringirira kuti unozouya pamwepo nehama.

¹² Asi ngendaa yaAporosi, hama yedu, ndakapota kakurutu kwaari kuti amuhambire pamwepo nedzimweni hama, asi waiya asikadi kuuyayo zvinopano. Asi unozouya apo aona mukuwo.

Mazwi oKugumisira noKuvhaisa

¹³ Rindai, gwinyai kuema mukugonda kwenyu, itai vakashinga, muite vakagwinya.

¹⁴ Zveshe zvomunoita, ngazviitwe ngorudo.

¹⁵ Zvino, hama, munozia vemhuri yaStefanasi, kuti ndivo vatendi vokutanga muAkhaiya, navo vakadziemesera kushandira vakacheneswa;

¹⁶ ndinomupota kuti nemwiwo mupfaire vakadaro pachenyu, nokuno munhu weshe unodetsera mumushando, echidzimbirwa navo.

¹⁷ Neni ndinodakara ngokuuya kwaStefanasi naFotunatusi naAkhaikusi, ngokuti izvo zvakasarira kwomuri, ivo vakazvizadzisa kwendiri;

¹⁸ ngokuti vakamusirira mweya wangu nowenyuzve. Ndizvo tendai vanhu vakadaro.

¹⁹ Zviara zviri muAsia zvinomutambisa. Akwira naPrisira vanomutambisa kakurutu munaMambo, pamwepo nechiara chiri mumhatso yavo.

²⁰ Vatendi veshe vanomutambisa. Chingamidzanai ngomuromo ngokucheneswa.

²¹ Inini, Phauri, ndinonyora kutambisa kwangu ngenyara yangu yemene.

²² Kudai aripo munhu kunyazwi ngouri usikamudi Mambo, ngaaite unotukwa. Mambo wedu, uyai.

²³ Nyasha dzaMambo Jesu Kristu ngadzigare nemwi.

²⁴ Rudo rwangu ngarugare nemwi mweshe ndiye Jesu Kristu, Ameni.