1 VaK. 15 - Bhaibheri Rakachena muChindau

Kumuka kwaKristu

¹ Zvino ndinomuziisa, hama, vhangeri iro rendakachumaira kwomuri, romwakaashirawo, romunoema mukati mwaro,

² kubudikidza ndirowo munoponeswa; ngemazwi awo endakachumaira kwomuri, kudai mwechiabatisisa, ngepabanze pokuti mwakatenda pasina shwiro.

³ Ngokuti ndakapa kwomuri kutanga, icho chendakaashirawo inini, kuti Kristu wakafira zvishaishi zvedu, kudai ngezvakanyorwa,

⁴ nokuti iye wakaikwa, zve, wakamuswa ngezuva rechitatu, kudai ngezvakanyorwa,

⁵ nokuti wakaoneka kunaKhefasi; ngesure wakaoneka kunegumi navairi.

⁶ Ngesure wakaoneka kunehama dzinopinda mazana mashanu vari pamwepo, vazhinji vavo vachiripo metsa nazvino, asi vamweni vavo vakafa.

⁷ Naapo wakadzionisa kunaJakobe; nangesure wakaoneka kuvapostori veshe.

⁸ Pakupedzisira wakadzionisazve kwendiri, kudai ngouwo wakabarwa nguva isati yaguma.

⁹ Ngokuti inini ndiri mudoko wevapostori, andisisiri kudaidzwa kuti ndiri mupostori, ngokuti ndakatambudza chiara chaMwari.

¹⁰ Asi ngenyasha dzaMwari ndiri munhu wakadai zvino, nenyasha dzake dzakapuwa kwendiri, adzizi kuoneka dzisina shwiro; asi ndakashanda kakurutu kupinda veshe, kunyazwi andinipi, asi inyasha dzaMwari dzaiya mwendiri.

¹¹ Ndizvo kunyazwi ndini nokuti ndivo, ndiyo njira yetinochumaira ndiyo nenjira yemwakatenda ndiyo.

Kumuka kweVakafa

¹² Zvino kudai Kristu echichumairwa kuti wakamuka kubva kwevakafa, kunoronzwa ngenyi ngevamweni pakati penyu, kuti akuna kumuka kubva kwevakafa?

¹³ Asi kudai kusina kumuka kwevakafa, zvino Kristu aazi kumuswawo;

¹⁴ kudai Kristu asikazi kumuswa, kuchumaira kwedu akuna shwiro nokugonda kwenyu akuna shwiro.

¹⁵ Isusu tinooneka tiri zvapupu zvokunyepa zvaMwari, ngokuti takapupura ndiMwari kuti wakamusa Kristu, uwo waasikazi kumusa, kuti riri gwinyiso kuti vakafa avamuswi.

¹⁶ Ngokuti kudai vakafa vasikamuswi, zvino Kristu aazi kumuswa.

¹⁷ Kudai Kristu asikazi kumuswa, kugonda kwenyu akuna shwiro nemwi muchirimwo muzvishaishi zvenyu.

¹⁸ Zvino naavowo vakafa munaKristu vakarova.

¹⁹ Kudai mukupona uku kwega tino kugonda munaKristu, tinosisira kukungurirwa kupinda vanhu veshe.

²⁰ Asi zvino Kristu wakamuswa kubva kwevakafa, wakaita muchero womutanguro weavo vakafa.

²¹ Ngokuti kufa kwakaguma kubudikidza ngomunhu, kumukazve kwevakafa kwakaguma kubudikidza ngomunhu;

²² ngokuti kudai ngezvevanofa veshe munaAdhamu, ndizvo veshe muna Kristu vachaitwa vanorarama.

²³ Asi umwe ngaumwe kudai ngourongwa hwake. Kristu ndiye muchero womutanguro, zvino pakuuya kwake avo vari vaKristu.

²⁴ Naapo kunouya magumo, paanozopa umambo kunaMwari Baba, apo apedza kuparadza kutonga kweshe noumambo hweshe nesimba reshe.

²⁵ Ngokuti kunosisira kuti atonge metsa aisa eshe magaa ake pashi petsoka dzake.

²⁶ Gaa rokugumisira rinozoparadzwa rufu.

²⁷ “Ngokuti Mwari wakapfaisa zviro zveshe pashi petsoka dzake.” Asi apo chooti, “Zviro zveshe zvapfaiswa,” zviri pamhene kuti azvironzi kuti iye wapfaiswa, uwo wakapfaisa zviro zveshe pashi pake.

²⁸ Naapo zviro zveshe zvapfaiswa kwaari, zvino Mukororo emene unozopfairawo uwo wakapfaisa zveshe zviro pashi pake, kuti Mwari aite zveshe munezveshe.

²⁹ Kudai zvisikazi kudaro, vanozoitenyi avo vakabhabhatidzirwa vakafa? Kudai vakafa vasikamuswi, ndizvo vanobhabhatidzirirwenyi vakafa?

³⁰ Isusu tinogara munyatwa ngenyi maawa eshe?

³¹ Ndinopika, hama, ngokuganza kwangu kwendinakwo ndimwi, munaKristu Jesu Mambo wedu, kuti ndinofa zuva ngezuva.

³² Kudai ngomushuma wevanhu ndakaambana nezvikara zvomushango muEfesu, kunondidetserenyi? Kudai vakafa vasikamuswi, “Ngatidye, techimwa, ngokuti mangwani tinozofa.”

³³ Musachengedzerwa: “Kuiyana nevakashata kunoparadza miitiro yakanaka.”

³⁴ Mukai mumipinimidzo yenyu yakarurama, murekere kuita zvakashata; ngokuti vanhu vamweni avana ruziyo ndiMwari. Ndinoereketa izvi kumutsverudza.

Kumuka kwoMuiri Kubva muKufa

³⁵ Asi umweni unozoti, “Vakafa vanoita mamusirwenyi? Vanozouya nomuiri wakadini?”

³⁶ Iwewe benzi! Icho chounokusha, achingameri asi kuti chafa.

³⁷ Neicho chounokusha, aukushi uwo muiri unozoapo, asi tsangu yega, pamweni yekoroni nokuti yembeu imweni.

³⁸ Asi Mwari unopa muiri unomuemo wakadai ngokuda kwake, nokumbeu imwe ngaimwe unopa muiri wayo.

³⁹ Nyama yeshe aizi kuita nyama yembeu imweyo, asi iriyo mbeu imwe yenyama yevanhu, nembeu imweni yenyama yemhuka, nembeu imweni yenyama yeshiri, nembeu imweni yenyama yehove.

⁴⁰ Iriyozve miiri yomudenga nemiiri yomunyika, asi uthende hweiyo yomudenga ngohwembeu imweni, nouthende hweiyo yomunyika ngohwembeu imweni.

⁴¹ Huriyo uthende humweni hwezuva, huriyo uthende humweni hwomwedzi, huriyo uthende humweni hwenyeredzi; ngokuti nyeredzi imwe inosiyana nenyeredzi imweni uthende hwayo.

⁴² Ndizvowo zvakaita kumuka kwevakafa. Muiri unokushwa mukuora, unomuswa mukusikaora.

⁴³ Unokushwa mukusikaremeredzwa, unomuswa muuthende. Unokushwa mukurembedzeka, unomuswa musimba.

⁴⁴ Unokushwa uri muiri wenyama, unomuswa waa muiri womweya. Kudai uripo muiri wenyama, uripozve muiri womweya.

⁴⁵ Kwakanyorwazve kuti, “Munhu wokutanga, Adhamu, wakaitwa munhu unopona,” Adhamu wokugumisira wakaitwa mweya unopa kupona.

⁴⁶ Asi andiwopi mweya wokutanga, asi wenyama; ngesure kwouya womweya.

⁴⁷ Munhu wokutanga wakabva mumavhu, munhu wemavhu. Munhu wechipiri wakabva mudenga.

⁴⁸ Avo vari vemavhu vakadai ngouwo wemavhu. Naavo vari vomudenga, vakadai ngouwo womudenga.

⁴⁹ Kudai ngezvetaiya mumuemo wouwo wemavhu, zve, tinozowa nomuemo wouwo womudenga.

⁵⁰ Zvino ndinoronza izvi, hama, nyama nengazi azvingakoni kugara nhaka youmambo hwaMwari; nokuti zvinoora azvingagari nhaka yezvisikaori.

⁵¹ Ringirai, ndinomuronzera zvakafishika! Atizofi teshe, asi tinozotsandudzwa teshe,

⁵² nenguva doko, ngokuphipha kwedziso, ngenguva yokuridzwa kwegwama rokugumisira. Ngokuti gwama rinozorira, nevakafa vanozomuswa vasikaori, nesu tinozotsandudzwa.

⁵³ Ngokuti muiri uyu unoora unosisira kupfeka usikachazoori, nouyu unofa unosisira kupfeka usikachazofi.

⁵⁴ Naapo muiri uyu unoora wazopfeka usikachazoori, nouwo muiri unofa wazopfeka usikachazofi, naapo rinozozarisika izwi rakanyorwa kuti, “Kufa kwamedzwa ngokunyiswa.”

⁵⁵ “Iwewe rufu, kunyisa kwako kuri pari? Iwewe rufu, ukaira hwako huri pari?”

⁵⁶ Ukaira hworufu kushaisha; nesimba rokushaisha riri Mipango.

⁵⁷ Asi ngaabongwe Mwari, unotipa kunyisa kubudikidza ndiye Mambo wedu Jesu Kristu.

⁵⁸ Ndizvo, hama dzangu dzinodikanwa, itai vakagwinya, vasikatsukunuswi, ngenguva dzeshe mwechitsamwirira mumishando yaMambo, ngokuti munozia kuti mishando yenyu aiiti isina shwiro munaMambo.