1 VaK. 14 - Bhaibheri Rakachena muChindau

Ndaa yeZvipo Zvinopuwa Vanhu ndiMweya

¹ Teerai rudo, mudisise zvipo zvoMweya, kakurutu kuti muprofete.

² Ngokuti uwo unoereketa ngendimi aaereketi kunevanhu asi kunaMwari; ngokuti apana munhu unomuzwa, asi unoereketa zvakafishika muMweya.

³ Asi ngenjira imweni uwo unoprofeta unoereketa kuvanhu zvinoaka, zvinoembedzera nezvinonyaradza.

⁴ Uwo unoereketa ngendimi unodziaka, asi uwo unoprofeta unoaka chiara.

⁵ Zvino ndinoda kuti imwimwi mweshe muerekete ngendimi, asi kupinda izvo, kuti muprofete. Ngokuti uwo unoprofeta, mukuru kupinda uwo unoereketa ngendimi, asi kuti umweni akakhumucha, kuti chiara chiakiwe.

⁶ Asi zvino, hama, kudai ndechiuya kwomuri, ndechiereketa ngendimi ndinozomudetsera ngenjiranyi, ngepabanze pokuti ndierekete kwomuri ngenjira inomuunzira chioniso nokuti ruziyo nokuti chiprofeti nokuti chidzidziso?

⁷ Kunyazwi zviro zvisina kupona zvinorira, kunyazwi iri nyere nokuti chidangari, kudai zvisikaparadzani mukurira kwazvo, kungaitwa maziirwenyi kurira kwazvo?

⁸ Ngokuti kudai gwama rikarira kusikaziikanwi, ndiani unozodzinasirira kuenda kuhondo?

⁹ Ndizvo nemwiwo pachenyu, kudai mwechiereketa ngendimi izvo zvisikanasi kuzwisisika, zvingaita maziikanirwenyi izvo zvinoereketwa? Ngokuti ngokudaro munozoereketa kunedutu.

¹⁰ Dziripo ndimi dzembeu dzakaparadzana dzakawanda munyika, akuna naimwe yadzo isikaronzi chiro.

¹¹ Ndizvo kudai ndisikazii biningidzo reizwi, ndinozoita munhu mupara kwaari unoereketa nouwo unoereketa unozoita munhu mupara kwendiri.

¹² Ndizvo nemwiwo pachenyu, kwechioneka kuti munodisisa kuwa nezvipo zvoMweya, tsvakai kuti muwanzwe mukuaka chiara.

¹³ Ndizvo uwo unoereketa ngendimi, ngaakumbire simba rokukhumucha.

¹⁴ Ngokuti kudai ndechikumbira ngendimi, mweya wangu unokumbira, asi mupinimidzo wangu auzwisisi.

¹⁵ Ndizvo ndinozoitenyi? Ndinozokumbira mumweya, ndechikumbira ngomupinimidzowo. Ndinozoemba mumweya, ndechiemba ngomupinimidzowo.

¹⁶ Ngenjira imweni, kudai wechibonga mumweya, uwo usikazii ungazoita maronzerenyi kuti, “Ameni,” apo wobonga, kwechioneka kuti iye aazii chounoronza?

¹⁷ Ngokuti ngegwinyiso iwewe unonasa kubonga, asi umweni aazi kuakiwa.

¹⁸ Ndinobonga Mwari, ngokuti ndinoereketa ngendimi kupinda imwimwi mweshe.

¹⁹ Asi muchiara ndingada kuti ndierekete mazwi mashanu ngokupinimidza kwangu, kuti ndidzidzise vamweni, kupinda kuereketa mazwi ari gumi remakumi emazana ngendimi dzisikaziikanwi.

²⁰ Hama, musaita vana mukupinimidza; asi munezvakashata itai vana, asi mukupinimidza itai vabva muzero.

²¹ Kwakanyorwa muMipango kuti, “Ngevanhu vendimi dzimweni, ngemiromo yevenyika mukanza ndinozoereketa kuneava vanhu; kunyazwi zvakadaro, avazondizwi”, unoronza Mambo Mwari.

²² Ndizvo ndimi dziri chioniso, haiwa kwavari vanotenda, asi kwavari vasikatendi; asi kuprofeta kuri chioniso, haiwa kwavari vasikatendi, asi kwavari vanotenda.

²³ Ndizvo, kudai chiara cheshe chaungana pamwepo, navo veshe vechiereketa ngendimi, kukapoteramwo munhu usikazii nokuti usikatendi, wakadaro aazoronzi here kuti muri vanopenga?

²⁴ Asi kudai veshe vechiprofeta, oroopoteramwo umwe usikatendi, munhu mupara nokuti usikazii, iye unooniswa kushaisha kwake ndivo veshe, unotongwa ndivo veshe.

²⁵ Zvakafishika zvomwoyo wake zvinooniswa; ndizvo ngokudaro unozowa pashi ngehope yake nokudira Mwari, echironza kuti, “Mwari uri pakati penyu ngegwinyiso.”

Kurongwa kwoKudira muMhatso yaMwari

²⁶ Ndizvo chiinyi, hama? Apo mwooungana pamwepo, uwo nouwo unenduyo, chidzidziso, chioniso, ndimi nokukhumucha. Zviro zveshe ngazviitwe zvinoaka.

²⁷ Kudai aripo munhu nokuti ngouri unoereketa ngendimi, ngavaite vairi nokuti vasikapindi vatatu, ngavaite ngokuteererana; noumweni ngaakhumuche.

²⁸ Asi kudai pasina unokhumucha, ngaanyarare muchiara, ngaadziereketere ega nokunaMwari.

²⁹ Vaprofeti vairi nokuti vatatu ngavaerekete nevamweni ngavazvipime.

³⁰ Asi kudai chiro chechioniswa kuno umweni unogara apo, wokutanga ngaanyarare.

³¹ Ngokuti imwimwi mweshe mungaprofeta ngokuteererana, kuti veshe vadzidze nokuti veshe vaembedzerwe.

³² Nomweya yevaprofeti inopfaira vaprofeti,

³³ ngokuti Mwari andiyepi Mwari wehohoho, asi wokunyarara. Kudai ngezvezvakaita kuzviara zveshe zvevakacheneswa,

³⁴ vakadzi ngavanyarare muzviara. Ngokuti akutenderwi kwavari kuti vaerekete, asi ngavapfaire kudai ngezvinoronzwa ngeMipango.

³⁵ Kudai vechida kuzia chiro, ngavabvunze kuvamuna vavo vaakanyi. Ngokuti zvinotsverudza kuti mukadzi aerekete muchiara.

³⁶ Nokuti izwi raMwari rakatanga kubuda kubva kwomuri here? Nokuti rakagumira imwimwi mwega here?

³⁷ Kudai aripo munhu unopinimidza ngokwake kuti uri muprofeti nokuti uri womweya, ngaazvitende izvo zvendinonyora kwomuri, kuti zviri mipango yaMambo.

³⁸ Asi kudai aripo munhu usikabatiki ngeizvi, musabatikawo ndiye.

³⁹ Ndizvo, hama dzangu, emurirai kuti muprofete, musarambidza kuereketa ngendimi.

⁴⁰ Asi zveshe ngazviitwe ngenjira inosisira nokuteererana.