1 VaK. 12 - Bhaibheri Rakachena muChindau

Zvipo zvoMweya Wakachena

¹ Zvino ngendaa yezvipo zvoMweya, hama, andidi kuti muite vasikazii.

² Munozia kuti apo muchiri mahedheni mwaikweyiwa kuenda kune iyo miedzaniso isikaereketi, kunyazwi mwaikweyiwa ngenjira yakadini.

³ Ndizvo ndinoda kuti muzwisise kuti akuna munhu, unoereketa ndiMweya waMwari, ungaronza kuti, “Jesu wakatukwa!” Zve, akuna munhu ungaronza kuti, “Jesu ndiMambo”, kwega atungamirirwa ndiMweya Wakachena.

⁴ Zvino zviripo zvipo zvakaparadzana, asi Mweya ndiumwe;

⁵ kuripozve kuparadzana kwokushandira, asi Mambo ndiumwewo;

⁶ kuripozve kuparadzana kwemishando, asi Mwari umwe, uwo unoshanda zviro zveshe kwavari veshe.

⁷ Asi kuno munhu weshe kunopuwa kuoniswa kwoMweya, kuti veshe vafumiswe.

⁸ Ngokuti kuno umwe kunopuwa kubudikidza ndiMweya izwi roungwaru, nokuno umweni kunopuwa izwi roruziyo, ndiMweya umwewo.

⁹ Kuno umweni kunopuwa kugonda, kubudikidza ndiMweya umwewo, nokuno umweni kunopuwa zvipo zvokuponesa, kubudikidza ndiMweya umwewo,

¹⁰ nokuno umweni kunopuwa kuita mishando yokuita mishamiso, nokuno umweni kunopuwa kuprofeta, nokuno umweni kunopuwa kuzwisisa mweya, nokuno umweni kunopuwa kuereketa ngendimi dzakaparadzana, nokuno umweni kunopuwa kududzira ndimi.

¹¹ Asi izvi zveshe zvinoshandwa kubudikidza ngaumwe ndiMweya umwewo; unokoanisira kuno munhu umwe ngaumwe, kudai ngokuda kwake.

Muiri Une Marupande Akawanda

¹² Ngokuti kudai ngomuiri umwe, unemarupande akawanda, nemarupande eshe omuiri akanyawanda ari muiri umwe, ndizvo zvakaitawo Kristu.

¹³ Ngokuti isusu teshe takabhabhatidzwa muMweya umwe kuita muiri umwe, vaJudha nokuti vaGiriki, vakasungwa nokuti vakasunhurika, nesu teshe takaitwa kuti timwe kuMweya umwewo.

¹⁴ Ngokuti muiri auizwi ngerupande rumwe, asi ngemarupande mazhinji.

¹⁵ Kudai tsoka yechiti, “Ngokuti andiri nyarapi, andichiri womuiripi”, izvo zvingaita kuti isaita nhengo yomuiri here?

¹⁶ Nokudai nzee yechiti, “Ngokuti andiri dzisopi, andichiri womuiripi;” izvo zvingaita kuti isaita nhengo yomuiri here?

¹⁷ Kudai muiri weshe waiya dziso, kuzwa kwaizoapari? Kudai weshe waiya nzee, kunuhwidza kwaizoapari?

¹⁸ Asi kuti ngezvezvakaita zvino Mwari wakaemesa marupande mumuiri rumwe ngarumwe, kudai ngokuda kwake.

¹⁹ Kudai eshe aiya rupande rumwe, muiri ungazoapari?

²⁰ Asi zvino kunemarupande mazhinji, asi muiri umwe.

²¹ Dziso aringakoni kuronza kunenyara kuti, “Andikutami iwewe,” nokutizve soro aringakoni kuronza kudaro kunemirenje, “Andikutami iwewe.”

²² Haiwa, marupande omuiri awo anoringirika akarembedzeka, ndiwo anopinda kudikanwa,

²³ naawo marupande omuiri etinopinimidza ndiwo kuti aanyanyi kuremeredzwa, ndiwo etinoremeredza kakurutu, nemarupande edu asikanasi kuringirika, ndiwo anoringirika akapinda kunaka;

²⁴ apo marupande edu anoringirika aatami kuremeredzwa. Asi Mwari wakaronga muiri, echipa kuremeredzwa kukurutu kuno urwo rupande rwaikutama,

²⁵ kuti kusazoapo kuparadzana mumuiri, asi kuti marupande eshe angwarirane rumwe kuno rumweni.

²⁶ Kudai rupande rumwe rwechitambudzika, marupande eshe anotambudzika pamwepo narwo; kudai rupande rumwe rwechiremeredzwa, marupande eshe anodakara pamwepo narwo.

²⁷ Zvino imwimwi muri muiri waKristu, uwo nouwo muri marupande awo.

²⁸ NaMwari wakaemesa muchiara, vokutanga vapostori, vechipiri vaprofeti, vechitatu vadzidzisi, ngesure vaiti vemishamiso, ngesure zvipo zvokuponesa, vadetseri, vatungamiriri nevaereketi vendimi dzakaparadzana.

²⁹ Veshe vapostori here? Veshe vaprofeti here? Veshe vadzidzisi here? Veshe vaiti vemishamiso here?

³⁰ Veshe vanezvipo zvokuponesa here? Veshe vanoereketa ngendimi here? Veshe vanodudzira here?

³¹ Asi itai vanodisisa zvipo zvakapinda kukura. Asi ndinomuonisa njira yakapinda kunaka.