1 VaK. 11 - Bhaibheri Rakachena muChindau

¹ Itai vaedzereri vangu, kudai ndiniwo ndiri muedzereri waKristu.

Kufukidza Masoro muMidiro

² Zvino ndinomuirikidza ngokuti munondikarakadza ngezviro zveshe nokubatirira kuzviemeso kudai ngezvendakazvipira kwomuri.

³ Asi ndinoda kuti muzie kuti Kristu ndiye soro romunhu weshe, nomwamuna ndiye soro romukadzi wake, naMwari ndiye soro raKristu.

⁴ Kunyazwi ndiani mwamuna unokumbira nokuti kuprofeta anesoro rakafukidzwa, aaremeredzi soro rake.

⁵ Asi mukadzi weshe unokumbira nokuti kuprofeta anesoro rake risikazi kufukidzwa, aaremeredzi soro rake, ngokuti kudai zvakadaro, zvakatodzana nokuparwa soro rake.

⁶ Ngokuti kudai mukadzi asikazi kudzifukidza pachake, ngaagundwe bvudzi rake. Asi kudai zvechitsverudza kuti mukadzi agundwe nokuti kuparwa, ngaafukidze soro rake.

⁷ Ngokuti azvisisiri kuti mwamuna afukidze soro rake, ngokuti iye muedzaniso nouthende hwaMwari; asi mukadzi ndiye uthende hwomwamuna.

⁸ Ngokuti mwamuna aazi kubva kumukadzi, asi mukadzi wakabva kumwamuna.

⁹ Ngokuti mwamuna aazi kusikirwa mukadzi, asi mukadzi wakasikirwa mwamuna.

¹⁰ Ngeiyi ndaa kunosisira kuti mukadzi afukidze soro rake kuonisa kuti uri pashi pesimba remwamuna wake ngendaa yengirosi.

¹¹ Zvakanyadaro mukadzi aari ngokubanze kwomwamunapi, nokuti mwamuna aari ngokubanze kwomukadzipi kunaMambo.

¹² Ngokuti kudai ngomukadzi wakabva kuno mwamuna, ngokudaro mwamuna unobarwa ngomukadzi; asi zviro zveshe zvakabva kunaMwari.

¹³ Dzigurirei mwemene; zvinosisira here kuti mukadzi akumbire kunaMwari anesoro risikazi kufukidzwa?

¹⁴ Amudzidziswi here ngechibarirwe chenyu kuti, kudai mwamuna ane bvudzi rakareba, rinomutsverudzisa,

¹⁵ asi kudai mukadzi anebvudzi rakareba, riri uthende kwaari? Ngokuti bvudzi rake rakahinwa kwaari kumufukidza.

¹⁶ Asi kuti aripo munhu unooneka, echida kuita hasha, atina muitiro wakadaro, kunyazwi nezviara zvaMwari azvinawo.

Kudya KwaMambo

¹⁷ Asi ndechimupa uku kupanga, andimuirikidzi akadi, kuti munoungana pamwepo musikaunganiri zvakapinda kunaka, asi munounganira zvakapinda kushata.

¹⁸ Ngokuti kutanga kwazvo zveshe, naapo mwoungana muchiara, ndinozwa kuti kuripo kuparadzana pakati penyu; neni ndinotenda zvimweni zvazvo.

¹⁹ Ngokuti ngegwinyiso kunosisira kuti kuapo kuparadzana pakati penyu, kuti zvinase kuoneka pamhene kuti ngevari vanoashirika.

²⁰ Naapo mwaungana pamwepo, asikutipi mudye kudya kwaMambo.

²¹ Ngokuti apo nguva yaguma yokudya, munhu weshe unodzitorera kutangira vamweni kudya kwake; umweni unenzara noumweni waradza.

²² Chiinyi! Amuna here mhatso dzokudyira nedzokumwira? Nokuti munoshoora here chiara chaMwari nokuvatsverudza avo vasina chiro? Ndinozotinyi kwomuri? Ndinozomuirikidza ngeichi here? Ngendaa iyi andimuirikidzi.

²³ Ngokuti ndakaashira kubva kunaMambo, icho chendakapawo kwomuri, kuti Mambo Jesu ngousiku uhwo hwaakatengeswa ndihwo, wakatora chingwa,

²⁴ naapo abonga, wakachigura, akati, “Uyu ndiwo muiri wangu, unogurwa ngendaa yenyu. Itai ichi mukundikarakadza.”

²⁵ Ngokudarozve wakatora tsani, ngesure kwokudya echiti, “Tsani iyi ndiyo chitenderano chitsva mungazi yangu. Itai ichi nguva dzeshe dzomunomwa kweiri, mukundikarakadza.”

²⁶ Ngokuti nguva dzeshe dzomunodya ichi chingwa nokumwa kuiyi tsani, munoteketesa kufa kwaMambo metsa auye.

Kudya Chidyo chaMambo ngeNjira Isikasisiri

²⁷ Ndizvo, kunyazwi ndiani unozodya chingwa nokuti kumwa kutsani yaMambo ngenjira isikasisiri, unozoita ndaa yomuiri neyengazi yaMambo.

²⁸ Asi munhu ngaadziringire pachake, adaro ngaadye kuneicho chingwa nokumwa kuneiyo tsani.

²⁹ Ngokuti uwo unodya nokuti kumwa, asikanasi kuzwisisa muiri, unodyira nokuti kumwira kutongwa pachake.

³⁰ Ngeiyi ndaa vazhinji venyu vakarembedzeka nokurwara, nevazhinji vakafa.

³¹ Asi kudai isusu pachedu takadziringira, taizodai tisikatongwi.

³² Asi apo petinotongwa, tinoororwa ndiMambo, kuti tisazorashwa pamwepo nevenyika.

³³ Ndizvo, hama dzangu, apo mwoungana pamwepo kuti mudye, emeranai.

³⁴ Kudai aripo unenzara, ngaadye kanyi, kuti kuungana kwenyu kusazoita kuti mutongwe. Ngendaa yezviro zvimweni ndinozozvirongedza ndauyeyo.