1 VaK. 10 - Bhaibheri Rakachena muChindau

Phauri Unopanga Vatendi ngendaa yoKudira Miedzaniso

¹ Andidi kuti muite vasikazii, hama, kuti madzibaba edu eshe aiya pashi pegore, navo veshe vakaambuka ruandhle,

² navo veshe vakabhabhatidzwa munaMosi mugore nomuruandhle,

³ navo veshe vakadya kudya kumwekwo kwomweya,

⁴ navo veshe vakamwa kumwa kumwekwo kwomweya. Ngokuti vakamwa kubva pabuwe romweya rakavateera, nebuwe iro raiya Kristu.

⁵ Asi Mwari aazi kudakadzwa ngevazhinji vavo, ngokuti vakapedzwa mushango.

⁶ Zvino zviro izvi zvinoita zvionero zvedu kuti isusu tisazoemura zvakashata, kudai ngezvakaemura avo.

⁷ Musazoita vanodira miedzaniso, kudai ngezvakaitwa ngevamweni vavo; kudai ngezvakanyorwa kuti, “Vanhu vakagara pashi kudya nokumwa, vakamirukazve kutamba.”

⁸ Atisisiri kudzipinza mundaa dzokuomba kudai ngezvevakaita vamweni vavo, vakaurawa ngezuva rimwe vanhu makumi mairi namatatu emakumi emazana.

⁹ Atisisiri kuedza Kristu, kudai ngezvavakamuedza vamweni vavo, navo vakapedzwa ngenyoka.

¹⁰ Nemwi musazovhuruvhuta kudai ngezvevakavhuruvhuta vamweni vavo, navo vakapedzwa ngoMuurayi.

¹¹ Asi izvi zviro zvakaitwa kwavari kuita zvionero; nazvo zvakanyorwa kuti zvitingwadze, isusu tagumirwa ngokupera kwenyika.

¹² Ndizvo iye unokarakadza kuti unoema, ngaangware kuti asazowa.

¹³ Akuna kuedzwa kwakamugumira ukwo kusikazi kugumira vanhu vamweni. Mwari unogondeka, naye aazotendi kuti muedzwe kupinda simba romunaro, asi pakuedzwa unozomunasirirazve njira yokupokonyoka ndiyo, kuti mukone kuwa nesimba rokushingirira.

¹⁴ Ndizvo, vanodikanwa vangu, tizai kubva mukudira miedzaniso.

¹⁵ Ndinoita kudai ngounoereketa kunevakangwara; pinimidzai pachenyu zvendinoronza.

¹⁶ Tsani yokubonga, yetinobonga ndiyo, andiyopi yokuiyana mungazi yaKristu here? Chingwa icho chetinogura, andichopi chokuiyana mumuiri waKristu here?

¹⁷ Ngokuti pane chingwa chimwe, isusu tinyari vazhinji, tiri muiri umwe. Ngokuti isusu teshe tinodya chingwa chimwe.

¹⁸ Ringirai vaIsuraeri vari venyama. Avo vanodya midiro inopirwa, avana kuiyana here nearita?

¹⁹ Ndizvo, ndotinyi zvino? Ndinozoronza here kuti chiro chakapirwa miedzaniso yokudira chine shwiro nokuti muedzaniso chiro chine shwiro?

²⁰ Asi izvo zviro zvevanopira, vanozvipira kunemadhimoni, haiwa kunaMwari. Neni andidi kuti muiyane nemadhimoni.

²¹ Amungamwi kubva kunetsani yaMambo nokutsani yemadhimoni. Amukoni kudya kubva patafura raMambo nepatafura remadhimoni.

²² Nokuti isusu tinoda kumusa ndurumwa yaMambo here? Isusu takagwinya kumupinda here?

²³ “Zviro zveshe zvinotenderwa,” asi andizvopi zviro zveshe zvinodetsera. “Zviro zveshe zvinotenderwa,” asi andizvopi zviro zveshe zvinoaka.

²⁴ Kusazoapo munhu unodzitsvakira zvake, asi zvoumweni.

²⁵ Idyai cheshe chinotengeswa pamusika wenyama, musikabvunzi mubvunzo ngendaa yemhumba,

²⁶ ngokuti, “Nyika ngeyaMambo Mwari, nazvo zveshe zvirimwo.”

²⁷ Kudai umwe weavo vasikatendi echimukoka koodya, nemwi mwechida kuenda, idyai cheshe chinoiswa pamberi penyu, musikabvunzi mubvunzo ngendaa yemhumba.

²⁸ Asi kudai aripo munhu unozoti kwomuri, “Ichi chakapirwa kune miedzaniso yokudira,” musachidya, ngendaa youwo wachironza kwomuri, uye ngendaa yemhumba.

²⁹ Andironzi ngendaa yemhumba yako, asi ngendaa yemhumba youmweni, ngokuti kusunhurika kwangu kunotongwa ngenyi ngemhumba youmweni?

³⁰ Kudai ndechidya ndechibonga, ngenyi ndechitukwa ngendaa yeizvo zvendinobonga?

³¹ Ndizvo kunyazwi mwechidya nokuti mwechimwa, kunyazwi chiinyi chomunoita, itai zveshe mukukudza Mwari.

³² Musapumhunisa vaJudha nokuti vaGiriki nokuti chiara chaMwari,

³³ kudai ndiniwo ndinoedza kudakadza vanhu veshe ngezviro zveshe zvendinoita, ndisikatsvaki kuuyirwa kwangu, asi kuuyirwa kwevazhinji, kuti vaponeswe.