1 VaK. 1 - Bhaibheri Rakachena muChindau

Kuchingamidza

¹ Phauri, wakadaidzwa kuita mupostori waKristu Jesu ngokuda kwaMwari, naSosithenesi hama yedu,

² kuchiara chaMwari icho chiri muKhorinte, kwavari vakacheneswa munaKristu Jesu, vakadaidzwa kuita vakacheneswa, pamwepo naavo veshe vari kundau dzeshe vanodaidza zina raMambo wedu Jesu Kristu, Mambo wavo nowedu.

³ Nyasha ngadzigare kwomuri nokunyarara kunobva kunaMwari Baba edu naMambo Jesu Kristu.

Zvifumiso munaJesu Kristu

⁴ Ndinobonga Mwari wangu ngenguva dzeshe ndimwi, ngendaa yenyasha dzaMwari dzakapuwa kwomuri munaKristu Jesu,

⁵ ngokuti muzviro zveshe mwakafumiswa mwaari mukuereketa kweshe nomukuzia kweshe,

⁶ kudai ngouchapupu ndiKristu hwakagwinyiswa mukati mwenyu,

⁷ kuti musatama chipo chomweya apo mwechigarira kuoniswa kwaMambo wedu Jesu Kristu.

⁸ Uwo unozomugwinyisawo metsa kumagumo, kuti muite vasikaitirwi ndaa ngezuva raMambo wedu Jesu Kristu.

⁹ Mwari unogondeka, uwo wemwakadaidzwa ndiye mukuiyana noMukororo wake, Jesu Kristu Mambo wedu.

Kuparadzana muChiara

¹⁰ Zvino ndinomupota, hama, ngezina raMambo wedu Jesu Kristu, kuti mweshe muerekete chiro chimwecho, zve, kuti kusaapo kuparadzana pakati penyu, asi kuti muite vakasungwa pamwepo mumupinimidzo umwe nebiningidzo rimwero.

¹¹ Ngokuti kwakaronzwa kwendiri, hama dzangu, ngaavo vemhuri yaKhroe, kuti dziripo hasha pakati penyu.

¹² Zvendinoronza ngeizvi, kuti umwe ngaumwe wenyu unoti, “Inini ndiri waPhauri,” nokuti, “Inini ndiri waAporosi,” nokuti, “Inini ndiri waKhefasi,” nokuti, “Inini ndiri waKristu.”

¹³ Kristu wakaparadzaniswa here? Phauri wakakohomerwa here ngendaa yenyu? Nokuti mwakabhabhatidzwa here ngezina raPhauri?

¹⁴ Ndinobonga Mwari kuti andizi kubhabhatidza naumwe wenyu, kwega Krispusi naGaiusi,

¹⁵ kuti kusaapo naumwe ungazoti, mwakabhabhatidzwa ngezina rangu.

¹⁶ (Inini ndakabhabhatidzawo vemhuri yaStefanasi, ngokubanze kwavo andikarakadzi kuti ndakabhabhatidza umwenizve.)

¹⁷ Ngokuti Kristu aazi kundituma kuti ndibhabhatidze, asi kuti ndichumaire vhangeri, haiwa ngoungwaru hwemazwi, kuti ngokudaro muchinjiko waKristu usazoitwa usina shwiro.

Kristu iSimba noUngwaru hwaMwari

¹⁸ Ngokuti izwi romuchinjiko upenzi kwavari vanopera, asi kwetiri isusu tinoponeswa, isimba raMwari.

¹⁹ Ngokuti kwakanyorwa kuti, “Ndinozoparadza ungwaru hwevakangwara nokuzwisisa kwevanozia ndinozokurasha.”

²⁰ Uripari wakangwara? Iripari ngwazi yokufunda? Iripari ngwazi yokuereketa yeiyi nguva? Mwari aazi kuzviita upenzi here zvoungwaru hweiyi nyika?

²¹ Ngokuti, muungwaru hwaMwari, nyika aizi kuzia Mwari kubudikidza ngoungwaru hwayo, kwakadakadza Mwari, kubudikidza ngoupenzi hwokuchumaira, kuti avo vanotenda avaponese.

²² Ngokuti vaJudha vanokumbira chioniso nevaGiriki vanotsvaka ungwaru,

²³ asi isusu tinochumaira Kristu wakakohomerwa, kuvaJudha chipumhuniso nokunevemadzinza upenzi,

²⁴ asi kwavari vakadaidzwa, veshe vaJudha nevaGiriki, Kristu simba raMwari noungwaru hwaMwari.

²⁵ Ngokuti upenzi hwaMwari hwakapinda kungwara kuneungwaru hwevanhu; nokurembedzeka kwaMwari kwakapinda kugwinya kunekugwinya kwevanhu.

²⁶ Ngokuti ringirai kudaidzwa kwenyu, hama, kuti akuna vazhinji venyu vakangwara ngokwenyama, akuna vazhinji vane simba, akuna vazhinji vanoremeredzwa, vanodaidzwa.

²⁷ Asi Mwari wakatsanangura zviro zvoupenzi munyika, kutsverudza vakangwara; Mwari wakatsanangura zviro zvakarembedzeka munyika kutsverudza zvakagwinya.

²⁸ Mwari wakatsanangura zviri pashi nezvinoshoorwa munyika, kunyazwi nezviro zvisipo, kuita kuti zviripo zviite zvisina shwiro,

²⁹ kuti kusazoapo naumwe unozoganza pamberi paMwari.

³⁰ Ndiye chinyuka chokupona kwenyu munaKristu Jesu, uwo wakaitwa ungwaru hwedu ndiMwari, nokururama kwedu, kucheneswa nokuripirwa,

³¹ kuitira kuti kudai ngezvakanyorwa, “Iye unoganza, ngaaganze ndiMambo Mwari.”