1 Tim. 6 - Bhaibheri Rakachena muChindau

¹ Veshe vari pashi pejoka rouhloko ngavazie kuti madzimambo avo anosisira kuremeredzwa kweshe, kuti zina raMwari nezvidzidziso zvisazotukwa.

² Avo vane madzimambo anotenda vasazovashoora ngokuti ihama, asi vanosisira kuvashandira, ngokuti avo vanoashira kudetserwa vari vatendi nevanodikanwa. Dzidzisa nokupanga izvi.

Rudzidziso rwoKunyepa noUpfumi hweGwinyiso

³ Kunyazwi ndiani unodzidzisa zvidzidziso zvakaparadzana asikatendi mazwi egwinyiso aMambo wedu Jesu Kristu nezvidzidziso zvinozwanana nokudzidzisa kwaMwari,

⁴ unodzikudza, asikazii chiro, asi unodisisa mibvunzo nehasha dzemazwi, kwezviri kunobva ndurumwa nehasha nokutuka nokupinimidzira zvakashata,

⁵ nokuphikisana pakati pevanhu vane mipinimidzo yakashaishwa, vakarashikirwa ngegwinyiso, vechikarakadza kuti kudira Mwari injira yokuuyirwa.

⁶ Eya, kuripo kuuyirwa kukurutu mukudira Mwari pamwepo nokugutiswa;

⁷ ngokuti atizi kuuya nechiro munyika muno, ndizvo atikoni kutora chiro kuenda nacho.

⁸ Asi kudai tine zvokudya nezvokufuka, tinozogutiswa ndizvo izvi.

⁹ Asi avo vanodisisa kuita makurudza vanowira mukuedzwa, nokubatwa ngomurau woupenzi uzhinji wokuemura kunoremadza, kunonzvaidza vanhu mukufa nomukurashwa.

¹⁰ Ngokuti kudisisa mare ndiyo nzinde yembeu dzeshe dzokushata, nomukudisisa kwavo kuita makurudza vamweni vakapauswa kubva mukugonda, vakadzibaya ngemadambudziko mazhinji.

Phauri Unopanga Thimothi

¹¹ Asi iwewe, munhu waMwari, tiza izvi; uteere kururama, kudira Mwari, kugonda, rudo, kusengerera, kupfaa.

¹² Ambana kuambana kwakanaka kwokugonda, batisisa kupona kusikaperi kwewakadaidzirwa, ukaita uchapupu hwakanaka mukuona kwezvapupu zvizhinji.

¹³ Ndinokupanga mukuona kwaMwari, uwo unopa kupona kuzviro zveshe, nokwaKristu Jesu, uwo wakapupura uchapupu hwakanaka pamberi paPhontiusi Piratu,

¹⁴ kuti ungwarire mipango usina ara, usikashooreki metsa pakuoneka kwaMambo wedu Jesu Kristu,

¹⁵ kwaachazoonisa ngenguva kwayo, uwo ega wakafumiswa noweumambo, Mambo wemadzimambo noMutongi wevatongi.

¹⁶ Ndiye ega usikatongofi unogara mukujeka kusikagumirwi, uwo usina naumwe wakambomuona nokuti kukona kuoneka; kwaari ngakugare kuripo kuremeredzwa nesimba zvisikaperi. Ameni.

¹⁷ Panga avo vari makurudza munyika muno kuti vasadzikudza nokuti kuemesa kugonda kwavo paupfumi husikagari, asi kunaMwari, uwo unotipa kakurutu zveshe kuti tidakare ndizvo;

¹⁸ kuti vaite zvakanaka, vaite vapfumi kumishando yakanaka, vadakarire kupa vamweni nevakanasirira kukowana,

¹⁹ vechidziunganidzira ugaro hwakanaka hwenguva inouya, kuti vabatisise kupona ukwo kwegwinyiso.

Kupanga KwaPhauri noMukumbiro weNyasha

²⁰ Iwewe Thimothi, ngwarira icho chakapuwa kwouri. Furatira kuereketa kusina shwiro ndiMwari nokuramba kuzia zviri zvokunyepa;

²¹ ngokupupura ndizvo vamweni vakapauka kubva mukugonda. Nyasha ngadzigare nemwi.