1 Tim. 5 - Bhaibheri Rakachena muChindau

Mushando waThimothi kuvaKristu

¹ Usaganyira musharuka asi mupote kudai ndibaba, nemajaha matsva kudai ngehama,

² nemadzimbuya kudai ngaanamai, nevakadzi vatsva kudai ngevakunda, mukusukika kweshe.

³ Remeredza shirikadzi idzo dziri shirikadzi ngegwinyiso.

⁴ Asi kudai shirikadzi inevana nokuti vazukuru, ngavatange kudzidza zvidzidzo zvavo zvokudira Mwari pamhuri yavo nokuhwirinzira ngezvakanaka kuvabari vavo; ngokuti izvi zvinodakadza mukuona kwaMwari.

⁵ Zvino shirikadzi yegwinyiso, yakasiiwa yega, inogonda muna Mwari, inoangira kupota nokukumbira usiku namasikati;

⁶ asi uwo unokarira zvinodakadza wakafa kunyazwi echinyapona.

⁷ Panga izvi zviro, kuti vaite vasikashooreki.

⁸ Asi kudai aripo usikangwariri hama dzake, kakurutu avo vomuzi wake, watoramba kugonda naye washata kupinda uwo usikatendi.

⁹ Usatendera kuti shirikadzi inyorwe zina isati yapedza makore makumi matanhatu okubarwa, yaiya mukadzi womwamuna umwe;

¹⁰ inembiri yakanaka yemishando yakanaka, yakarera zvakanaka vana, yaiashira vapfumba, yaisuka tsoka dzevakacheneswa, yaidetsera vanotambudzika, yaigwinya kubatirira kumishando yeshe yakanaka.

¹¹ Asi ramba kunyora mazina eshirikadzi itsva. Ngokuti apo chidisiso chokuda mwamuna chavakurira, vatsvatsvana naKristu, vanozoda kuroorwa,

¹² vane ndaa ngokuti vakaramba kugondisa kwavo kwokutanga.

¹³ Zve, vanodzidza kuita nungo, vechipepesheka kubva pamhatso kuenda pamhatso, vasikateri kuita nungo kwega, asi kuitawo gunyengu, vasikarekeri zvevamweni, vechiereketa zvisikasisiri.

¹⁴ Ndizvo ndinodisisa kuti shirikadzi itsva dziroorwe, dzibare vana, dzingwarire mizi yadzo, dzisapa gaa ndau yokutituka ndiyo.

¹⁵ Ngokuti vamweni vatopauka kuteera Sathani.

¹⁶ Kudai aripo mukadzi mutendi unehama shirikadzi ngaadzidetsere, kuti chiara chisazodzimbirwa, kuti chidetsere avo vari shirikadzi ngegwinyiso.

¹⁷ Vakuru vanonasa kutungamirira ngavaziikanwe kuti vanosisira kuremeredzwa kwakahwirinzirwa, kakurutu avo vanoshanda mushando weizwi nowokudzidzisa;

¹⁸ ngokuti zvinyorwa zvinoti, “Usazosunga muromo wen'ombe inopura zviyo,” zve, “Mushandi unosisira musharo wake.”

¹⁹ Usatenda kuashira ndaa inopomerwa munhu mukuru, asi kuti yechipupurirwa ngezvapupu zviiri nokuti zvitatu.

²⁰ Avo vanoangira kushaisha, uvarambidze pamberi pavo veshe, kuti vamweni navo vatye.

²¹ Ndinokupanga mukuona kwaMwari nokwaKristu Jesu nekwengirosi dzakatsanangurwa, kuti ungwarire izvi usikatsananguri, usikaiti chiro ngomukheto.

²² Usakasira kuisa nyara padera pomunhu, usaashidzana nevanhu vamweni zvishaishi zvavo; dzingwarire kuti ugare wakasukika.

²³ Usachamwa mvura yega, asi imwa vhini shomani ngendaa yomundani mwako neyokurwara kwako kuzhinji.

²⁴ Zvishaishi zvevanhu vamweni zviri pamhene, zvinoenda pamberi mukutongwa, nezvishaishi zvevamweni vanhu zvinovateera ngesure.

²⁵ Ngokudaro iriyo mishando yakanaka iri pamhene; neiyo isikazi kudaro aikoni kufishika.