1 Tim. 4 - Bhaibheri Rakachena muChindau

Vadzidzisi voKunyepa

¹ Zvino Mweya unoronza pamhene kuti ngemikuwo yokugumisira vamweni vanozopauka kubva mukugonda ngokupurutana kumweya inochengedzera nezvidzidziso zvemadhimoni,

² kubudikidza ngokuchengedzerwa ngevanoereketa mazwi emanyepo, vakapishwa mhumba dzavo ngesimbi inopisha.

³ Vanorambidza kuroora nokurekera zvokudya, zvaakasika Mwari kuti zviashirwe ngokubonga ngaavo vanotenda nokuzia gwinyiso.

⁴ Ngokuti zvisikwa zveshe zvakasikwa ndiMwari zvakanaka, apana chinosisira kurambwa, kudai chechiashirwa ngokubonga;

⁵ ngokuti chinocheneswa ngeizwi raMwari nomukumbiro.

Muranda Wakanaka waKristu Jesu

⁶ Kudai wechironzera hama izvi zviro, unozoita mushandi wakanaka waKristu Jesu, wechikodzwa ngemazwi okutenda nechidzidziso chakanaka chowakateera.

⁷ Asi ramba ngano dzinotsverudza nedzembuya. Asi udzirovedzese kudira Mwari,

⁸ ngokuti kurovedzera mumuiri kunodetsera padoko, asi kudira Mwari kunodetsera kuzviro zveshe, ngokuti kunogondisa kupona kwazvino nokuchauya.

⁹ Rinogondeka izwi iri rinosisira kuashirwa kakurutu.

¹⁰ Ngokuti ndizvo zvetinotambudzikira nokurwadziwa, ngokuti gonda redu rakaemeswa munaMwari unopona, uri Muponesi wevanhu veshe, kakurutu weavo vanotenda.

¹¹ Panga nokudzidzisa izvi zviro.

¹² Usatendera munhu kuti ashoore utsva hwako, asi ita chionero kwavari vanotenda ngeizwi nokupona, murudo, mukugonda nomukusukika.

¹³ Gara wechidzidza zvinyorwa, kuchumaira nokudzidzisa, metsa ndiuye.

¹⁴ Usarekeredza chipo icho chiri mukati mwako, chowakapuwa kubudikidza ngokuprofeta nokuiswa kwenyara dzevakuru padera pako.

¹⁵ Tsamwirira kuita zviro izvi, udzipire pachako kwezviri, kuti kubudirira kwako kuoneke kwavari veshe.

¹⁶ Udzingwarire iwewe nokudzidzisa kwako; angirira kuita izvi zviro, ngokuti ngokuita izvi unozoponesa veshe iwewe naavo vanokuzwa.