1 Tim. 3 - Bhaibheri Rakachena muChindau

Vatungamiriri muChiara

¹ Izwi iri igwinyiso, kuti kudai munhu echitsvaka mushando woutungamiriri ukuru muchiara, unoemurira mushando wakanaka.

² Ndizvo mutungamiriri unosisira kuita usina ndaa, mwamuna womukadzi umwe, echidzibata, wakangwara mumupinimidzo, unoremeredzeka, unoashira vapfumba, unozia kudzidzisa,

³ haiwa chidhakwa, usikaambani, asi wakapfaa, usikaiti hasha, usikadisisi mare.

⁴ Unonasa kutonga muzi wake, unevana vake vanopurutana ngokuremeredza kweshe;

⁵ (ngokuti kudai munhu asikakoni kutonga muzi wake zvakanaka, ungazoita mangwaririrenyi chiara chaMwari?)

⁶ Asaita mutendi mutsva, kuti asadzikudza nokuwa mukurashwa kwaDhiabhorosi.

⁷ Zve, kunosisira kuti aite unopupurirwa zvakanaka ngeavo vari kubanze, kuti asazowa mukushoorwa nokubatwa pamurau waDhiabhorosi.

Vashandiri muChiara

⁸ Ngokudaro vashandi vanosisira kuti vaite vanoremeredzeka, vasina mazwi mairi, vasikanyanyi kumwa vhini, vasikakariri mare.

⁹ Vanosisira kunasa kubata chakafishika chokugonda ngemhumba isina ndaa.

¹⁰ Avo navo ngavatangwe kuedzwa; naapo vaonisa pachavo kuti apana chevanoitirwa ndaa, ngavaitwe vashandi.

¹¹ Vakadzi ngokudaro ngavaite vanoremeredzeka, vasikareyi, asi vanodzibata, vanogondeka ngezviro zveshe.

¹² Mushandi ngaaite mwamuna womukadzi umwe, echinasa kutonga zvakanaka vana vake nomuzi wake.

¹³ Ngokuti avo vanoshanda zvakanaka kudai ngevashandi vanopuwa zina rakaremeredzeka nokutsunga kukurutu mukugonda kuri munaKristu Jesu.

Kufishika Kwakakura

¹⁴ Ndinogonda kuuya kwouri ngokukasira, asi ndinonyora zviro izvi kwouri,

¹⁵ kuti kudai ndikanonoswa, muzie kuhamba kunosisira kuitwa ngevanhu mumhatso yaMwari, iyo iri chiara chaMwari unopona, sika nechidziro chegwinyiso.

¹⁶ Ngegwinyiso kufishika kwokudira kwedu kwakakura: Uwo wakaoniswa mumuiri, wakaruramiswa muMweya, wakaoneka ngengirosi, wakachumairwa pakati pevemadzinza, wakatendwa munyika, akaashirwa mudenga muuthende.