1 Tim. 2 - Bhaibheri Rakachena muChindau

Kudira kweChiara

¹ Ndizvo, pakutanga pazvo zveshe, ndinomukumbira kuti kupota nemikumbiro nokukumbirira nokubonga zviitirwe vanhu veshe,

² madzimambo naavo veshe vari pandau dzokuremeredzwa, kuti tipone mukuiyana nokunyarara mukudira Mwari nokuremeredza.

³ Izvi zvakanaka nezvinoashirika mukuona kwaMwari Muponesi wedu,

⁴ uwo unoda kuti munhu weshe aponeswe, azwisise gwinyiso.

⁵ Ngokuti uripo Mwari umwe, nomuiyanisi umwe pakati paMwari nevanhu, munhu uwo ndiKristu Jesu,

⁶ uwo wakadzipira pachake kuita muripo wavo veshe, kwakapupurwa ndikwo ngenguva kwayo.

⁷ Ukwo kwendakaemeserwa kuita muchumairi nomupostori (ndinoronza gwinyiso, andinyepi), mudzidzisi wevemadzinza mukugonda nomugwinyiso.

⁸ Ndizvo ndinoda kuti vamuna vakumbire kundau dzeshe, vechimirudza mudenga nyara dzakacheneswa pasina ushungu nehasha;

⁹ ngokudarowo kuti vakadzi vadzinemese mukuremeredzeka ngezvokufuka zvakasisira, haiwa ngebvudzi rakarukwa nomukore nokuti maperere nokuti ngezvokusimira zvinodhura.

¹⁰ Asi ngavadzinemese ngeizvo zvinosisira vakadzi vanoronza kuti vanodira Mwari, ngemishando yakanaka.

¹¹ Mukadzi ngaadzidze mukunyarara ngokudzipfaisa kweshe.

¹² Anditenderi mukadzi kuti adzidzise nokuti kutonga mwamuna; asi kuti anyarare.

¹³ Ngokuti Adhamu wakatanga kusikwa, sure kwazvo Evha;

¹⁴ naAdhamu aazi kuchengedzerwa, asi mukadzi wakachengedzerwa wakaita mupauki.

¹⁵ Asi unozoponeswa kubudikidza ngokubara vana, kudai echiangirira mukugonda, murudo, mukucheneswa pamwepo nokuremeredzeka.