1 Tim. 1 - Bhaibheri Rakachena muChindau

Kuchingamidza

¹ Phauri, mupostori waKristu Jesu ngokupanga kwaMwari Muponesi wedu naKristu Jesu gonda redu,

² ndinonyorera kunaThimothi, mwana wangu wegwinyiso mukugonda. Nyasha nokukungurirwa nokunyarara zvinobva kunaMwari Baba naKristu Jesu Mambo wedu ngazvigare newe.

Kupangwa ngendaa yeVadzidzisi voKunyepa

³ Kudai ngezvendakakupota apo ndaienda Masedhonia, kuti ugare muEfesu, upange vamweni kuti vasadzidzisa kudzidzisa kumweni

⁴ nokuti kupurutanazve kungano nokuerengudza kusikaperi kwemazina emadzibaba ekaretu, izvo zvinoamba hasha, zvisikadzidzisi zvakarongwa ndiMwari zvinoziikanwa ngokugonda.

⁵ Asi zvinodiwa ngomupango rudo runobva mumwoyo wakacheneswa, runobva mumhumba isina ndaa nokugonda kwegwinyiso.

⁶ Vanhu vamweni vechipauka vakakunukuka kuenda mukuereketa kusina shwiro,

⁷ vechidisisa kuita vadzidzisi veMipango, vasikazwisisi zvevanoronza nokuti zvevanonasa kugwinyisisa.

⁸ Asi tinozia kuti Mipango yakanaka, kudai munhu echizoishandisa ngenjira kwayo.

⁹ Izvi zvinoronza kuzwisisa, kuti Mipango aizi kuitirwa munhu wakarurama asi yakaitirwa vasikapurutani Mipango nevasikapangwi nevasikadi Mwari nevashaishi, inoitirwa vasikazi kucheneswa nevatuki, vanouraya madzibaba nevanouraya madzimai, vanouraya vanhu,

¹⁰ vaombi, mhombwe nevanoba vanhu, vanyepi nevanopika manyepo, nokuti kudai chiripo chimweni chinopesana nezvidzidziso zvakarurama,

¹¹ kudai ngezvinoronzwa ngevhangeri routhende hwaMwari unomuchena, rendakapuwa ngokugondwa.

Phauri Unobonga Mwari ngeNyasha dzake

¹² Ndinobonga Kristu Jesu Mambo wedu, uwo wakandipa simba, ngokuti wakandierenga kuita wakagondeka, akandiemesa kumushando wake,

¹³ kunyazwi karetu ndaiya mutuki, mutambudzi nomutinini. Asi zvakanyadaro ndakaitirwa nyasha, ngokuti ndakazviita ngokusikazia mukusikatenda,

¹⁴ nenyasha dzaMambo wedu dzakawanzwa kakurutu pamwepo nokugonda norudo zviri munaKristu Jesu.

¹⁵ Rinogondeka iri izwi rinosisira kuashirwa, kuti Kristu Jesu wakauya munyika kuponesa vashaishi, inini ndiri mukuru wavo.

¹⁶ Asi ngeiyi ndaa ndakaitirwa nyasha, kuti Jesu Kristu aonise kusengerera kwake kweshe mwendiri, ndiri mukuru wevashaishi, kuita chionero kwavari vanomutenda, kuti vaone kupona kusikaperi.

¹⁷ Kuna Mambo usikaperi, usikaori, usikaoneki, ndiye Mwari ega, ngaugare kwaari uthende nokuremeredzwa mhera nariini nariini. Ameni.

¹⁸ Ndinopa kupanga uku kwouri, Thimothi mwana wangu, kudai ngezvakaprofetwa ngendaa yako karetu, kuti ngokuzvipurutana uambane kuambana kwakanaka,

¹⁹ wechibatisisa kugonda nemhumba yakanaka. Vamweni vakakurasha, vakaputsikirwa ngengarava yokugonda kwavo;

²⁰ pakati pavo vakadaro paiya naHimenaeusi naArekizanda, vendakapa kunaSathani, kuti vadzidziswe kusikatuka Mwari.