1 Sam. 9 - Bhaibheri Rakachena muChindau

Sauri Unoshongana naSamueri

¹ Zvino kwaiyapo munhu weBhenjamini, zina rake raizwi Kishi, mukororo waAbhieri, mukororo waZerori, mukororo waBekhorathi, mukororo waAfia, muBhenjamini, munhu gurudza raiya nembiri.

² Waiya nomukororo, zina rake raizwi Sauri, jaha rakanaka nokuringirika. Paiya pasina pakati pavana vaIsuraeri munhu wakanaka kuringirika kupinda Sauri; kubvira pamapfudzi ake waiya akareba kupinda munhu weshe.

³ Zvino mbongoro dzaKishi baba aSauri dzaiya dzarashika. Ndizvo Kishi wakati kunaSauri mukororo wake, “Tora umwe wevarumbwana newe, umiruke kootsvaka mbongoro.”

⁴ Wakapinda ngomunyika yemitunhu yaEfuremu, akapindazve ngomunyika yeSharisha, asi avazi kudziona. Navo vakapindazve ngomunyika yeShaarimu, asi dzaiya dzisimwozve. Zvino wakapinda ngomunyika yevaBhenjamini, asi avazi kudziona.

⁵ Naapo vaguma kunyika yeZufi, Sauri wakati kumurumbwana waihamba naye, “Uya, ngatihwirire sure; pamweni baba angu avachapinimidzi ngembongoro, vopinimidza tisu.”

⁶ Asi murumbwana wakati kwaari, “Ringira zvino, uripo munhu waMwari mudhorobha iri, naye uri munhu unoremeredzeka. Zveshe izvo zvaanoronza zvinoitika ngegwinyiso. Ngatiendeyo zvino; pamweni ungatironzera ngenjira yetingateera.”

⁷ Zvino Sauri wakati kumurumbwana wake, “Asi, kuti techienda, tinozomuunzirenyi munhu uwo? Ngokuti chingwa chapera muzvidziyo zvedu, apanazve chipo chokupa kumunhu waMwari. Isusu tinenyi?”

⁸ Murumbwana wakapingurazve Sauri, akati, “Ndinacho pano munyara yangu chigurwa chesirivha; ndinozochipa kumunhu waMwari, kuti atironzere njira yedu.”

⁹ (Karetu munyika yaIsuraeri, munhu weshe waizoenda koobvunza ndiMwari, waizoti, “Uyai, ngatiende kunomufemberi;” ngokuti iye unodaidzwa zvino kuti muprofeti, waisimbodaidzwa kuti mufemberi.)

¹⁰ Sauri wakati kunomurumbwana wake, “Waronza zvakanaka; uya, ngatiende.” Ndizvo vakaenda kudhorobha umwo mwaigara munhu waMwari.

¹¹ Naapo vachakwira mutunhu kuenda kudhorobha, vakaona vasikana vaibuda koochera mvura, vakati kwevari, “Mufemberi urimwo here?”

¹² Navo vakapingura, vakati, “Eya, urimwo, pamberi penyu. Kasirai, ngokuti wauya zvinopano kudhorobha iri; ngokuti uripo mudiro wavanhu nyamashi pandau yakakwirira.

¹³ Naapo mwechipotera mudhorobha, munozomuona asati aenda koodya kundau yakakwirira. Ngokuti vanhu avazodyi metsa auya, ngokuti ndiye unofumisa mudiro; apedza izvo vakakokwa vanodya. Zvino kwirai, ngokuti munozomuona zvinopano.”

¹⁴ Ndizvo vakakwira kudhorobha. Naapo vachapotera mudhorobha, vakaona Samueri echibuda kuuya kwevari, echikwira kundau yakakwirira.

¹⁵ Zvino zuva risati raguma rokuuya kwaSauri, Mambo Mwari waiya aronzera Samueri echiti,

¹⁶ “Mangwani ngenguva ino ndinozotumira kwouri munhu unobva kunyika yeBhenjamini, newe unozomudzodza kuita mambo padera pevanhu vangu Isuraeri. Unozoponesa vanhu vangu kubva kunyara dzevaFiristia; ngokuti ndakaona kutambudzika kwevanhu vangu, ngokuti kuchema kwavo kwaguma kwendiri.”

¹⁷ Naapo Samueri aona Sauri, Mambo Mwari wakati kwaari, “Uyu ndiye munhu wendakaereketa ndiye kwouri! Uyu ndiye unozotonga vanhu vangu.”

¹⁸ Zvino Sauri wakakwedzera kunaSamueri pamusiwo, akati, “Ndironzere, ndapota, iri pari mhatso yomufemberi?”

¹⁹ Samueri wakapingura Sauri, akati, “Ndini mufemberi; kwirai pamberi pangu kundau yakakwirira, ngokuti munozodya neni nyamashi, asi mangwani ndinozomutendera kuti muende, ndinozomuronzera zveshe zviri mumwoyo mwenyu.

²⁰ Ngendaa yembongoro dzenyu dzaiya dzarashika mazuva matatu akapinda, musatambudzika ndidzo; ngokuti dzaoneka. Kudisisa kweshe kwevaIsuraeri kwakaiswa panaani? Akuri kwouri here, nepadera pemhatso yeshe yababa ako?”

²¹ Sauri wakapingura, akati, “Andisiri muBhenjamini here, wedzinza rakapindisisa kutsonga ramadzinza aIsuraeri? Nemhuri yangu yakapindisisa kutsonga pakati pemhuri dzeshe dzedzinza raBhenjamini. Ngenyi wechiereketa kudaro kwendiri?”

²² Zvino Samueri wakatora Sauri nomuranda wake womurumbwana, akavaunza kumhatso yevaeni, akavagarisa pandau yakapindisisa kuremeredzeka pakati paavo vakakokwa, vaida kukwana makumi matatu evanhu.

²³ NaSamueri wakati kunomubiki, “Uya norupande rwendakakupa, urwo rwendakati kwouri, ‘Rungwarire.’ ”

²⁴ Mubiki wakatora chitho neizvo zvechaiya nazvo, wakachiisa pamberi paSauri. Samueri wakati, “Wona, iyo yakangwarirwa yaiswa pamberi pako. Idye; ngokuti yagadzikwa pamberi pako ngomukuwo wakaemeswa kuti udye nevanhu vakakokwa.” Ndizvo Sauri wakadya naSamueri ngeiro zuva.

²⁵ Naapo vadzaka kudhorobha, kubva pandau yakakwirira, mubhedhi wakachingirwa Sauri padera pemhatso naye wakaatapo.

²⁶ Zvino vakamuka mangwanani maishi mambakwedza, Samueri wakadaidza Sauri padera pemhatso echiti, “Muka ndikuendese.” NaSauri wakamiruka, navo vakaenda veshe kubanze mupato, iye naSamueri.

Samueri Unodzodza Sauri Kuita Mutungamiri

²⁷ Naapo vachadzaka kumagumo edhorobha, Samueri wakati kunaSauri, “Ronza murumbwana kuti apinde mberi (naye wakapinda), asi iwewe chimboema kamukuwo, kuti ndikupangidzire izwi raMwari.”