1 Sam. 8 - Bhaibheri Rakachena muChindau

Vanhu Vanokumbira Kupuwa Mambo

¹ Naapo Samueri aamusharuka, wakaemesa vakororo vake kuita vatongi padera paIsuraeri.

² Zina redangwe raiya Joeri nezina rewechipiri raiya Abhija; ava vaiya vatongi muBheerishebha.

³ Asi vakororo vake avazi kuteera munjira dzake, asi vakapauka kutsvaka mare, vakatora zvitengero, avazi kutonga zvakanaka.

⁴ Zvino veshe vakuru vaIsuraeri vakaungana pamwepo, vakauya kunaSamueri muRama.

⁵ Vakati kwaari, “Ringira, iwewe waamusharuka, navakororo vako avateeri munjira dzako; ndizvo tiemesere mambo zvino, kuti atonge padera pedu kudai ngemadzinza amweni.”

⁶ Asi icho achizi kudakadza Samueri, apo pavakati, “Tipei mambo wokutitonga.” Samueri wakakumbira kunaMambo Mwari,

⁷ naMambo Mwari wakati kunaSamueri, “Purutana izwi revanhu nazvo zveshe zvevanoronza kwouri; ngokuti avazi kukuramba, asi vakandiramba inini, kuti ndisaita mambo padera pavo.

⁸ Kudai ngezvevakaita kwendiri kubvira zuva rendakavabudisa kubva muEgipite metsa kuiri zuva, vakandisiya nokushandira zvimwari zvimweni, ndizvo vanoitazve kudaro kwouri.

⁹ Ndizvo zvino, purutana kuizwi ravo; kwega vapange kakurutu, nokuvaonisa kuti ndimambo wakadini uwo unozovatonga.”

¹⁰ Ndizvo Samueri wakaronza mazwi eshe aMambo Mwari kuneavo vakakumbira kwaari kupuwa mambo.

¹¹ Naye wakati, “Idzi ndidzo njira dzamambo unozotonga padera penyu: unozotora vakororo venyu nokuvaemesa kwaari kuita vanhu vengoro dzake, nevanhu vemahachi ake, nevanozorumba pamberi pengoro dzake.

¹² Naye unozodziemesera nduna padera pemakumi emazana, nenduna padera pemakumi mashanu; unozovaemesa kuvhuna munda wake, nokucheka zviyo zvake, nokupfura zvokurwisa ndizvo zvake, nezviro zvengoro dzake.

¹³ Unozotora vanasikana venyu kuita vaengi vemafuta emakha, nokuita vabiki vezvingwa.

¹⁴ Naye unozotora minda yenyu yakapindisisa kunaka, neminda yenyu yemivhini neyemiorivhi, echiipa kuvaranda vake.

¹⁵ Naye unozotora rupande rwegumi rwembeu dzenyu, nerweminda yenyu yomuvhini, nokurupa kunenduna dzake nokuvaranda vake.

¹⁶ Unozotora hloko dzenyu, vamuna navakadzi, n'ombe dzenyu idzo dzakapinda kunaka, nembongoro dzenyu, nokuvaemesa mumushando wake.

¹⁷ Unozotorazve chegumi chezvifuyo zvenyu, nemwi munozoita hloko dzake.

¹⁸ Munozochema ngeiro zuva ngendaa yamambo wenyu, uwo wemwakadzitsanangurira; asi Mambo Mwari aazomupinguri ngezuvaro.”

¹⁹ Asi vanhu vakaramba kupurutana izwi raSamueri; navo vakati, “Haiwa! Asi isusu tinoda mambo padera pedu,

²⁰ kuti isusu tidai ngamadzinza amweni eshe; nokuti mambo wedu atitonge nokutitungamira, nokurwisana nevetinorwisana navo.”

²¹ Naapo Samueri azwa mazwi eshe evanhu ava, wakaahwirinzira mukuzwa kwaMambo Mwari.

²² Mambo Mwari wakati kunaSamueri, “Purutana izwi ravo, uvaemesere mambo padera pavo.” Samueri wakati kunevanhu vaIsuraeri, “Endai imwimwi, munhu weshe kudhorobha rake.”