1 Sam. 7 - Bhaibheri Rakachena muChindau

¹ Nevanhu veKiriathijearimu vakauya, vakatora bhokisi rechitenderano chaMambo Mwari, vakariunza mumhatso yaAbhinadhabhi pamutunhu. Vakaemesa Ereaza, mukororo wake, kuti angwarire bhokisi rechitenderano chaMambo Mwari.

² Kubvira pazuva iro rakaemeswa bhokisi rechitenderano chaMambo Mwari muKiriathijearimu, nguva yakareba yapera makore makumi mairi; nemhatso yeshe yaIsuraeri yakachemera Mambo Mwari.

Samueri Unotonga Isuraeri

³ Zvino Samueri wakaereketa kumhatso yeshe yaIsuraeri echiti, “Kuti mwechihwirira kunaMambo Mwari ngomwoyo wenyu weshe, zvino rashai zvimwari zvipara naAshitharothi kubva pakati penyu. Mwechiemesa mwoyo yenyu kunaMambo Mwari, nokumushandira iye ega, naye unozomununura kubva munyara dzevaFiristia.”

⁴ Ndizvo vana vaIsuraeri vakarasha vanaBhaari naAshitharothi, vakashandira Mambo Mwari ega.

⁵ Zvino Samueri wakati, “Unganidzai vaIsuraeri veshe paMizipha, neni ndinozomukumbirira kunaMambo Mwari.”

⁶ Ndizvo vakaungana paMizipha, vakachera mvura, vakaidurura pamberi paMambo Mwari. Vakaera kudya ngeiro zuva, vakati, “Takashaisha kunaMambo Mwari.” Samueri wakatonga vana vaIsuraeri paMizipha.

⁷ Naapo vaFiristia vakazwa kuti vana vaIsuraeri vaiya vakaungana paMizipha, madzimambo evaFiristia vakakwira koorwa nevaIsuraeri. Naapo vanhu vaIsuraeri vazvizwa, vakatya vaFiristia.

⁸ Vana vaIsuraeri vakati kunaSamueri, “Usarekera kutichemera kunaMambo Mwari, Mwari wedu, nokukumbira kuti azotiponesa kubva munyara dzevaFiristia.”

⁹ Ndizvo Samueri wakatora kahwai kaiamwa, akakapira keshe kuita mudiro wokupisha kunaMambo Mwari. Samueri wakachemera vaIsuraeri kunaMambo Mwari, naMambo Mwari wakamupingura.

¹⁰ Naapo Samueri achapira mudiro wokupisha, vaFiristia vakakwedzera pasinde koorwa navaIsuraeri; asi Mambo Mwari wakatinhira ngeizwi guru kurwa nevaFiristia ngezuva iro, wakavaisa mukukangaidzwa, navo vakanyiswa pamberi pevaIsuraeri.

¹¹ Navanhu vaIsuraeri vakabuda kubva muMizipha; vakarumbirira vaFiristia nokuvauraya, metsa kusvika Bhethikhari.

¹² Zvino Samueri wakatora buwe, akariemesa pakati peMizipha neSheni, akadaidza zina raro kuti Ebhenezeri, ngokuti waiti, “Metsa nazvino Mambo Mwari wakatidetsera.”

¹³ Ndizvo vaFiristia vakanyiswa, avazi kuchazouyazve munyika yaIsuraeri; nyara yaMambo Mwari yairwa nevaFiristia mazuva eshe aSamueri.

¹⁴ Madhorobha aiya akatorwa kubva kuvaIsuraeri ngavaFiristia akahwirinzwazve kunaIsuraeri, kubvira Ekironi kugumira Gathi; vaIsuraeri vakabvuka nyika dzavo kubva kunyara dzavaFiristia. Kwakaapo kunyarara pakati pevaIsuraeri nevaAmori.

¹⁵ Samueri wakatonga Isuraeri mazuva eshe okupona kwake.

¹⁶ Wakahambira makore eshe Bhetheri, Girigari neMizipha, echitonga vaIsuraeri kundau idzo dzeshe.

¹⁷ Wakahwirira Rama ngokuti ndipo paiya nemhatso yake; naapo wakatonga zvakanaka vaIsuraeri, naapozve wakaakira arita Mambo Mwari.