1 Sam. 6 - Bhaibheri Rakachena muChindau

Kupetudzwa kweBhokisi reChitenderano

¹ Bhokisi rechitenderano chaMambo Mwari raiya munyika yevaFiristia mwedzi minomwe.

² NavaFiristia vakadaidza vapristi navafemberi vechiti, “Tinozoitenyi ngebhokisi rechitenderano chaMambo Mwari? Tironzerei kuti tingariita matumirirenyi kundau yaro.”

³ Vakati, “Kudai mwechitumira bhokisi rechitenderano chaMwari waIsuraeri, musaritumira risina chiro, asi ritumirei rinomudiro wezvishaishi. Zvino munozotambiswa nokuripirwa; nyara yake aizoduswi here kubva kwomuri?”

⁴ Navo vakati, “Unozoita mudironyi wokushaisha wetinozohwirinza kwaari?” Vakati, “Zvimburumbwa zvishanu zvemiedzaniso yemamota zvomukore, nemiedzaniso mishanu yembeya yomukore, kudai ngouwandu hwevatongi vevaFiristia; ngokuti nhenda imweyo yaiya padera penyu mweshe, nepadera pevatongi venyu.

⁵ Ndizvo munozoita miedzaniso yemota dzenyu, nemiedzaniso yembeya dzenyu dzinoshaishira nyika yenyu, nemwi munozopa kukudzwa kunaMwari waIsuraeri; pamweni unozorerusa nyara yake kubva padera penyu nezvimwari zvenyu, nokubva kunyika yenyu.

⁶ Ngenyi mwechikonzisa mwoyo yenyu, kudai ngevaEgipite naFaro vakakonzisa mwoyo yavo? Apo iye paakashanda ngenjira inoshamisa pakati pavo, avazi kutendera here kuti vanhu vaende, navo vakaenda?

⁷ Ndizvo zvino itai ngoro itsva, mwechitora n'ombe mathokazi mairi anosengwa, asati asungwa nejoka, muasungire pangoro, mwechipetudza makonyana adzo kanyi kubva kwedziri.

⁸ Mutore bhokisi rechitenderano chaMambo Mwari, mwechiriisa mungoro; mwechiisazve mukabhokisi kari parutii rwaro miedzaniso yomukore, iyo yomunohwirinza kwaari kuita mudiro wokushaisha. Mwechizvitumira, kuti zviende.

⁹ Mwechiringira kuti zvinokwira ngenjira inoenda kunyika yazvo kuBhethishemeshi, zvino ndiye wakaita izvi zvakashata zvikuru kwetiri; asi kuti zvisadaro, zvino tinozozia kuti aisiri nyara yake akadi yakatitambudza; zviro zvakandoitikawo hazvo kwetiri.”

¹⁰ Navanhu vakaita izvozvo; vakatora n'ombe mathokazi mairi anosengwa, vakaasungira pangoro, vakakonyera makonyana awo kanyi.

¹¹ Navo vakaisa bhokisi rechitenderano chaMambo Mwari mungoro, nekabhokisi kanembeya dzakaumbwa dzomukore nemiedzaniso yemamota avo.

¹² Mathokazi en'ombe akaenda ngenjira yakarurama inoenda Bhethishemeshi, akaenda nepato echirira apo aihamba; aazi kupauka kuenda kumudyo nokuti kumuoshwe nemadzimambo evaFiristia vakaateera metsa kumugano weBhethishemeshi.

¹³ Zvino vanhu veBhethishemeshi vaiya vechicheka koroni mubani. Naapo vamirudza madziso avo, vakaona bhokisi rechitenderano, vakaenda ngokudakara kooshongana naro.

¹⁴ Nengoro yakaguma mumunda waJoshua muBhethishemeshi, ikaemapo. Buwe guru raiyapo; ndizvo vakatema miti yengoro, vakapira mathokazi en'ombe kuita mudiro wokupisha kunaMambo Mwari.

¹⁵ VaRevhi vakadzasa pashi bhokisi rechitenderano chaMambo Mwari nekabhokisi kaiya pasinde paro, kaiya nemiedzaniso yomukore; vakazviisa padera pebuwe guru. Zvino vanhu veBhethishemeshi vakapira midiro yokupisha, nemidiro imweni ngeiro zuva kunaMambo Mwari.

¹⁶ Zvino madzimambo mashanu evaFiristia vazviona, vakahwirira Ekironi ngeiro zuva.

¹⁷ Naaya ndiwo mamota omukore akahwirinzwa ngevaFiristia kuita mudiro wokushaisha kunaMambo Mwari: rimwe reAshidhodhi, rimwe reGaza, rimwe reAshikeroni, rimwe reGathi, nerimwenizve reEkironi.

¹⁸ Nembeyawo dzakaumbwa dzomukore kudai ngouwandu hwemadhorobha eshe evaFiristia aiya emadzimambo mashanu, eshe madhorobha akashosherwa nemaguta asikazi kushosherwa. Buwe gurutu pasinde paro pevakagadzika bhokisi rechitenderano chaMambo Mwari, riripo nanyamashi kuita chapupu mumunda waJoshua weBhethishemeshi.

¹⁹ Mambo Mwari wakauraya vanhu makumi manomwe veBhethishemeshi ngokuti vaiya varingira mubhokisi rechitenderano chaMambo Mwari; nevanhu vakachema ngokuti Mambo Mwari waiya auraya vanhu vazhinji ngokuuraya kukurutu.

Bhokisi reChitenderano paKiriathijearimu

²⁰ Zvino vanhu veBhethishemeshi vakati, “Ndiani unokona kuema pamberi paMambo Mwari, Mwari uyu Wakachena? Tinozomuendesa kunani abve kwetiri?”

²¹ Ndizvo vakatuma vanhu kuvagari veKiriathijearimu vechiti, “VaFiristia vakapetudza bhokisi rechitenderano chaMambo Mwari, uyai muritore.”