1 Sam. 5 - Bhaibheri Rakachena muChindau

Bhokisi reChitenderano pakati peVaFiristia

¹ Naapo vaFiristia vakatora bhokisi rechitenderano chaMwari, navo vakariunza kubva Ebhenezeri, vakariisa muAshidhodhi.

² Zvino vaFiristia vatora bhokisi rechitenderano chaMwari, vakariunza mumhatso yaDhagoni; vakariisa pasinde paDhagoni.

³ Naapo vanhu veAshidhodhi vamuka nechimangwani mangwanani, vakaona Dhagoni waiya awa ngehope yake pamavhu pamberi pebhokisi rechitenderano chaMambo Mwari. Ndizvo vakatora Dhagoni, vakamuemesazve pandau yake.

⁴ Naapo vamuka nechimangwani mangwanani, vakaona Dhagoni waiya awa ngehope yake pamavhu pamberi pebhokisi rechitenderano chaMambo Mwari; nesoro raDhagoni nenyara dzake zvaiya zvakaguka padimba; chaiya chasarapo muiri wega waDhagoni.

⁵ Ngendaa iyi akuna vapristi vaDhagoni, nokuti veavo vanouya kumhatso yaDhagoni, unotsika padimba raDhagoni muAshidhodhi nanyamashi.

⁶ Nyara yaMambo Mwari yairema padera pavanhu vomuAshidhodhi, naye wakavatyisa nokuvatambudza ngenhenda yemamota, muAshidhodhi nomunyika yaro yeshe.

⁷ Naapo vanhu vomuAshidhodhi vaona kuti zvakadaro, vakati, “Bhokisi rechitenderano chaMwari waIsuraeri arisisi kugara nesu; ngokuti nyara yake inotitambudza kakurutu, naDhagoni chimwari chedu.”

⁸ Ndizvo vakatuma vanhu, vakaunganidza kwevari vakuru veshe vevaFiristia, vakati, “Tinozoitenyi ngebhokisi rechitenderano chaMwari waIsuraeri?” Nevakuru vakapingura vechiti, “Bhokisi rechitenderano chaMwari waIsuraeri ngaritwarwe riuye Gathi.” Ndizvo vakatwara bhokisi rechitenderano chaMwari waIsuraeri kuuya naro Gathi.

⁹ Asi vapedza kuriunza Gathi, nyara yaMambo Mwari yakarwisana neiro dhorobha, kukaita kukaruka kukurutu; naye wakatambudza vanhu vedhorobha, veshe vadoko nevakuru, vakabatwa ngemamota.

¹⁰ Ndizvo vakatumira bhokisi rechitenderano chaMwari kuEkironi. Asi apo bhokisi rechitenderano chaMwari raguma Ekironi, vanhu veEkironi vakadaidzira vechiti, “Vatiunzira bhokisi rechitenderano chaMwari waIsuraeri, kutiuraya navanhu vedu.”

¹¹ Vakatuma vanhu koounganidza pamwepo vakuru veshe vevaFiristia, vakati, “Tumirai bhokisi rechitenderano chaMwari waIsuraeri, kuti rihwirire kundau yaro, kuti risazotiuraya navanhu vedu.” Ngokuti vaiya vakarudzwa ngorufu runotyisa mukati mwedhorobha reshe. Nyara yaMwari yaivatambudza kakurutu.

¹² Vanhu vasikazi kufa vakamera mamota, nokuchema kwedhorobha kwakakwira mudenga.