1 Sam. 4 - Bhaibheri Rakachena muChindau

Kutorwa kweBhokisi reChitenderano

¹ Neizwi raSamueri rakauya kuvaIsuraeri veshe. VaIsuraeri vakabuda kurwa nevaFiristia, vakaemesa matende pasinde peEbhenezeri, navaFiristia vakaemesawo matende paAfeki.

² VaFiristia vakadzinasirira kurwa nevaIsuraeri, naapo hondo yashonganiswa, vaIsuraeri vakanyiswa ngevaFiristia; navo vakauraya vaida kukwana makumi emazana marongomuna (4,000) evanhu vehondo vaiya mundau yehondo.

³ Naapo vanhu vehondo vauya mukamba, vakuru vaIsuraeri vakati, “Mambo Mwari waita ngenyi kuti tinyiswe nyamashi ngevaFiristia? Ngatitore bhokisi rechitenderano chaMambo Mwari kubva muShiro, kuti auye pakati pedu nokutiponesa kubva munyara dzemagaa edu.”

⁴ Ndizvo vanhu vakatumirwa kuenda Shiro, kuti vatore kubveyo bhokisi rechitenderano chaMambo Mwari wehondo, uwo unogara pakati pemakherubhimu. Vakororo vairi vaEri, Hofini naFinehasi, vaiyapo nebhokisi rechitenderano chaMwari.

⁵ Naapo bhokisi rechitenderano chaMambo Mwari raunzwa mukamba, vaIsuraeri veshe vakadaidzira ngeizwi gurutu, ndizvo nyika yakaita maungira.

⁶ Naapo vaFiristia vazwa bope rokudaidzira, vakati, “Iri bope rokudaidzira kukuru rinoronzenyi mukamba revaHebheru?” Naapo vazwa kuti bhokisi rechitenderano chaMambo Mwari raunzwa mukamba,

⁷ vaFiristia vakatya. Ngokuti vakati, “Zvimwari zvaguma mukamba.” Vakatizve, “Ihehe kwetiri! Ngokuti kwaiya kusati kwaitika chiro chakadaro metsa zvino.

⁸ Ihehe kwetiri! Ndiani ungakona kutinunurira kubva munyara dzezvimwari izvi zvine simba? Ndizvo zvimwari zvakarova vaEgipite ngemadambudziko eshe mushango.

⁹ Itai vakagwinya, muite kudai ngengwazi, imwimwi vaFiristia, kuti musazoita hloko kuvaHebheru kudai ngezvevakaita kwomuri; itai kudai ngengwazi murwe.”

¹⁰ Ndizvo vaFiristia vakarwa; vaIsuraeri vakanyiswa, vakatiza munhu weshe kutende rake. Kwakaitika kuurawa kukurutu, ngokuti vakaurawa vaIsuraeri makumi matatu emakumi emazana (30,000) evaihamba ngetsoka.

¹¹ Bhokisi rechitenderano chaMwari rakatorwa; vakororo vaEri, Hofini naFinehasi, vakaurawa.

Kufa kwaEri

¹² Munhu waBhenjamini wakarumba kubva muhondo, akaguma Shiro ngeiro zuva, anemachira ake akabauka, namavhu pasoro rake.

¹³ Naapo munhu paakaguma, Eri waiya akagara pachigaro panjira, echiringira, ngokuti mwoyo wake waihuta ngendaa yebhokisi rechitenderano chaMwari. Naapo munhu paakapotera mudhorobha, wakaronza zveshe, nedhorobha reshe rakachema.

¹⁴ Naapo Eri akazwa bope rokuchema, wakati, “Rinoronzenyi bope iri?” Zvino munhuwo wakauya ngokukasira, akaronzera Eri.

¹⁵ Zvino Eri waiya anemakore makumi mapfumbamwe namasere, nemadziso ake aiya oita mazweezwee asikachanasi kuona.

¹⁶ Munhu wakati kunaEri, “Ndini ndabva kuhondo, ndatiza nyamashi kubva kuhondo.” Naye wakati, “Kunoizwenyi, mukororo wangu?”

¹⁷ Nhumwa yakati, “VaIsuraeri vatiza pamberi pevaFiristia. Kwakaapozve kuurawa kukuru pakati pevanhu vehondo, nevakororo vako vairi Hofini naFinehasi vafa, nebhokisi rechitenderano chaMwari ratorwa.”

¹⁸ Naapo aronza ngendaa yebhokisi rechitenderano chaMwari, Eri wakawa ngegotsi kubva pachigaro chake pasinde pemusiwo, nomutsipa wake wakaguka, naye wakafa; ngokuti waiya aamusharuka, akafema. Waiya atonga Isuraeri makore makumi marongomuna.

Kufa kweShirikadzi yaFinehasi

¹⁹ Zvino muzakazi wake, mukadzi waFinehasi, waiya aanemimba aapasinde pokubereka. Naapo paakazwa mashoko okuti bhokisi rechitenderano chaMwari ratorwa, nokuti sezara ake nomwamuna wake vafa, wakakotama akabereka; ngokuti kurwadza kwokubara kwakamugumira.

²⁰ Naapo ooda kufa vakadzi vaimudetsera vakati kwaari, “Usatya, ngokuti wabereka mukororo.” Asi aazi kupingura, nokuti kuzvikarakadza.

²¹ Wakadudza zina romwana kuti Ikhabhodhi, kuronza kuti “Uthende hwabva kunaIsuraeri,” ngendaa yokuti bhokisi rechitenderano chaMwari rakatorwa nendaa yasezara ake nomwamuna wake.

²² Wakati, “Uthende hwabva kunaIsuraeri, ngokuti bhokisi rechitenderano chaMwari ratorwa.”