1 Sam. 30 - Bhaibheri Rakachena muChindau

Hondo neVaAmareki

¹ Zvino apo Dhavhidha navanhu vake vauya Zikiragi ngezuva rechitatu, vaAmareki vaiya vachakata ngokubani nokuZikiragi. Vakarwisa Zikiragi, vakaripisha ngomuriro.

² Vakatora vakadzi navo veshe vaiyamwo kuita vabatwa; avazi kuuraya naumwe wavo, vakuru nokuti vadoko, asi vakavatora, vakaenda.

³ Naapo Dhavhidha navanhu vake vakauya kudhorobha, vakariona rapishwa ngomuriro; vakadzi vavo nevakororo vavo nevanasikana vavo vakaizwa hloko.

⁴ Zvino Dhavhidha nevanhu vaiya naye vakachema, metsa vaiya vasisina simba rokuchema.

⁵ Vakadzi vairi vaDhavhidha vaiya vaizwe hloko, Ahinoamu muJezireeri, naAbhigairi shirikadzi yaNabhari muKarmeri.

⁶ Dhavhidha waiya mudambudziko gurutu, ngokuti vanhu vakaereketa ngokumuponda ngemapuwe, ngokuti mweya yavanhu veshe yaiya yashatirwa, munhu weshe ngendaa yevakororo vake nevanasikana vake. Asi Dhavhidha wakadzigwinyisa munaMambo Mwari, Mwari wake.

⁷ Dhavhidha wakati kunomupristi Abhiatha, mukororo waAhimerekhi, “Ndapota, ndiunzire efodhi.” NaAbhiatha wakaunza efodhi kunaDhavhidha.

⁸ Dhavhidha wakabvunza Mambo Mwari echiti, “Ndoiteera here hondo iyi? Ndinozovabata here?” Wakamupingura, “Vateere; ngokuti ngegwinyiso unozovabata, nokuunzazve zveshe.”

⁹ Ndizvo Dhavhidha wakaenda iye nevamuna vaiya naye mazana matanhatu (600). Vakaguma pamukova unozwi Bhesori, apo paiya pakagara vakasiiwa.

¹⁰ Asi Dhavhidha nevamuna vaiya naye mazana marongomuna (400) vakateera; mazana mairi (200) akasara sure ngokuti vaiya vademera vasikachakoni kuambuka mukova Bhesori.

¹¹ Navo vakaona muEgipite murubaya, vakamuunza kunaDhavhidha. Vakamupa chingwa, naye wakadya; vakamupa mvura kuti amwe.

¹² Vakamupazve chingwa chemaonde akaoma, nezvikore zviiri zvemavhini akaoma. Naapo adya, mweya wake wakagwinyiswa, ngokuti waiya asikazi kudya chingwa nokuti kumwa mvura mazuva matatu usiku nemasikati.

¹³ Zvino Dhavhidha wakati kwaari, “Uri waani? Unobva kuri?” Naye wakati, “Ndiri jaha reEgipite, muranda womuAmareki. Mambo wangu wakandisiya ngokuti mazuva matatu akapera ndakarwara.

¹⁴ Takachakata kubani kwevaKherethi, nokumugano waJudha, nokubani kwaKharebhu; nesu takapisha Zikiragi ngomuriro.”

¹⁵ Dhavhidha wakati kwaari, “Unganditora here kuicho chikwata?” Naye wakati, “Pika kwendiri ndiMwari kuti auzondiurayi nokuti kundipira munyara dzamambo wangu, neni ndinozokutora kuicho chikwata.”

¹⁶ Naapo amutora, vaiya vapararira pandau dzeshe, vechidya nokumwa nokuzvina, ngendaa yezvakachakatwa zvizhinji zvevakatora kubva kunyika yevaFiristia nokubva kunyika yaJudha.

¹⁷ Dhavhidha wakavarwisa kubvira madeekoni metsa madeekoni echimangwani. Apana naumwe wavo wakapokonyoka, kwega mazana marongomuna (400) emajaha awo akagadha pamakamera, akatiza.

¹⁸ Dhavhidha wakatora zveshe izvo zvaiya zvatorwa ngevaAmareki; naDhavhidha wakaponesa vakadzi vake vairi.

¹⁹ Apana chiro chaitamika kwevari, chidoko nokuti chikuru, vakororo nokuti vanasikana, nokuti zvakachakatwa, nokuti chiro nachimwe chakatorwa kwavari; Dhavhidha wakapetudza zveshe.

²⁰ Dhavhidha wakatora zvifuyo zveshe makwai nen'ombe, zvevakatinha pamberi pen'ombe dzimweni; vanhu vakati, “Izvi ngezvakachakatwa zvaDhavhidha.”

²¹ Zvino Dhavhidha wakaguma kunemazana mairi (200) evanhu vaiya vademera vasikachakoni kuteera Dhavhidha, vaiya vakasiiwa pamufuya unozwi Bhesori. Vakabuda kooshongana naDhavhidha, nokooshongana nevanhu vaiya naye. Naapo Dhavhidha paakauya kunevanhu, wakavachingamidza.

²² Naapo vakapingura vanhu veshe vakashata vasikadetseri chiro vaiya naDhavhidha vechiti, “Ngokuti avazi kuenda nesu, atizovapi chiro cheizvo zvakachakatwa zvetakatora, kwega kuti munhu weshe atore mukadzi wake nevana vake, vaende.”

²³ Asi Dhavhidha wakati, “Amuzoiti kudaro, hama dzangu, ngeizvo zvaakatipa Mambo Mwari, uwo wakatingwarira, wakapira magaa edu munyara dzedu awo akatirwisa.

²⁴ Ndiani ungamupurutana ngendaa iyi? Ngokuti chikoaniswa chowakaenda kuhondo chinozoedzana nechikoaniswa chowakagara nenhumbi; vanozokoanisirwa zvakaedzana.”

²⁵ Kubvira zuva iro kuenda mberi, wakachiita kuti chiite chironzo nomupango kuvaIsuraeri metsa nanyamashi.

²⁶ Naapo Dhavhidha paakaguma Zikiragi, wakatumira rupande rwezvakachakatwa kushamwari dzake vakuru vaJudha echiti, “Hecho chipo chenyu kubva panezvakachakatwa zvemagaa aMambo Mwari.”

²⁷ Zvaiya zvaavo vaiya vari muBheteri, vari muRamothi rekubani, vari muJatiri,

²⁸ vari muAroeri, vari muSifimothi, vari muEshitemoa,

²⁹ vari muRakhari, vari mumadhorobha evaJerameeri, vari mumadhorobha evaKheni,

³⁰ vari muHorma, vari muBhorashani, vari muAthakhi,

³¹ vari muHebroni, nokundau dzeshe apo Dhavhidha nevanhu vake vakarovedzera kugara.