1 Sam. 3 - Bhaibheri Rakachena muChindau

Mambo Mwari Unooneka kunaSamueri

¹ Zvino murumbwana Samueri waishandira Mambo Mwari pashi paEri. Izwi raMambo Mwari raiya risikanyanyi kuzwika ngaawo mazuva, kwaiya kusina chioniso chakaoniswa.

² Pamukuwo uwo Eri, madziso ake aiya ootanga kuita mazweezwee, asikachanasi kuona, waiya akaata mukamera rake.

³ Chibani chaMwari chaiya chisati chadzimwa, naSamueri waiya akaata pashi mutemperi raMambo Mwari apo peraigara bhokisi rechitenderano chaMwari.

⁴ Zvino Mambo Mwari wakadaidza Samueri; naye wakapingura, akati, “Ndiri pano.”

⁵ Naye wakarumba kunaEri, akati, “Ndiri pano; ngokuti wandidaidza.” Asi wakati, “Andizi kukudaidza; enda wooata.” Ndizvo wakaenda, akaata.

⁶ Mambo Mwari wakadaidzazve, “Samueri.” Samueri wakamuka akaenda kunaEri, akati, “Ndiri pano; ngokuti wandidaidza.” Asi wakapingura, akati, “Mukororo wangu, andizi kukudaidza; ata hako.”

⁷ Zvino Samueri waiya asati amuzia Mambo Mwari, neizwi raMambo Mwari raiya risati raziikanwa kwaari.

⁸ NaMambo Mwari wakadaidzazve Samueri kwechitatu. Naye wakamuka, akaenda kunaEri, akati, “Ndiri pano; ngokuti wandidaidza.” Zvino Eri wakazia kuti Mambo Mwari ndiye waidaidza murumbwana.

⁹ Ndizvo Eri wakati kunaSamueri, “Enda wooata; kudai echikudaidza unozoti, ‘Ereketa, Mambo Mwari, ngokuti muranda wako unozwa.’ ” Ndizvo Samueri wakaenda, akaata pandau yake.

¹⁰ Zvino Mambo Mwari wakauya, akaema, akadaidza kudai ngemikuwo imweni, “Samueri, Samueri.” NaSamueri wakapingura, akati, “Ereketa, ngokuti muranda wako unozwa.”

¹¹ Zvino Mambo Mwari wakati kunaSamueri, “Wona, ndinozoita chiro muIsuraeri icho chinoita kuti nzee dzomunhu weshe dzinozozhararika ngokuchizwa.

¹² Ngeiro zuva ndinozoita kunaEri izvo zveshe zvendakaereketa ngendaa yemhatso yake, kubvira pakutanga metsa pakugumisira.

¹³ Ngokuti ndakamuronzera kuti ndichatonga mhatso yake mhera nariini, ngendaa yokushaisha kwaanozia; ngokuti vakororo vake vaituka Mwari, naye aazi kuvarambidza.

¹⁴ Ndizvo ndapika kumhatso yaEri kuti kushaisha kwemhatso yaEri akuzosukwi ngemidiro nokuti munikero mhera nariini.”

¹⁵ Samueri wakaata metsa mangwanani; zvino wakabeura misiwo yemhatso yaMambo Mwari. Samueri wakatya kuronzera Eri zvaakaoniswa.

¹⁶ Asi Eri wakadaidza Samueri, akati, “Samueri, mukororo wangu.” Wakati, “Ndiri pano.”

¹⁷ Eri wakati, “Chiinyi icho chaakaronza Mambo Mwari kwouri? Usandifishira! Mwari ngaaite kudaro kwouri nokututsirazve, kudai wechindifishira kunyazwi chiinyi cheizvo zveshe zvaakaereketa kwouri.”

¹⁸ Ndizvo Samueri wakamuronzera zveshe, apana chaakamufishira. Zvino wakati, “NdiMambo Mwari; ngaaite zvinomunakira.”

¹⁹ Samueri wakakura naMambo Mwari waiya naye, asikatendi kuti izwi rake narimwe rikorere.

²⁰ NevaIsuraeri veshe kubvira Dhani kugumira Bheerishebha vakazia kuti Samueri waiya muprofeti wakagondeka waMambo Mwari.

²¹ NaMambo Mwari wakaangira kuoneka muShiro, ngokuti Mambo Mwari wakadzionisa pachake kunaSamueri muShiro ngeizwi raMambo Mwari.