1 Sam. 28 - Bhaibheri Rakachena muChindau

¹ Ngaawo mazuva vaFiristia vakaunganidza hondo dzavo kurwa naIsuraeri. Akhishi wakati kunaDhavhidha, “Zwisisa ngegwinyiso kuti unozoenda neni koorwa, iwewe nevanhu vako.”

² Dhavhidha wakati kunaAkhishi, “Ngegwinyiso unozozia icho chaanokona kuita muranda wako.” NaAkhishi wakati kunaDhavhidha, “Ndizvo ndinozokuita mungwariri wesoro rangu mhera nariini.”

Sauri Unobvunza Vanomukirwa

³ Zvino Samueri waiya afa, nevaIsuraeri veshe vakamuchema nokumuika muRama, mudhorobha rake. Sauri waiya adzinga avo vaiya nemweya yokufembera nevaroyi kubva munyika iyo.

⁴ VaFiristia vakaungana pamwepo, vakauya, vakaaka matende paShunemu. Sauri wakaunganidza vaIsuraeri veshe pamwepo, vakauya, vakaaka matende muGiribhoa.

⁵ Naapo Sauri aona hondo dzevaFiristia, wakatya nomwoyo wake wakahuta kakurutu.

⁶ Naapo Sauri wakabvunza kunaMambo Mwari, Mambo Mwari aazi kumupingura, haiwa ngokurota, nokuti ngoUrimu, nokuti ngevaprofeti.

⁷ Zvino Sauri wakati kuvaranda vake, “Nditsvakirei mukadzi unomukirwa ngomweya wokufembera, kuti ndiende kwaari, ndibvunze kwaari.” Varanda vake vakati kwaari, “Ringirai, uripo mukadzi muEnidhori unomukirwa.”

⁸ Ndizvo Sauri wakadziitisa, akasimira machira amweni, naye wakaendayo nevanhu vairi. Vakauya kunomukadzi usiku. Wakati, “Ndapota, ndibvunzire mweya, undiunzire uwo wendinozodudza kwouri.”

⁹ Mukadzi wakati kwaari, “Ringira, ngegwinyiso unozia icho chaakaita Sauri, kuti wakadzinga avo vanemweya wokufembera nevaroyi kubva munyika. Ngenyi wechinditeya ngomurau, kuti ndife?”

¹⁰ Asi Sauri wakapika kwaari ndiMambo Mwari echiti, “Kudai ngezvaanopona Mambo Mwari, akuzoapo kujeziswa kwouri ngendaa yeichi chiro.”

¹¹ Zvino mukadzi wakati, “Ndinozokuunzira anani?” Naye wakati, “Ndiunzire Samueri.”

¹² Naapo mukadzi paakaona Samueri, wakadaidzira ngeizwi gurutu; nomukadzi wakaereketa kunaSauri echiti, “Wandichengedzera ngenyi? Iwewe ndiwe Sauri.”

¹³ Mambo wakati kwaari, “Usatya, unoonenyi?” Nomukadzi wakati kunaSauri, “Ndinoona chimwari chechibuda panyika.”

¹⁴ Wakati kwaari, “Wakadai ndiani muemo wake?” Naye wakati, “Musharuka unobuda; akasimira nguwe.” Ndizvo Sauri wakazia kuti ndiSamueri, naye wakatsikitsira hope yake pashi, akadzikotamisa mukuremeredza.

¹⁵ Zvino Samueri wakati kunaSauri, “Wandinesa ngenyi ngokundimusa?” Sauri wakapingura, akati, “Ndinotambudzwa kakurutu, ngokuti vaFiristia vanorwa neni, naMwari wakabva kwendiri, aachandipinguri, haiwa ngokuprofeta, nokuti ngokurota; ndizvo ndakudaidza kuti undironzere icho chendinozoita.”

¹⁶ Samueri wakati, “Unondibvunza ngenyi, wechiona kuti Mwari wakakusiya, akaita gaa rako?

¹⁷ Mambo Mwari wakaita emene, kudai ngezvaakaereketa kubudikidza ndini; ngokuti Mambo Mwari wakabvisa umambo munyara yako, akahupa kunomuakirwana wako Dhavhidha.

¹⁸ Ngokuti iwewe auzi kupurutana izwi raMambo Mwari, nokuti kuita ushungu hwake padera pavaAmareki, ndizvo Mambo Mwari waita ichi chiro kwouri nyamashi.

¹⁹ Zvino Mambo Mwari unozopira vaIsuraeri newe munyara dzavaFiristia; mangwani iwewe navakororo vako munozoa neni. Mambo Mwari unozopira hondo dzavaIsuraeri munyara dzavaFiristia.”

²⁰ Apapo Sauri wakawa pashi pamavhu, wakatya kakurutu, ngendaa yemazwi aSamueri; naye wakapera simba, ngokuti waiya asikazi kudya chiro zuva reshe nousiku hweshe.

²¹ Mukadzi wakauya kunaSauri, wakaona kuti waiya echitya kakurutu, wakati kwaari, “Ringira, murandakadzi wako wakapurutana izwi rako, ndakaisa kupona kwangu mungozi, ndakapurutana mazwi awo ewakaereketa kwendiri.

²² Ndizvo zvino, iwewewo, purutana izwi romurandakadzi wako, tenda kuti ndiise kachingwa pamberi pako. Idya, kuti ugwinye, apo woohamba.”

²³ Wakaramba, akati, “Andizodyi.” Asi varanda vake, pamwepo nomukadzi, vakamuangiridza; naye wakapurutana mazwi avo. Ndizvo wakamiruka kubva pamavhu, wakagara pamubhedhi.

²⁴ Zvino mukadzi waiya nekonyana rakanuna mumhatso. Wakakasira kuriuraya, wakatora ufu, wakahukanya, wakabika ndihwo chingwa chisina mumera.

²⁵ Wakachiunza pamberi paSauri nevaranda vake; navo vakadya. Zvino vakamiruka, vakaenda ngousiku uhwo.