1 Sam. 27 - Bhaibheri Rakachena muChindau

Dhavhidha pakati peVaFiristia

¹ Dhavhidha wakati mumwoyo mwake, “Ndinozofa ngezuva rimweni ngenyara yaSauri; akuna chiro chakapinda kunaka kwendiri kwega kutizira kunyika yevaFiristia; zvino Sauri unozopera simba ngokunditsvaka mumigano yeshe yaIsuraeri, neni ndinozopokonyoka kubva kunyara yake.”

² Ndizvo Dhavhidha wakamiruka, akadarika nevanhu mazana matanhatu (600) vaiya naye kuenda kunaAkhishi, mukororo waMaokhi, mambo weGathi.

³ NaDhavhidha wakagara naAkhishi muGathi, iye nevanhu vake vehondo, munhu umwe ngaumwe nemhuri yake, naDhavhidha nevakadzi vake vairi, Ahinoamu muJezireeri, naAbhigairi muKharmeri shirikadzi yaNabhari.

⁴ Naapo Sauri aronzerwa kuti Dhavhidha wakatizira Gathi, aazi kuchamutsvaka.

⁵ Zvino Dhavhidha wakati kunaAkhishi, “Kudai zvino ndaona nyasha mukuona kwako, ngavandipe ndau munerimwe remadhorobha emunyika muno, kuti ndigaremwo; ngokuti ngenyi muranda wako echigara newe mudhorobha roumambo muno?”

⁶ Ndizvo ngezuva iro Akhishi wakamupa Zikiragi; ndizvo Zikiragi rakaita remadzimambo aJudha metsa nanyamashi.

⁷ Mukuwo wokugara kwaDhavhidha munyika yevaFiristia wakaita gore nemwedzi mirongomuna.

⁸ Zvino Dhavhidha nevanhu vake vakakwira kuenda koochakata vaGeshuri, vaGeza navaAmareki; ngokuti awo madzinza vanhu vaigara iyo nyika kare, ngenjira inoenda Shuri, metsa kuguma kunyika yeEgipite.

⁹ Dhavhidha wakachakata nyika, aazi kusiya mwamuna nokuti mukadzi echipona, asi wakatora makwai, n'ombe, zvimbongoro, makamera nezvokusimira, wakahwirira kunaAkhishi.

¹⁰ Naapo Akhishi wakati, “Wachakata kuri nyamashi?” Dhavhidha wakati, “Ndachakata kurupande rwokubani rwaJudha, norupande rwokubani rwavaJerameeri, norupande rwokubani rwavaKheni.”

¹¹ Dhavhidha aazi kuponesa mwamuna nokuti mukadzi kuvaunza Gathi echiti, “Pamweni vaizoronza tisu vechiti, ‘Dhavhidha wakaita izvi neizvo.’ ” Waizoita kudaro mukuwo weshe waaigara munyika yevaFiristia.

¹² Akhishi wakagonda Dhavhidha echiti, “Wakaita kuti vanhu vake vaIsuraeri vamunyenye; ndizvo unozoita muranda wangu mhera nariini.”