1 Sam. 26 - Bhaibheri Rakachena muChindau

Dhavhidha Unorekerazve Kuuraya Sauri

¹ Zvino vaZifi vakauya Gibhea kunaSauri vechiti, “Dhavhidha aadzifishi here mumutunhu weHakhira, uwo uri pamberi peJeshimoni?”

² Ndizvo Sauri wakamiruka, akadzaka mushango reZifi, anemakumi emazana matatu (3,000) evanhu vakatsanangurwa vaIsuraeri, kootsvaka Dhavhidha mushango reZifi.

³ Sauri wakagara mumutunhu weHakhira uwo uri pamberi peJeshimoni parutii penjira. Asi Dhavhidha wakagara mushango. Naapo wakaona kuti Sauri waimuteera mushango,

⁴ Dhavhidha wakatuma vadongoreri, akazwa ngegwinyiso kuti Sauri waguma.

⁵ Zvino Dhavhidha wakamiruka, akauya apo paiya pagara Sauri; naDhavhidha wakaona pandau apo paakaata Sauri, naAbhina mukororo waNeri, nduna yehondo yake. Sauri wakaata pakati pekamba nevanhu vakamutendenedza.

⁶ Zvino Dhavhidha wakati kunaAhimerekhi muHiti, nokuna Abhishai mukororo waZeruia mukoma waJoabi echiti, “Ndiani unozodzaka neni kukamba kunaSauri?” NaAbhishai wakati, “Ndinozodzaka newe.”

⁷ Ndizvo Dhavhidha naAbhishai vakauya kunevanhu usiku; ringira, Sauri waiya akaata pakati pekamba, nomukhondo wake wakadzimikwa mumavhu dera kwesoro rake; naAbhina nevanhu vake vakaata vakamutendenedza.

⁸ Abhishai wakati kunaDhavhidha, “Nyamashi Mwari wapira gaa rako munyara dzako. Ndizvo zvino ndapota, ngandimubaire kumavhu ngomukhondo kamwe, neni andizomubayi kairi.”

⁹ Asi Dhavhidha wakati kunaAbhishai, “Usamuuraya, ngokuti ndiani ungatambanudza nyara yake padera powakadzodzwa waMwari, aite usina ndaa?”

¹⁰ Dhavhidha wakati, “Kudai ngezvaanopona Mambo Mwari, Mambo Mwari unozomuuraya; nokuti zuva rake rokufa rinozoguma, nokuti unozoenda muhondo nokuurawa.

¹¹ Mambo Mwari asatenda kuti nditambanudze nyara yangu padera pouwo wakadzodzwa waMambo Mwari; asi zvino tora mukhondo uri dera kwesoro rake, nedende remvura, ngatiende.”

¹² Ndizvo Dhavhidha wakatora mukhondo nedende remvura kubva dera kwesoro raSauri; navo vakaenda. Apana munhu wakazviona nokuti kuzvizia nokuti kumuka; ngokuti veshe vaiya vakaata, ngokuti vakabatwa ngehope huru dzakabva kunaMambo Mwari.

¹³ Zvino Dhavhidha wakaenda kurupande rumweni, akaema padera pomutunhu ngokuretu; pakati pavo panendau yakareba.

¹⁴ Dhavhidha wakadaidzira kunevanhu nokunaAbhina mukororo waNeri echiti, “Aupinguri here, Abhina?” Ndizvo Abhina wakapingura akati, “Urianani unodaidzira kunamambo?”

¹⁵ Dhavhidha wakati kunaAbhina, “Auri mwamuna wakashinga here? Ndiani wakadai ndiwe muIsuraeri? Ndizvo auzi kungwarira ngenyi makosi mambo wako? Ngokuti umwe wevanhu wakauya koouraya makosi mambo wako.

¹⁶ Ichi chiro chowakaita achizi kunaka. Kudai ngezvaanopona Mambo Mwari, unosisira kuurawa, ngokuti auzi kungwarira mambo wako uwo wakadzodzwa ndiMambo Mwari. Wona zvino, mukhondo wamambo uri pari, nedende remvura raiya dera kwesoro rake?”

¹⁷ Sauri wakazia izwi raDhavhidha, wakati, “Iri izwi rako here, mukororo wangu Dhavhidha?” Dhavhidha wakati, “Izwi rangu, eya makosi wangu, A mambo.”

¹⁸ Naye wakati, “Ngenyi mambo wangu echirumbirira muranda wake? Ngokuti ndakaitenyi? Chishaishi chenyi chiri munyara dzangu?

¹⁹ Ndizvo zvino, ndapota, makosi wangu mambo ngaazwe mazwi omuranda wake. Kuti ari Mambo Mwari wakati undimukire, ngaashire mudiro; asi kuti vari vanhu, ngavatukwe pamberi paMambo Mwari, ngokuti vandidzinga nyamashi kubva mukuashira chikoaniswa chenhaka yaMambo Mwari vechiti, ‘Enda wooshandira zvimwari.’

²⁰ Ndizvo zvino ngazi yangu isazorashika pamavhu kubva pamberi pokuona kwaMambo Mwari; ngokuti mambo waIsuraeri wakabuda kutsvaka nhata, kudai ngomunhu unobuda kuvhima chikware mumitunhu.”

²¹ Zvino Sauri wakati, “Ndashaisha; petuka, mukororo wangu Dhavhidha, ngokuti andichazokutambudzizve, ngokuti nyamashi mweya wangu unomutengo mukurutu mukuona kwako. Ringira, ndakaita upenzi, ndakashaisha kakurutu.”

²² Dhavhidha wakapingura echiti, “Ringira, mukhondo wamambo! Tendera umwe wemajaha kuti auye kootora.

²³ Mambo Mwari unopa kumunhu umwe ngaumwe kudai ngokururama kwake nokugondeka kwake; ngokuti Mambo Mwari wakakupa munyara dzangu nyamashi, asi andizi kutambanudza nyara yangu kunewakadzodzwa waMambo Mwari.

²⁴ Penya, kudai ngokupona kwako kunomutengo mukurutu nyamashi mukuona kwangu, ngokudaro kupona kwangu ngakuano mutengo mukurutu mukuona kwaMambo Mwari, kuti andinunure mumadambudziko eshe.”

²⁵ Zvino Sauri wakati kunaDhavhidha, “Unomuchena, iwewe Dhavhidha, mukororo wangu! Unozoita zviro zvikuru nokunyisa.” Ndizvo Dhavhidha wakaenda kundau yake, naSauri wakahwirira kundau yake.