1 Sam. 25 - Bhaibheri Rakachena muChindau

Rufu rwaSamueri

¹ Zvino Samueri wakafa; nevaIsuraeri veshe vakaungana pamwepo, vakamuchema. Vakamuika kanyi kwake muRama. Dhavhidha wakamiruka, akaenda kushango rePharani.

Dhavhidha naAbhigairi

² Waiyamwo munhu muMaoni, waiya noupfumi hwake muKharmeri. Waiya munhu gurudza guru, waiya nemakumi emazana matatu (3,000) emakwai, nemazana gumi rimwe (1,000) rembudzi. Waigunda makwai ake muKharmeri.

³ Zvino zina romunhu uyu raizwi Nabhari, nezina romukadzi wake raizwi Abhigairi. Mukadzi waiya akangwara, akanaka, asi mwamuna wake waiya akakonza mwoyo akashata, waiya wedzinza raKharebhu.

⁴ Dhavhidha wakazwa ari mushango kuti Nabhari waiagunda makwai ake.

⁵ Ndizvo Dhavhidha wakatuma majaha gumi, akati kwevari, “Endai Kharmeri, muende kunaNabhari, mwechimuchingamidza ngezina rangu.

⁶ Nemwi munozoti kwaari, ‘Kunyarara kwouri, kunyarara kumhatso yako nokunyarara kuneizvo zveshe zvounazvo.’

⁷ Zvino ndinozwa kuti iwewe unevagundi; zvino vaushi vako vaiya nesu, nesu atizi kuvaremadza, navo apana chakatamika kwevari mukuwo weshe wevaigara Kharmeri.

⁸ Bvunza majaha ako, navo vanozokuronzera. Ndizvo majaha angu ngaaone nyasha pamberi pako; ngokuti tauya ngezuva kwaro redhiri. Ndapota, ipa kunyazwi chiinyi chounacho kuvaranda vako nokunomukororo wako Dhavhidha.”

⁹ Naapo majaha aDhavhidha agumeyo, vakaereketa kunaNabhari kudai ngemazwi eshe ngezina raDhavhidha, vakanyarara.

¹⁰ Asi Nabhari wakapingura varanda vaDhavhidha, akati, “Ndiani Dhavhidha? Mukororo waJesi ndiani? Varipo varanda vazhinji mazuva ano vanotiza kubva kumadzimambo avo.

¹¹ Ndotora here chingwa changu, nemvura yangu, nenyama yangu, yendauraira vagundi vangu, ndechizvipa kuvanhu vendisikazii pevanobva nepevanoenda.”

¹² Ndizvo varanda vaDhavhidha vakapetuka sure, vakahwirira, vakauya koomuronzera izvo zveshe.

¹³ Dhavhidha wakati kunevanhu vake, “Munhu weshe ngaapakatire shoti yake!” Umwe ngaumwe wavo wakapakatira shoti yake naDhavhidha wakapakatirawo shoti yake; vakateera Dhavhidha vanhu vanoda kukwana mazana marongomuna (400), nemazana mairi (200) akagara nenhumbi dzavo.

¹⁴ Asi umwe wemajaha wakaronzera Abhigairi, mukadzi waNabhari echiti, “Ringira, Dhavhidha wakatuma nhumwa kubva mushango kuchingamidza mambo wedu, naye wakavatuka.

¹⁵ Asi vanhu ava vakaita zvakanaka kwetiri, nesu atizi kuremadzwa; atizi kutama chiro mukuwo weshe wetakagara pasinde pavo, apo taiya mushango navo.

¹⁶ Vaiya vakadai ngerukumbati kwetiri usiku nemasikati, mukuwo weshe wetaiya navo techiusha makwai.

¹⁷ Ndizvo zvino zia ichi nokupinimidza chounozoita; ngokuti kushata kwatorongwa kurwisana namambo wedu, nokuneveshe vemhatso yake; ngokuti uri mukororo wokushata, akuna ungaereketa naye.”

¹⁸ Zvino Abhigairi wakakasira, akatora mazana mairi (200) ezvingwa, nembudu mbiri dzevhini, nemakwai mashanu akaurawa, nezvipimo zvishanu zvekoroni, nezana rezvikore zvemavhini akaoma, nemazana mairi (200) ezvigurwa zvemaonde akaoma. Wakazviisa padera pembongoro,

¹⁹ naye wakati kumajaha ake, “Tungamirai pamberi; ndinomuteera.” Asi aazi kuronzera mwamuna wake Nabhari.

²⁰ Naapo echigadha mbongoro wakadzaka ngepagwasha pomutunhu, Dhavhidha nevanhu vake vakadzaka kuuya kwaari, naye wakashongana navo.

²¹ Zvino Dhavhidha waiya akati, “Ngegwinyiso ndakangwarira pasina chiro zviro zveshe zvouyu munhu mushango, ngokuti apana chakatamika chezviro zvake; naye wakandiunzidzira ngezvakashata kunezvakanaka.

²² Mwari ngaandiuraye ndife, kuti kukaedza ndisati ndauraya kunyazwi mwamuna wokugumisira.”

²³ Naapo Abhigairi wakaona Dhavhidha, wakakasira kudzaka pambongoro, akawa ngehope yake pamberi paDhavhidha, akatsikitsira pashi.

²⁴ Akawa patsoka dzake, akati, “Kushata uku ngakua padera pangu, mambo wangu; ndapota, tendera murandakadzi wako kuereketa pamberi pako, uzwe mazwi omurandakadzi wako.

²⁵ Mambo wangu, musazopinimidza ngouyu munhu wakashata, Nabhari, ngokuti wakadai ngezina rake. Nabhari ndiro zina rake, naye unoupenzi; asi inini murandakadzi wako andizi kuona nhumwa dzamambo wangu dzowakatuma.

²⁶ “Ndizvo zvino, mambo wangu, kudai ngezvaanopona Mambo Mwari, nokudai ngezvounopona iwewe, ngokuti Mambo Mwari wakakubata kubva kwokuparadza ngazi, nokubva kwokudziunzidzira ngenyara yako, magaa ako, naavo vanotsvaka kuita zvakashata kunamambo wangu, ngavadai ndiNabhari.

²⁷ Ndizvo zvino ichi chipo chaunzwa kunamambo wangu ngomurandakadzi wako ngachipiwe kunamajaha anoteera mambo wangu.

²⁸ Ndapota, rekerera kupauka kwomurandakadzi wako; ngokuti Mambo Mwari ngegwinyiso unozoitira mambo wangu mhatso yakagwinya ngokuti mambo wangu unorwa kurwa kwaMambo Mwari nokushata akuzi kuoneka kwouri ngamazuva ako eshe.

²⁹ Kudai munhu echimukira kukurumbirira nokutsvaka mweya wako, mweya wamambo wangu unozosungirwa pamwepo mumwanda wevanopona pashi pasimba raMambo Mwari, Mwari wako, asi mweya yamagaa ako unozoikandira kubanze kudai ngokuposhera kwechimvii.

³⁰ Naapo Mambo Mwari aita kunamambo wangu zveshe zvakanaka zvaakaereketa ndiwe, nokukuemesa kuita mutongi padera paIsuraeri,

³¹ kuti ichi achizoiti chinotambudza, nokuti chipumhuniso chomwoyo kunamambo wangu, kuti iwewe wakaparadza ngazi isina ndaa, nokuti mambo wangu wakadziunzidzira. Naapo Mambo Mwari aita zvakanaka kunamambo wangu, zvino karakadza murandakadzi wako.”

³² Dhavhidha wakati kuna Abhigairi, “Ngaakudzwe Mambo Mwari, Mwari waIsuraeri, uwo wakutuma nyamashi kushongana neni!

³³ Ngakukudzwe kupanga kwako, newe wandipetudza kubva kooparadza ngazi, nokubva koodziunzidzira ngenyara yangu!

³⁴ Ngokuti ngegwinyiso, kudai ngezvaanopona Mambo Mwari, Mwari waIsuraeri, uwo wakandibata kubva kwokumuremadza, kudai usakasira kuuya kushongana neni, ngegwinyiso akusaizosara nomwamuna kunaNabhari mangwani.”

³⁵ Zvino Dhavhidha wakaashira zvaaiya amuunzira kubva kunyara yake, akati kwaari, “Enda ngokunyarara kumhatso yako; wona, ndapurutana izwi rako, ndikakuashira.”

³⁶ NaAbhigairi wakauya kunaNabhari; waiita dhiri mumhatso yake, kudai ngedhiri ramambo. Mwoyo waNabhari waiya wechidakara, ngokuti waiya aradza; ndizvo aazi kumuronzera chiro metsa mangwani.

³⁷ Mangwanani apo kuradza kwapera kunaNabhari, mukadzi wake waiya amuronzera zviro izvi, nomwoyo wake wakaremba mukati mwake, naye wakaita kudai ngebuwe.

³⁸ Ngesure kwemazuva anoda kukwana gumi Mambo Mwari wakachaya Nabhari, naye wakafa.

³⁹ Naapo Dhavhidha azwa kuti Nabhari afa, wakati, “Ngaakudzwe Mambo Mwari, uwo wakaunzidzira ndaa yokutsverudzwa kwangu ndiNabhari, akangwarira muranda wake kubva munezvakashata; Mambo Mwari wakahwirinza kushata kwaNabhari padera pake.” Zvino Dhavhidha wakatuma kunyenga Abhigairi kuti aite mukadzi wake.

⁴⁰ Naapo nhumwa dzaDhavhidha dzakauya Kharmeri kunaAbhigairi, dzakaereketa kwaari dzechiti, “Dhavhidha wakatituma kwouri kukutora kuita mukadzi wake.”

⁴¹ Naye wakamiruka akatsikitsira hope yake pashi, akati, “Ringirai, murandakadzi wenyu ngaaite muranda kugeza tsoka dzavaranda vamambo wangu.”

⁴² Abhigairi wakakasira, wakamiruka, wakagadha mbongoro, nevasikana vake vashanu vaiya naye. Naye wakateera nhumwa dzaDhavhidha, wakaita mukadzi wake.

⁴³ Dhavhidha wakatorazve Ahinoamu weJezireeri; veshe vakaita vakadzi vake.

⁴⁴ Asi Sauri waiya apa Mikhari mwanasikana wake, mukadzi waDhavhidha, kunaPhariti mukororo waRaishi, uwo waiya weGarimu.