1 Sam. 24 - Bhaibheri Rakachena muChindau

Dhavhidha Unorekera Kuuraya Sauri

¹ Naapo Sauri achapetuka kubva koorumbirira vaFiristia, wakaronzerwa kuti, “Ringira, Dhavhidha unogara mushango reEngedhi.”

² Naapo Sauri wakatora makumi matatu emazana (3,000) evanhu vakatsanangurwa kubva kuvaIsuraeri veshe, wakaenda kootsvaka Dhavhidha nevanhu vake pandau yeMapuwe eMbudzi dzomushango.

³ Wakaguma pazvibaya zvemakwai pasinde penjira, apo paiya nebako; naSauri wakapindamwo koodzidetsera. Zvino Dhavhidha nevanhu vake vaiya mumarutii mwebako.

⁴ Vanhu vaDhavhidha vakati kwaari, “Ringira, zuva iro raakaronza Mambo Mwari kwouri, ‘Ringira, ndinozopira gaa rako munyara dzako, kuti uite kwaari kudai ngezvinozokunakira.’ ” Zvino Dhavhidha wakamiruka, akacheka ngokufishika mupendero wenguwe yaSauri.

⁵ Ngesure kweizvo, mwoyo waDhavhidha wakakaruka, ngokuti waiya acheka mupendero wenguwe yaSauri.

⁶ Wakati kunevanhu vake, “Mambo Mwari asatenda kuti ndiite ichi kunamambo wangu, uwo wakadzodzwa waMambo Mwari, kutambanudza nyara yangu padera pake, ngokuti uri wakadzodzwa waMambo Mwari.”

⁷ Ndizvo Dhavhidha wakarambidza vanhu vake ngamazwi aya, asikazi kuvatendera kuti vamukire Sauri. Zvino Sauri wakamiruka kubva mubako, akaenda hake.

⁸ Dhavhidha wakamirukawo ngesure, akabudawo mubako, akadaidzira Sauri echiti, “Makosi mambo wangu!” Naapo Sauri wakaringira sure kwake, Dhavhidha wakatsikitsira hope yake pashi, akakotama.

⁹ Dhavhidha wakati kunaSauri, “Unopurutana ngenyi mazwi evanhu vanoti, ‘Ringira, Dhavhidha unotsvaka kukuremadza?’

¹⁰ Ringira, nyamashi madziso ako aona kuti Mambo Mwari wakupira munyara dzangu mubako; vamweni vandipanga kuti ndikuuraye, asi inini ndakukungurira; neni ndakati, ‘Andizotambanudzi nyara yangu kurwa namambo wangu; ngokuti uri wakadzodzwa waMambo Mwari.’

¹¹ Ringirai, baba angu, wona mupendero wenguwe yako uri munyara yangu; ngokuti kucheka kwendaita mupendero wenguwe yako, andizi kukuuraya, ungazia zvino nokuona kuti akuna kushata nokuti kupauka kwendiri. Andizi kukushaishira, kunyazwi unotsvaka mweya wangu kuuraya.

¹² Mambo Mwari ngaatonge pakati pako neni! Mambo Mwari ngaandiunzidzire kwouri; asi nyara yangu aizorwi newe.

¹³ Kudai ngechisana chevakuru chinoti, ‘Kushata kunobva kunevakashata;’ asi nyara yangu aizorwi newe.

¹⁴ Mambo waIsuraeri wakabuda kutsvaka anani? Unorumbirira anani? Imbwa yakafa nokuti nhata imwe here?

¹⁵ Ndizvo Mambo Mwari ngaaite mutongi, atonge pakati pako neni. Ngaaone kwezviri, arwire ndaa yangu, nokundinunura kubva kunyara yako.”

¹⁶ Naapo Dhavhidha apedza kuereketa mazwi aya kunaSauri, Sauri wakati, “Iri izwi ngerako here, mukororo wangu Dhavhidha?” Sauri wakadaidzira ngeizwi rake, wakachema.

¹⁷ Naye wakati kunaDhavhidha, “Iwewe wakandipinda kunaka; ngokuti iwewe wakandiunzidzira ngezvakanaka, apo inini ndakakuunzidzira ngezvakashata.

¹⁸ Nyamashi wanasa kududzira njira yewandibata zvakanaka ndiyo; ngokuti apo Mambo Mwari paakandipira munyara dzako, auzi kundiuraya.

¹⁹ Ngokuti ndiani ungati aone gaa rake, ungarirekera rechienda zvakanaka here? Ndizvo Mambo Mwari ngaaunzidzire kwouri ngezvakanaka ngeizvo zvewaita kwendiri nyamashi.

²⁰ Zvino, ringira, ndinonasa kuzia kuti iwewe unozoita mambo, nokuti umambo hwaIsuraeri hunozogwinyiswa munyara yako.

²¹ Ndizvo zvino pika kwendiri ndiMambo Mwari, kuti auzourayi mibarirwana yangu inouya sure kwangu, nokuti kupedza zina rangu mumhatso yababa angu.”

²² Ndizvo Dhavhidha wakapika izvi kunaSauri. Zvino Sauri wakahwirira kanyi; asi Dhavhidha nevanhu vake vakakwira kubako.