1 Sam. 23 - Bhaibheri Rakachena muChindau

Dhavhidha Unoponesa Dhorobha reKeira

¹ Zvino vakaronzera Dhavhidha vechiti, “Ringira, vaFiristia vanorwisana neKeira, navo vanoba zviyo zvembuwa.”

² Ndizvo Dhavhidha wakabvunza kunaMambo Mwari echiti, “Ndoenda here koorwisa ava vaFiristia?” NaMambo Mwari wakati kunaDhavhidha, “Enda, urwise vaFiristia, uponese Keira.”

³ Asi vanhu vaDhavhidha vakati kwaari, “Ringira, tinotya muno muJudha; kungapinda kwakadini kudai techiguma Keira koorwisana nehondo yevaFiristia?”

⁴ Zvino Dhavhidha wakabvunza kwechipiri kunaMambo Mwari. NaMambo Mwari wakamupingura akati, “Eya, miruka, udzake Keira; ngokuti ndinozopira vaFiristia munyara yako.”

⁵ Ndizvo Dhavhidha nevanhu vake vakaenda Keira, vakarwa nevaFiristia, vakatora zvifuyo zvavo, vakavauraya vazhinji. Ndizvo Dhavhidha wakaponesa avo vaigara Keira.

⁶ Naapo Abhiatha mukororo waAhimerekhi paakatiza kuenda kunaDhavhidha muKeira, wakauya neefodhi munyara yake.

⁷ Zvino wakaronzerwa Sauri, kuti Dhavhidha wauya Keira. NaSauri wakati, “Mwari wamupira munyara dzangu; ngokuti wadzikonyera pachake ngokupotera mudhorobha rinemisiwo nemipingo.”

⁸ Sauri wakadaidza vanhu veshe koorwa, kuenda Keira koorwa naDhavhidha nevanhu vake.

⁹ Naapo Dhavhidha azia kuti Sauri wakapinimidza zvakashata ndiye, wakati kunaAbhiatha mupristi, “Unza pano efodhi.”

¹⁰ Dhavhidha wakati, “A Mambo Mwari, Mwari waIsuraeri, muranda wako wakazwa ngegwinyiso kuti Sauri unoda kuuya Keira, kooparadza dhorobha ngendaa yangu.

¹¹ Zvino vanhu veKeira vanozondipira munyara dzake here? Sauri unozouya here kudai ngezvaakazwa muranda wako? A Mambo Mwari, Mwari waIsuraeri, ndapota, ronzera muranda wako.” NaMambo Mwari wakati, “Unozouya.”

¹² Zvino Dhavhidha wakatizve, “Vanhu veKeira vanozondipira nevanhu vangu munyara dzaSauri here?” Mambo Mwari wakati, “Vanozomupira.”

¹³ Zvino Dhavhidha nevanhu vake, vaida kukwana mazana matanhatu (600), vakamukira vakabuda muKeira; vakaenda kwavaikona kuenda. Naapo Sauri aronzerwa, kuti Dhavhidha waiya atiza kubva Keira; naye wakarekera kuendeyo.

Dhavhidha Ari muNyika yeMitunhu

¹⁴ Dhavhidha wakagara mumapako mumitunhu mushango reZifi. NaSauri wakamutsvaka mazuva eshe, asi Mwari aazi kumupira munyara dzake.

¹⁵ Dhavhidha waiya mushango reZifi kuHoreshi apo paakazwa kuti Sauri waiya abuda kutsvaka kupona kwake.

¹⁶ Jonathani mukororo waSauri wakamiruka, akaenda kunaDhavhidha kuHoreshi, akamugwinyisa kubudikidza ndiMwari.

¹⁷ Naye wakati kwaari, “Usatya; ngokuti nyara yaSauri baba angu aizokuoni; newe unozoita mambo padera paIsuraeri, neni ndinozoita wechipiri kwouri; baba angu Sauri vanozviziawo.”

¹⁸ Zvino vairi ava vakaita chitenderano pamberi paMambo Mwari; Dhavhidha wakaangira kugara paHoreshi, naJonathani wakaenda kanyi.

¹⁹ Zvino vaZifi vamweni vakauya Gibhea kunaSauri vechiti, “Dhavhidha unodzifisha pakati pedu mumapako eHoreshi, mumutunhu weHakhira, uri ngokubani kweJeshimoni.

²⁰ Zvino, A mambo, uya, kudai ngokuda kwomwoyo wako weshe; nomushando wedu unozoita wokumupira munyara dzamambo.”

²¹ Sauri wakati, “Mambo Mwari ngaamuitire muchena imwimwi, ngokuti munondikungurira!

²² Endai, mwoonasa kuona, muzie pandau pake pemene paanodzifisha, nouwo wakamuonapo; ngokuti ndakaronzerwa kuti wakangwara yaamho.

²³ Ringirai peshe, muzie nendau dzeshe dzaanodzifisha, mwozouyazve kwendiri apo mwanasa kuzia. Zvino ndinozoenda nemwi; kuti arimwo munyikayo, ndinozomutsvakisisa pakati pemakumi emazana aJudha.”

²⁴ Ndizvo vakamiruka vakaenda Zifi pamberi paSauri. Dhavhidha nevanhu vake vaiya mushango reMaoni, murubaya ngokubani kweJeshimoni.

²⁵ Sauri nevanhu vakewo vakaenda koomutsvaka. Naapo Dhavhidha aronzerwa, wakadzaka kundau yebuwe, akagara mushango reMaoni. Naapo Sauri azvizwa, wakateera Dhavhidha mushango reMaoni.

²⁶ Sauri wakaenda ngorutii rumwe rwomutunhu, naDhavhidha nevanhu vake ngokurutii rumweni romutunhu. Dhavhidha wakakasira kuenda ngokutya Sauri; naapo Sauri nevanhu vake vakakomba Dhavhidha nevanhu vake kuvabata.

²⁷ Zvino nhumwa yakauya kunaSauri yechiti, “Kasira uuye; ngokuti vaFiristia vapinda munyika.”

²⁸ Ndizvo Sauri wakapetuka kubva koorumbirira Dhavhidha, akaenda koorwisana nevaFiristia. Ndizvo vakadudza iyo ndau kuti Serahamarekothi.

²⁹ Dhavhidha wakakwirapo, wakagara mubako reEngedhi.