1 Sam. 22 - Bhaibheri Rakachena muChindau

Kuurawa kweVapristi

¹ Dhavhidha wakabvapo, akatizira kubako rinozwi Adhuramu; naapo vakoma vake navo veshe vemhatso yababa ake vazvizwa, vakadzaka kwaari.

² Munhu weshe waiya mukutambudzika, weshe waiya nezvikwereti, nomunhu weshe usaigutiswa ngezvaaiya nazvo, vakaungana kwaari; naye wakaita nduna padera pavo. Vaiyapo naye vanhu vaida kukwana mazana marongomuna (400).

³ Dhavhidha wakabvapo kuenda Miziphe reMoabhi. Wakati kunamambo weMoabhi, “Tendera baba angu namai angu, ndapota, kuti vauye koogara newe, metsa ndizie icho chaanozondiitira Mwari.”

⁴ Wakavasiya pamberi pamambo weMoabhi, navo vakagara naye ngomukuwo weshe Dhavhidha waiya mubako.

⁵ Zvino muprofeti Gadhi wakati kunaDhavhidha, “Usagara mubako; ibva, uende kunyika yaJudha.” Ndizvo Dhavhidha wakabuda, wakauya mugwasha reHerethi.

⁶ Sauri wakazwa kuti Dhavhidha akaoneka, nevanhu avo vaiya naye; Sauri waiya akagara pashi pomuti womuthamarisiki muGibhea pakakwirira, anomukhondo wake munyara yake, nevaranda vake veshe vakaema kumutendenedza.

⁷ Sauri wakati kuvaranda vake vakaema vakamutendenedza: “Izwai zvino, imwimwi vakororo vaBhenjamini; mukororo waJesi unozomupa here munhu weshe minda neminda yemivhini nokumuemesa kuita nduna dzegumi remazana, nenduna dzemazana?

⁸ Ndiyo ndaa imwimwi mwandimukira here? Akuna naumwe wakandironzera apo mukororo wangu paakaita chitenderano nomukororo waJesi, akuna naumwe wenyu unondisvipira mwoyo, nokuti kundironzera kuti mukororo wangu wakaita kuti muranda wangu andimukire andihwarire kudai ngezvaanoita nyamashi?”

⁹ Dhoegi muEdhomu uwo waiya akaemeswa padera pavaranda vaSauri, wakapingura akati, “Ndakaona mukororo waJesi echiuya Nobhi, kunaAhimerekhi mukororo waAhithubhi.

¹⁰ Wakamubvunzira kunaMambo Mwari, akamupa kudya, akamupazve shoti yaGoriathi muFiristia.”

¹¹ Ndizvo mambo wakatuma koodaidza mupristi Ahimerekhi mukororo waAhithubhi, nemhatso yeshe yababa ake, vapristi vaiya muNobhi; navo vakauya veshe kunamambo.

¹² Sauri wakati, “Izwa zvino, iwewe mukororo waAhithubhi.” Naye wakapingura, “Ndiri pano, mambo wangu.”

¹³ Sauri wakati kwaari, “Wakandimukira ngenyi, iwewe nomukororo waJesi, ngokumupa zvingwa neshoti, nokumubvunzira kunaMwari, kuti iye andimukire, kundihwarira kudai ngezvaanoita nyamashi?”

¹⁴ Zvino Ahimerekhi wakapingura mambo, akati, “Ndiani wakagondeka pakati pevaranda vako kudai ndiDhavhidha? Mukwambo wamambo, uwo unokasira kuita apo atumwa ndiwe, naye unoremeredzwa mumhatso yako.

¹⁵ Nyamashi inguva yokutanga kumubvunzira kunaMwari here? Haiwa! Mambo asaerenga nachimwe ngomuranda wake, nokuti kumhatso yeshe yababa angu; ngokuti muranda wako aazi kuzia chiro ngeizvi, zveshe zvakawanda nokuti zvidoko.”

¹⁶ Mambo wakati, “Ngegwinyiso iwewe Ahimerekhi unozofa, iwewe nemhatso yeshe yababa ako.”

¹⁷ Mambo wakati kumajoni aiya akaema naye, “Tenderukai muuraye vapristi vaMambo Mwari, ngokuti nyara dzavo dzinodetsera Dhavhidha; vakazia apo akatiza, vakarekera kundironzera.” Asi varanda vamambo vakaramba kumirudza nyara dzavo kuuraya vapristi vaMambo Mwari.

¹⁸ Zvino mambo wakati kunaDhoegi, “Tenderuka iwewe, uuraye vapristi,” naDhoegi muEdhomu wakatenderuka, wakauraya vapristi; akauraya ngeiro zuva makumi masere navashanu avanhu vaiya vakasimira maefodhi orukangaza.

¹⁹ Wakauraya ngeshoti muNobhi, dhorobha revapristi, veshe vamuna navakadzi, vana nechiya, n'ombe nembongoro, nemakwai.

²⁰ Asi umwe wevakororo vaAhimerekhi mukororo waAhithubhi, waizwi Abhiatha, wakapokonyoka, akatiza kuteera Dhavhidha.

²¹ Abhiatha wakaronzera Dhavhidha kuti Sauri waiya auraya vapristi vaMambo Mwari.

²² Dhavhidha wakati kunaAbhiatha, “Ndakazia ngeiro zuva, apo Dhoegi muEdhomu aiyapo, kuti ngegwinyiso waizoronzera Sauri. Inini ndinendaa yokufa kwavanhu veshe vemhatso yababa ako.

²³ Gara neni, usatya; ngokuti iye unotsvaka kupona kwangu, unotsvakazve kupona kwako; asi kwendiri unozongwaririka.”